Nanlimbawot akong balhibo nga nakadungog sa gitribukar ni Dr. Rene Joseph Bullecer, president sa AIDS Free Philippines International, niadtong Sabado atol sa among programa’ng “Dialogue On The Air” sa DYSS Super Radyo nga nagtuki bahin sa plano sa Department of Health nga mang-distribute og condoms ngadto sa mga tinun-an sa senior high school.
Sa gibutyag ni Dr. Bullecer, sayon na kaayo karon alang niadtong mangita og pares sa pakig-sex kay dunay tulo (3) ka mga applications sa internet nga puwede’ng sudlan.
Sa maong mga applications, puwede ang group sex, same sex ug depende sa sabot.
Ang tulo ka mga applications mao kining mosunod: Grindr, Tinder ug Bubble.
Ang Grindr alang sa male to male sex. Ang Tinder alang sa opposite sex. Samtang ang Bubble alang sa female to female sex.
Makalilisang gyud kining maong kasayuran kay gipaka way bili na gyud ang kinabuhi sa uban ug nagpasabot kini nga puwerte nang naka-penetrate ang puwersa ni Satanas.
Mao kini ang mas kuyaw kay way proper hygiene ug nakaporke pa dunay mga estudyante nga apil.
Way taga gobyerno nga nag-monitor niini?
Midugang si Dr. Bullecer nga mas maayo pa ang gobyerno sa Malaysia nga Muslim kay milampos pag-block sa 1.4 million nga porno sites.
Dako ning sagpa sa gobyerno sa Pilipinas nga 80-85% nag-practice sa Roman Catholicism unya misamot ka accessible ang mga bastos diha sa internet.
* * *
Wa nako matingala niadtong Sabado nga nag-“no show” o wa motunga si Cebu City Mayor Tomas Osmeña didto sa kiosk sa Plaza Independencia alang sa one-on-one drug test challenge ni kanhi city mayor Michael Rama.
Tungod sa wa pagtunga ni Osmeña, milahos si Rama sa Hi-Precision ug didto nagpakuha og urine sample. Segurado ko nga ma-negative ang resulta.
Niadtong Biyernes sa gabii nga nagtuki ko sa akong radio program sa scheduled one-on-one drug test sa duha, si Rama, pinaagi kang Cerwin Eviota, miingon sa iyang text nga ang kanhi mayor magpa-drug test gyud bisag hair sample ug bisan unsang specimen pagsanong sa kondisyon ni Osmeña nga andam sab kining magpa-drug test kung lugas sa buhok ang kuhaon.
Pero wa motunga si Osmeña. Tungod sa iyang wa pagpatim-aw, makamugna kini og interpretasyon nga siya positibo sa paggamit sa ginadiling drugas. Tungod niini makabawos si Rama.
Sa tinuod lang, kining pagsige’g pamasangil ni Mayor Osmeña ngadto sa kanhi mayor nga usa ka drug addict mahu’og na lang gyud nga yaga-yaga ug bullying bisag way igong kamatuoran nga tiggamitan sa illegal drugs si Rama.
In fairness ngadtong Rama, kaniadto pa siya nag-negative sa drug test nila ni Dr. Alice Utlang.
Nakapabor lang gyud si Osmeña kay hangtod karon wa pa gyud mo-isyu og public statement si Presidente Duterte nga naglimpiyo na kang Rama sa unang exposé nga ang kanhi mayor usa ka “drug protector” bisan way igong ebedensiya.
Sa termino ni Rama kaniadto, nasaypan lang gyud siya nga drug protector kay wa siya mosugot nga magpadayon ang pagpamatay sa mga badlungon ug sa mga nalambigit sa illegal nga drugas nga unang gipatuman ni Osmeña ngan lagi nga abogado si Rama ug buot ipatigbabaw ang rule of law.
Ikaduhang rason nga nasaypan lang si Rama tungod sa iyang pakigdula og basketball sa iladong drug pusher nga si anhing Crisostomo Llaguno nga mas nailhang Tata Negro.
Sa laktod nga pagka-estorya, pulos lang theory nga si Rama drug protector nga way konkretong ebedensiya.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
