Kung kinahanglan i-martial law ang tibuuk Pilipinas!

SUAREZ

Wa g’yud koy pagsupak kung ideklarar ni Presidente Rodrigo Duterte ubos sa martial law ang tibuuk nasud sa panahon nga mogara og samot pagsinalbahis ang mga rebelde, bandido ug mga terorista.

Pagkakaron wa pay basihanan nga ipa-nationwide ang deklarasyon kay wa pay kagubot ug kaguliyang dinhi sa ato nga binuhatan sa mga terorista ug ubang pundok.

Gawas niini, karong bag-o wa pay aktuwal nga nahitabo nga dunay presensiya sa mga terorista. Ang sa Bohol hurot nag katigbak ang mga Abu Sayyaf.

Apan simbako labngon og pito ka lawod, matinuud ang mga nanggawas nga intelligence reports nga atakihon ang Sugbo, Metro Manila ug ubang lugar, tulin pa sa alas kuwatro ang deklarasyon sa martial law.

Kining ubang mga opisyales sa gobyerno ug mga well-known personalities nga mikuwestiyon pagdeklarar og martial law sa tibuuk Mindanao, nagpaila lang g’yud nga way mga bayag ug way insaktong baruganan alang sa kalinaw sa tibuuk Mindanao.

Alang kanako panahon na nga pulbuson sa gobyernong Duterte ang tanang terorista nga anaa sa Mindanao kay wa gyu’y mga respeto sa ilang mismo’ng pagtulun-an sa Islam.

Pagkakuyaw kung duna nay ISIS province diha sa Mindanao hangtud nga moabot ang ponto nga mismong atong mga miembro sa pamilya maoy dagiton ug panglonggo-an sa liog niining mga salbahis.

* * *

Mosamot na g’yud kagidlay ang atong mga kadagkuan sa Department of Education (DepEd) sa opening sa klase karong June 5 tungod sa kakuwang sa mga classrooms kay mosamot kadaghan ang mga tinun-an gumikan sa padayong transition sa K-12.

Niining school year 2017-2018 mo-kompleto na pag-cater ang taga DepEd sa senior high school nga grade 11 ug grade 12.

Sa miaging tuig nga opening, daan na’ng nagkutaw ang libog sa taga DepEd kaniadto nga gani wa pay grade 12. Samot na g’yud ron nga may grade 12 na.

Pun-an pa sa grabeng langay-langay sa mga kontraktor paghuman sa mga school buildings alang sa senior high school.

Akong nahibaw-an nga ang taga Department of Public Works and Highways (DPWH) maoy nag-oversee niining maong mga school buildings.

Kung grabe na g’yud ka langay ang mga proyektu, dili ba puwede nga i-blacklist sa gobyerno ang mga kontraktor nga responsable?

* * *

Sama sa akong giingong kaniadtu nga samtang dili pulihan og mga tarong nga mga guwardiya nga mobantay sa mga piniriso sa Cebu Provincial Jail, Cebu City Jail ug sa ubang prisohan dili g’yud ma-undang ang palusot sa drugas sa mga jail facilities.

Segurado ko nga ang pagka-corrupt sa mga guwardiya maoy nag-unang hinungdan nganong way hubas-hubas ang illegal nga drugas sulod sa mga bilanggoan.

Dunay usa ka kasaligang tinubdan ang mitribukar kanako niadtong Biyernes, nga diha sa CPDRC dunay pipila ka mga guwardiya nga di magpa-rikisa sa mga pulis nga gipa-augment.

Gani giduso na kining maong isyu ngadto kang Governor Junjun Davide.

Gawas nga pang-ilisan sa mga tarong nga mga guwardiya kinahanglang ipa-undang ang mga dalaw ilabina kanang conjugal visit.

* * *

Wa ikahimoot niadtong mga ginikanan nga nagsalig lang sa motorsiklo, kining bag-ong balaud nga did-an na pagpasakay ang mga bata nga di pa kaabot sa tumbanan.
Gamit kaayo ang mga motor sa tingklase kay makalusot sa traffic.

Gihulagway sa mga ginikanan nga anti-poor g’yud ang bag-ong balaud.

Sa tinuud lang bitaw way ginikanan nga mosugot nga mabutang sa peligro ilang mga anak.

Kung akoy taga bukid, mas luwas nga sakyan sa mga bata ang motorsiklo kay sa mga truck sa barangay nga karaan na ug way proper maintenance.

Mas maayo pa ang motor nga maghinay-hinay kay sa karaang truck nga mawagtangan sa break.