Daghang isyu ang mitumaw sa sunog niadtong Sabado sa gabii sa sitio Avocado, barangay Lahug diin sobra sa 80 ka mga panimalay ang nangaugdaw.
Unang isyu, dugay kaayong nakaresponde ang mga bombero segun sa mga residente. Ultimo ang mga bombero nga anaa nahimutang sa tugkaran sa barangay hall sa Lahug, langay kaayong nakaresponde nga unta matikang ra ang distansiya sa origin sa kalayo sa panimalay sa mga Villarin.
Ang tubag ni Acting Barangay Captain Gingging Muaña mao nga dili kini tinuod kay matod niya paspas nakaresponde ang mga tinugyanan. Wa malikaye nga gikonprontasi si Kapitan Muaña ning maong isyu sa katawhan.
Apan usa sa akong kasaligang tinubdan nga suweto sa pagpaandar sa maong fire truck miklaro nga tinuod nalangay gyud ang pagresponde sa fire truck nga anaa diha sa Lahug kay dugay na paandaron ang fire truck unya painiton pa og mga 10 minutos una makadagan. Paet, basta karaang unit!
Nahibaw-an pa nako nga dili full tank ang karga nga tubig kay nagdanghag ang in-charge pagpuno sa tangke.
Mao nga motuo ko sa alegasyon sa mga apektadong molopyo nga nalangay pagtubag ang mga bombero sa alarma ug nakita ang pagka-incompetent.
Akong subli-on nga importante kaayo ang time element pagresponde ilabina nga sagad sa mga panimalay dali ra kaayong madutlan sa kalayo.
Ikaduhang isyu nga akong nakuha, nga tinuyo ang pagsunog kay ang responsable sa pagsunog usa ka drug addict nga mituyo pagduslit sa kurtina gamit ang kandila. Ang maong adik nadunggan sa mga silingan usa ka adlaw sa wa pa ang hitabo nga iyang sunugon ilang panimay. Unya karon giduphan matod pa sa kabanay ang maong adik. Midepensa na nga aksidente ang nahitabong sunog.
Butang kini nga angay’ng imbestigahon sa Cebu City Fire Station kung gituyo ba gyud aron itaral sa kasong arson ang responsable. Dili tinuod nga naputlan sa kuryente ang panimalay nga didto nagsugod ang sunog.
Laing butang nga makahatag og kaluya sa mga biktima sa sunog kay dili na sila tugtan sa tagdumala sa University of the Philippines (UP-Lahug, Cebu Campus) nga makabalik pagtukod kay dugay na kaayong nangindahay ang taga UP nga mabawi nila ang propedad.
Apan mipasalig si acting City Mayor Edgardo Labella nga ning administrasyon ni Mayor Michael Rama, way ma-dislocate nga mga residente ug andam silang makig-dialogue sa tagdumala sa maong unibersidad.
Kagahapon sa text ni Dr. Ester Concha, head sa Department of Social Welfare Services (DSWS) Cebu City Hall, ni-abot sa 81 ka mga panimalay ang nangaugdaw.
Niabot sa 187 ka mga pamilya ang apektado ug ning maong gidaghanon, niabot sa 735 ka mga tawo (individual) ang biktima. Subject pa kini sa validation.
Puwerte’ng luoya gyud sa mga biktima sa sunog nga nawad-an og kapuy-an ning panahon sa pasko. Dili gyud lalim.
Dunay pipila sa mga ginikanan ug mga anak nga biktima ning maong kalamidad nga akong kaila kay kauban sa eskuwelahan sa akong anak sa Lahug Christian School (LCS) ug sa Lahug Evangelical Free Church Incorporated (LEFCI).
Pipila kanila sila si Ma’am Joy Lagahit, Frian Lumen, Richard “Pewee” Fernandez, mga pamilyang Esperanza, Lamanilao, Sollano, ug uban pa.
Akong pasalamatan ang tibuok management sa LCS ug LEFCI nga dali kaayong nakasanong sa hangyo sa ubang mga biktima nga adto sila magpahiluna sa LCS sama nila ni Teacher Cedric Carbilledo, Ma’am Carmelita Badayos Miguel, principal, ug si Pastor Peter Merced, guidance counselor sa LCS.
Sobra sa 20 ka pamilya ang na-accommodate sa LCS samtang ang kadaghanan tua gipahiluna sa Lahug Elementary School.
Tabangonon gyud kaayo ang ilang sitwasyon kay kasagaran kanila way nadalang sinina ug mga butang tungod kay paspas kaayo ang kalayo.
Sama ni Frian nga akong kauban sa among basketball sa “Yellow Team” sa (LCS), wa gani intawon makapunit bisag gamay sa iyang mga butang kay giuna pag-rescue iyang lola nga hapit na mag 90 anyos ug ang iyang anak nga si Inday Frisiane nga classmate ni Karen.
Silang Karen ug mga classmates magsabot-sabot pa kung unsay ikatabang sa ilang mga classmates ug mga schoolmates kay mang-eskuwela’g balik karong Enero 5 nga wa nay mga bag ug mga school supplies.
Maglaom ko nga inig sugat nato sa bag-ong tuig, paandaron na ang tanang mga bombero ug dunay ipahimutang daan sa mga thickly populated areas sama sa Ermita, Pasil, Duljo-Fatima, Lorega ug uban pa.
Mag-amping unta ang tanan sa mga pabuto ug likayan ang pagpalupad sa mga sky lanterns aron way sunog.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
