‘Gamit unta kaayo ang ROTC sa Sinulog’

Dili nako matingala nga gamay na lang kaayo ang mga tinun-an sa kolehiyo nga motabang pagbantay sa Sinulog Grand Parade karong Domingo kay way mga bag-ong enrollee sa NSTP tungod kay wa say enrollment sa kolehiyo tungod sa K to 12 program.

Ang mga migradwar sa high school niadtong miaging school year kasamtangang anaa pa karon sa senior high school Grade 11.
Mao nga daghang lugar sa ruta sa Sinulog ang way “crowd control”. Ang mahitabo, ang crowd na maoy mo-control nga moresulta sa kagamay na lang sa kalsada nga agi-an sa mga contingent kay mga tawo nay magpasulabi.

Kining maong problema, mosamot na gyud ni sa 2018 Sinulog kay wa na gyu’y NSTP unya ang anaa sa Grade 11 karon motungtong sunod tuig sa Grade 12.
Mao nga mas maayong paspasan sa kongreso nga mabalik gyud ug i-mandatory ang ROTC sa nasud kay dako kaayog gamit ang mga kadete panahon sa mga dagkong kalihukan sama sa Sinulog.
Mabahin ang attention sa mga miyembro sa PNP ug AFP ning panahuna. Sila pay mag-crowd control unya ila pa ang pagresponde kung dunay alarma sama sa bomba.

* * *

Matag Sinulog dili gyud kalighot si Mr. Ricky Ballesteros, executive director sa Sinulog Foundation, sa mga batikos gikan sa publiko bahin niadtong paglungkab ug pagkawat sa sobra usa ka milyon ka pesos sa ilang opisina pipila na ka tuig ang nakalabay.

Gani ang uban wa gyu’y tihik-tihik nga nanawagan kang Ballesteros nga mo-resign nalang sa foundation, out of delicadeza tungod sa nahitabo. Apan in fairness sa opisyal, way resulta sa imbestigasyon nga siya maoy nanghilabot sa kuwarta.

Niadtong Sabado sa hapon human sa Sinulog sa Kabataan sa Lalawigan, akong gikumusta si Ballesteros sa maong isyu. Sumala pa niya nga padayon ang imbestigasyon sa pagkahanaw sa salapi ug naglaum siya nga masulbad ra kini ug mataral ang tinuod nga kiriwan. Ang iyang gihimo aron dili na masubli mao ang paghangyo og dugang mga pulis nga makabantay. Apil sa ilang preventive measure mao nga ipabutang dayon sa bangko ang bisan unsang income nga ilang makuha.

* * *

Dalaygon kung way laing motibo si Cebu City Mayor Tomas Osmeña pagkiha sa SM Prime Holdings Incorporated, Banco De Oro (BDO) Magallanes Branch ug GDS Security Agency tungod sa giingong pagpanglimbong sa bayranan sa buhis sa city government.

Laing mga bangko nga posibleng ipangkiha ni Osmeña ug dili ka renew sa ilang business permit mao ang East West Bank, Bank of the Philippine Islands ug ubang mga branches sa BDO.

In fairness ni Osmeña, foul na gyud kaayo ang gideklarar nga P400,000 gross income sa BDO Magallanes sa tibuok tuig kay nahug dili kasuweldo sa ilang branch manager.

Kung way political affiliation kining maong mga gipangkiha ni Osmeña, unsa na kaha kadtong mga negosyante nga klaro kaayo nga didto nakapusta ni kanhi City Mayor Michael Rama atol sa miaging eleksiyon?

Diha ra bay gipamu’ong si Osmeña kaniadto nga iyang hutdon pagpanggukod ang mga negosyante nga dili niya kaalyado. Giunsa man tuod pag-ila nga dili iya? Tungod kay wa motabang ug wa gyud modugo dihang iyang gipangayo-an?

Dunay akong mga amigong negosyante nga miangkon nga ang ilang estelo panahon sa piniliay mao nga mohatag na lang gyud sa mga kandidato ilabina nga neck-to-necd fight aron way harassment nga mahitabo ngadto kanila.