Ang sunod-sunod nga tulis dinhi sa Metro Cebu maoy timailhan nga haguka gyud ang performance sa atong kapolisan ug ubang mga tinugyanan sa balaud.
Kung nanarbaho pa ang kapolisan dili makatulis ning mga kanahan.
Asa man ang atong intelligence gathering ug police visibility?
Dili na komedya kining mga insidente sa pagpanulis sa LBC Escario branch ug ang ligas lang ug duha ka oras nga pagpanulis niadtong Lunes sa Three Sixty Pharmacy-Bulacao branch ning dakbayan ug sa Rose Pharmacy sa may Pitogo Consolacion.
Asa man ang atong mga intelligence officers? Unsa may ilang gihimo? Nangatug sa pansitan?
Nagpasabot kini sa pagka-inutil nilang Cebu City Police Director Noli Romana ug ni Cebu Provincial Police Director Noel Gillamac?
Kung dili ma-paralyze kining pundok sa mga tulisan mas maayo pa nga mo-tender ug courtesy resignation silang Romana ug Gillamac.
Nabalaka ko nga mosiaw ug samot ang robbery-hold-up sa mga establisimento niining nagkaduol na nga ‘Ber’ months.
Ambot kung tinuod ba gyud nga ang grupo nilang Leonardo Rama ug Wendel Mendoza maoy responsable sa mga pagpanulis.
Abir tan-awn ta kung epektibo ba gyud kining marching order ni Romana nga ipasignit sila si Rama sud sa 48 ka oras.
Kung di kasulbad ang kapolisan modangop nalang ta sa mga vigilantes nga maoy responsable sa mga summary executions kaniadto batok sa mga badlungon.
* * *
Sa lig-on lang ug backer didto sa Malacañang sa lima ka mga pangan nga gipang-nominate sa Judicial and Bar Council (JBC) nga maoy pili-an ni Presidente Noynoy Aquino pagka Deputy Ombudsman for the Visayas.
Di nalang ta magmina-ot kay kini maoy kamatuoran nga magpasulabi ang “padrino system”.
Sa lima ka mga pangan nga gipang-nominate sa JBC, duha ray akong nailhan kay sila mga Sugbuanon nga sila si kanhi RTC Judge Geraldine Faith Econg nga karon maoy Supreme Court deputy clerk of court and judicial reform program administrator ug ingon man si Ombudsman Visayas Director Carla Juris Narvios Tanco sa Public Assistance and Corruption Office.
Wa ko makaila sa laing tulo ka mga nominado nga sila si Paul Elmer Clemente, Gilbert Kintanar ug Vicente Gengos Jr.
Alang nako, bisag kinsa nilang lima ang matudlo wa koy pagsupak basta ka-protektahan nila ang integridad sa opisina ug ang pakigbugno sa mga kurakot sa gobyerno.
* * *
Akong pakpakan ang upat ka mga konsehales ning Syudad nga mga sakop sa Bando Osmena-Pundok Kauswagan kon (BOPK) nga mipabor sa usa ka resolusyon nga nagtugot na kang Cebu City Mayor Michael Rama nga makabaligya sa tipik ug kabahin sa South Road Properties (SRP).
Maayo kay nakamata na sila si Cebu City Councilors Gerry Carillo, Ritchie Osmeña, Bob Cabarubias ug Noel Wenceslao.
Wa gyu’y ayo ang usa ka politiko nga magsige nalang ug pagawong sa ilang amo.
Dili angay’ng mabalaka sa ilang political career kining upat ka mga sakop sa konseho kung kontrahan na ni kanhi Cebu City Mayor Tomas Osmeña nga maoy ilang amo sa politika.
Ang angay’ng hadlokan sa upat mao nga maduhig silag apil sa hinanggaw nga pamolitika ni Tomas nga babag gihapon sa disposal sa SRP bisag wa nay legal personality ug bisag dili maoy tag-iya sa SRP.
Kinahanglan gyud nga ilang tabangan ang liderato ni Mayor Rama kay alang ra gyud sa kaayohan sa tibuok dakbayan ang tuyo ug tumong niining kasamtangang administrasyon.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
