Dihang misulod ako sa usa ka 7-eleven sa Maguikay Mandaue, nakit-an ko ang front page sa Inquirer diin daw torre ang higanting si Yao Ming nga midungo sa pundok sa iyang mga kaubang Insik nga mialirong kang Digong sa official visit sa atong presidente ngadto sa China. Mikuot dayon ko sa akong bulsa ug gipalit ko dayon kining maong newspaper.
Usa ka visual treat ang maong hulagway. Duna usab kini element sa rarity ug may igo kining trivia para mahimong memento sa okasyon. Handumanan sa ato pa. Akong gipalit ang pamantalaan isip handumanan. Nahimuot akong gahunahuna sa akong kabuang. Dili naman ako tigpalitan og pamantalaan.
Nabuang kog palit og mga newspaper niadtong mga adlaw padulong sa EDSA revolution. Estudyante pa ako niadto og mahurot akong bawon sa pagmalit ug bisag unsang mga basahon. Gikan sa mga sexy weeklies paingon sa mga political dailies.
Karong mga panahuna makuha naman nimo ang imong fix o need sa sex ug politics sa youtube. Samtang ang general information mahagdaw mo naman dayon sa Facebook. Ug gusto kag taas nga discussion sa usa ka topic dali mo mang maabrihan ang Wikipedia para niani. Hinuon kinahanglan mo pang i-double check o i-google ang mga info nga makuha nimo sa fb ug wikipedia una mo kini magamit sa usa ka report.
Molanding nalang sa akong mga kamot ang mga printed media kon naa akoy gihuwat sa usa ka reception area. O di ba kaha hinuon kon naa akos usa ka coffee shop diin hinay kaayo ang Wi-Fi.
Moaplit gihapon akog mga used coffee table books nga may kalabutan sa photography. Mosakit na akong mata para mohuman og usa ka novel. Nawa napud ang akong biga para sa mga esoterics. Ug tungod niani medyo nabiyaan na ko sa akong mga higalang manunuwat tali sa kahibawo sa mga bag-ong fictionist ug ingon man sa mga bag-ong manunulat sa creative non-fiction.
Sa umaabot nga US presidential elections, magtagbo ang maru nga Hilary Clinton ug ang pagarpar nga Donald Trump. Ang professional politician nga si Clinton daghan og connection sa mga sapian nga sponsor hinungdan nga migasto kinig dakong kantidad sa ads sa traditional media (TV ug print) samtang ang negosyanting Trump usa ka tihik nga bilyonario ga sigue lag pangaway via Twitter. Mao nga kining maong eleksyon usa usab ka sukdanan sa nagpabiling gahum sa traditional media. Sa ato hinuon may miguwa naman nga pangulo nga social media ang gatupo.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
