Gerard Pareja
Dili ako molimud nga usa sa mga hinungdan nga mibotar ako ni Duterte may kalabutan sa akong parochial mentality ug ethnocentrism.
Aniay duha ka definition sa ethnocentrism gikan sa dictionary.com: “The belief in the inherent superiority of one’s own ethnic group or culture; the tendency to view alien groups or cultures from the perspective of ones’s own.”
Samtang ang usa sa mga definition sa pulong nga “parochial” matud pas mao gihapong site: “very limited or narrow in scope or outlook; provincial”
Kon makadungod kita sa pulong nga “ethnocentrism” mosulod sa atong ulo ang mga white supremacist ug mga neo-nazi. Apan kitang mga Pinoy naa usab niani.
Nakahinumdom ka niadto, kadtong wala pay linog ug wala pa ang bagyong Yolanda nga hapit kada lungsod ug dakbayan mosuway pag-establish og Guinness Book Record sa bisag unsa na lang butang matag nila pista.
Ug ang tanan maghudyaka dayon kon dunay local YouTuber nga imbitahon sa salida ni Ellen DeGeneres, tungod sa daghan niini og hits.
Sa college ko pa nasugati kining pulong nga “ethnocentrism” apan mibalig kini sa akong hunahuna dihang nagkagiik kog katawa ning mga inamaw sa Facebook. Duna man guy nangangkong ang Miss Universe karong tuiga nga taga South Africa, half-Filipino kuno.
Ania ang gi-post sa Facebook: “Miss Universe 2017 Demi-Leigh Nel-Peters is a half felipino half African…
Her grandmother was born near Surigao islands and her grandfather is a native Filipino born in Mindoro. So that Peters surname is so popular to the Siargao area like our candidate Rachel Peters..So probably they are familiar with each other like their blood half Filpino and half of their countrymen…”
Ug nagkapuliki intawog Ininglis ang gahimo niani. Wala lang gyud ni siyay lingaw. Tingali nakahibawo siya nga daghang malingaw nianing iyang mugna ug nga gali duna pa gyuy pipila nga mopaak niani. Sagdi nalag Nel-Peters ang apilyedo sa rayna, basta na lang kay naay Peters ato na.
Gani duna pa gyuy mi-message sa Miss Universe nga nangutana kon tinuod ba siyang half-Filipino. Nipahiyum kini pagbalibad nga intawon fifth generation siya nga South African nga ang kaliwat gikan sa Europe.
Apan bisan pa man niani may ni-comment pa gyud sa Facebook og “Bisaya na pud.” Kay lagi taga Mindanao mag kagikan ang atong Miss Universe nga si Pia Wurtzbach. Mao nga si Nel-Peters gihimo nasang Bisaya.
Apan matud pas comment sa usa ka taga Minadanao: “A, sigi lag Bisaya! Wan a lang diay Mindanaowanon?”
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
