SUAREZ
Dunay usa ka police nga nadestino sa Homicide Section sa Cebu City Police Office nga si SPO3 Rommel Bancog nga medyo over acting ra kaayo. Sa laktod OA nga pulis.
Niadtong miaging simana dihang ilang gipasakaan og kasong robbery with homicide si Renante Mambiar Mendador, kadtong mitulis patay kang ex-DJ ug call center agent Maxi Bolongaita, ang nahisgutang pulis nagpa-papel sulod sa Cebu City Prosecutor’s Office.
Nangasaba siya sa mga office staff / personnel sa piskaliya nga mitugot namong mga sakop sa media nga maka-access sa case folder sa kaso batok kang Mendador.
Nakasabot ang mga staff ni city prosecutor Liceria Rabillas nga makabasa or maka-picture mi sa mga dokomento ngan hapit na alas 5:00 sa hapon unya ang biktima kanhi among kauban ug ang amahan mismo nga si Alex Bolongaita usa ka beteranong magsisibya.
Gawas pa sab niini, na-docket na ang kaso sa piskaliya. Buot ipasabot public document na ug wa nay labot si SPO3 Bancog sa case folder.
Mao nga akong gipakgang si SPO3 Bancog kay akong tan-aw nasobrahan sa iyang pagka-estrikto nga wa na sa ponto.
Wa na siya sa tuno tungod kay numero uno dili na iyaha ang trabaho ug jurisdiction kay ang nag-custody sa dokomento mao na ang piskaliya. Wa na siya’y labot oi.
Akong mga kaubanan sa prensa nga nag-cover sa Homicide Section miingon nga ingon ani g’yud ang tratamento ni Bancog ngadto kanila.
Way problema alang kanako nga mag-ingon ana si Bancog kung anaa pa sa level nga nag-case build up pa sila sa kaso kay bawal baya sila mo-release og spot report.
Pero sa sirkumstansiya sa kaso batok ni Mendador nga nasulbad na unya detinado, nasamdan ug gipasakaan na nila’g kaso, wa gyu’y rason si Bancog nga magtago-tago sa media.
Mao na n’yor Rommel sa sunod tun-i sab og tarong kung asa ra ka kutob. Ayaw na pagpa-papel kung wa ka nay katungod!
* * *
Daghan ang nakuha nato’ng leksiyon niadtong grabe’ng selos ni Leo Zafra, 76 anyos, ngadto sa iyang hinigugma nga si anhing Mae Albasin, 33 anyos, kinsa iyang gipatay sulod sa iyang sakyanan sa SRP ug gilabay duol sa iyang gipapuy-an diha sa dakbayan sa Talisay.
Paeta ni Lolo Leo nga mora’g naka-angkon og butang. Abi kay iyang gigastohan, gipakaon, gibalayan ug gihatagan og negosyo garantiya na nga iyang patyon?
Paglikay nga di ma-insulto ang performance sa pagka-lalaki mas maayo tingali nga likayan g’yud ang pakigrelasyon og sobra ra sab ka manghod.
Hehehehe. Ang age gap sa duha miabot og 43 years.
Si Supt. Jason Villamater, OIC sa Talisay Police, nagkanayon nga matud pa sa iyang expertong amigo nga ang insakto’ng edad sa ipares ni Zafra anaa sa 45 anyos kay ang formula nga maayong subayon mao nga ½ plus 7 years ang gap.
Sa tinuud lang daghan ang nakasimpatiya ni Zafra dihang iyang gi-angkon ang krimen atubangan sa mga sakop sa media.
Ang rason nga wa na g’yud siya maka-antos kay gisigehan siya’g insulto ni Mae ug kanunay’ng gikomparar sa uyab niining batan-on nga excellent kaayo sa duwa sa kama.
Ambot kung di ba ikasuko sa women’s organization nga si Zafra nay gilabanan sa kadaghanan karon.
In fairness ngadto kang Mae nga di na katingog, tinuud kaha ang tanang version ni Zafra?
Wa kaha siya mag-mugna-mugna og mga estorya aron makuha niya ang simpatiya sa publiko?
Niadtong Sabado gikiha na siya sa piskaliya og kasong murder ug kasong theft.
Maglaom ko nga ang iyang pag-angkon sa krimen iyang barugan sa husgado kung tinuud niyang gimahal si Mae.
Pastilan g’yud kung tiguwang maoy mahigugma. Sobra ka igihan!
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
