How do you solve a problem like Trillanes? Nikontra siyang Gloria apan wa kalahutay. Nang-occupy og hotel apan pag-abot sa mga tangke, ni-surrender, wa magdugay. Maurag irong kusog mopaghot nga di kapaak. (Unsaon man tuod pagpaak sa namaghot?)
Gipasaligan kuno siya ni Binay nga tagaag people power support inig abot niyas Makati. Apan way Binay nga nibutho sa ilang pagmartsa.
Maong gadumot siya sa mayor sa Makati. Ug dihang vice president na si Binay ug nipadayag sa iyang pangandoy nga mahimong pangulo sa nasod, gibati ni Trillanes ang uhaw sa panimawos. Pwerti gyud niyang pagarpar nga mapakita niya ang mga yutang gipanag-iya ni Binay nga naangkon ginamit ang kwartang kinilkil sa gobyerno. Apan miabot na lang ang piniliay, wala gihapon siya makapakitag ebidensya nga dunay mga kinawat si Binay. Ingnon ta na lang pu’onga nga napagaw na lang siyag pinaghot.
Ug kay napagaw na man siyag pinaghot, ang iya na lang ikog maoy iyang gilabyuglabyog ug didto siya mipaluyo ni Grace Poe. Iyang gibaligya ang iyang kaugalingon isip vice president ni Poe. Basig bug-at lang gyud tingali nig kalag si Trillanes kay ang ga una sa survey nga si Poe, nawagtang man lag kalit. Naapsan pa man gani sa dakog lubot nga si Roxas. Dili siya opisyal nga bisi ni Poe apan ang iyang dimalas mitakod lang gihapon.
Ug dihang nakabantay siya nga miawop nas Binay og si Duterte nay mihayag, migawas napod ang pagka “bright boy” ni Trillanes og gahimo nasad og pasangil nga dunay dakong kwarta nga gitagoan ang mayor sa Davao sa usa ka bangko. Apan wa may tumaw.
Karon gadala nausab siyag witness kunohay nga sakop sa Davao Death Squad ni Duterte apan nagpataka na man lang kinig yawyaw kay wa may alamag kining ilang witness. Wa man nila ayuhag seminar. Dimalas lang gyud tingali ang pari nga gabunyag ni Trillanes.
Unsa may angay buhaton sa gisamokan nas nawng ni Trillanes nga magsigig gawas sa TV? Aw, pagngun ang TV. Sama sa pagpawng niya sa microphone ni Allan Peter Cayetano dihang wa na siya kaantos sa pagbuko ni Cayetano sa iyang “witness” nga wa intawoy kasayoran.
Mahimo mo nang pagngon ang TV kay makita mo na man sa imong telepuno ang mga balita ug mahimo ka pang makapahungaw kon wa ka mauyon sa ilang pagdala sa taho.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
