Gisuyop sa usa ka commercial establishment ang among tubig?

Paranoia? Conspiracy theory? Daghan sa amo diri sa Mambaling ang gatuo nga ang amo untang supply sa tubig tua paingon sa usa ka commercial establisment. Ang ilang rationale nga matag El Niño sa una, sa wala pa matukod ang maong establisment, lima ra man ngadto sa walo ka oras nga mawad-an kamig water supply. Apan karon, mo kinse diyas na, duha na lang ka oras ang agas sa gripo sa amoa. Ug ang nakaparat pa gayud kay matag alas kwatro ngadto sa alas saes sa kaadlawon lang kini moagas. Mao baya unta kini panahon nga mahingpit ang atong hinanok.

Duna ba kahay pamaagi nga masuta kining maong pagduda? Unsan man kini pagsusi? Ug kon tinuod man gani nga gisuyop ning higabting mall ang among untang tubig, may mahimo ba ang kagamhanan pagpanalipud sa mga gagmay nga konsumidor sama kanamo? May balaud nga mosumpa ning maong sitwasyon?

Ang notice o advisory gikan sa MCWD misamot lang pagpa praning sa mga tao sa amoa.

Gilista sa maong agency ang mga naapiktuhang lugar nga naglakip sa Bulacao, Inayawan, Cogon Pardo, Quiot, Kinasang-an, Basak Pardo, San Nicolas, Mambaling, Punta Princesa, Tisa, Labanagon, Banawa, Salvador, Calamba, Sambag 1, Sambag 2, Pahina Central, Sawang Calero, Pasil, Ermita, Taboan, Kalubihan, Carbon, Sta. Cruz, Cogon Ramos, San Antonio, Kamagayan, Parian, Tinago, Day-as, T. Padilla, Tejero, Lorega, Carreta, part of M. J Cuenco Ave., Osmeña Boulevard, Guadalupe, M. Velez and Capitol Site.

Ang katarungan sa MCWD sa kakuwang sa tubig mao ang paghubas sa Jaclupan Water Facility sa Talisay nga maoy mo hatag og tubig sa naapiktuhang lugar.

Apan dunay mga taga Mambaling nga adto manghakot og tubig sa Labangon (nga naapil sa lista sa mga naapiktahang lugar) kay steady ra ang supply didto ug nga moagas ra ilang mga gripo bisag adlawan pa.

Daw dili maki-angayon nga ang ubang bahin sa dakbayan dunay taas nga higayon nga makagamit o makasawod og tubig. Gani may usa ka Briton (sa usa sa mga naapiktahan nga lugar) nga miriklamo nga samtang ang uban maglisud pagsawod og mainum dunay uban nga may tubig pa nga ilimpyo sa ilang auto ug iapmisibis pas ilang tugkaran. Nagkanayon siya nga sa ilaha dili ka tugutan pag gamit sa tubig pang waswas ug pamisibis kon dunay problema sa supply sa tubig.

Wa koy nahibawoang pamaagi pag tugkad kon ang bag-ong mall bay hinungdan sa grabing kakuwang sa tubig diri sa Mambaling. O kon usa ba sa factor kining commercial establishment sa duha na lang ka oras nga rasyon namo sa agas sa tubig. Maayo tingali nga pasabton sa DSWD ang mga Mambalinganon kon nganong duha ra ka oras kada kaadlawon kami makasawod og tubig ug nga kombinsihon kami nga way kalabutan ang nahisgutang mall sa among purwisyo.

May balaud ba nga manalipud kanamo gikan ning maong panghasi. Ang mga modagan karong piniliay sa Mayo duna na ba silay giplanong mga lakang alang sa usa ka makiangayon nga pagbahin sa tubig?