Ambot kung kinsa kining drug lord nga maoy amo ug maoy kuhaanan sa shabu ni SPO1 Adonis Dumpit ug kinsa unta ang iyang pang-apud-apuran sa giingong 15 ka mga putos aron mabaligya didto sa Bohol sa wa pa siya mapatay.
Ang pangulo sa National Bureau of Investigation (NBI-Bohol) nga si Atty. Renan Oliva mipasabot sa akong interview nga duna pa silay mga follow-up operations.
Manghinaut ko nga masubay gyud aron matagbaw ang mga nagtahap nga gi-tumo-tumo-an lang si SPO1 Dumpit.
Sa tinuud, dili kalikayan nga mabahiran og mga pagduda ang pagpatay kang SPO1 Dumpit tungod sa iyang aktibong kampanya kaniadto sa pagpatay sa mga badlugon og sagbot sa katilingban.
Apan in fairness sab, usa ka tarong ug ligdong nga pagka opisyal sa NBI si Atty. Oliva.
Aron sab tingali mahayag-hayagan ang huna-huna sa mga matahapon mas nindot nga maka-presentar og mga testigo ang NBI nga misukol gyud si Dumpit mao nga gipusil nalang.
Gawas niini, dunay testigo nga modeklarar nga dili planted ang 15 ka dagkung putos sa shabu.
* * *
Nibukal na gyud ang kawa sa pulitika dinhi sa Sugbo samtang napulo nalang ka buwan atong paabuton sa dili pa ang national and local mid-term elections karong May 2019.
Niadtong Sabado mideklarar na si Cebu City Vice Mayor Edgardo Labella nga magpa-pili pagka mayor batok kang incumbent City Mayor Tomas Osmeña.
Apan segurado na ba gyud, nga siya lang ug wa nay Mike Rama nga magsamok-samok gikan sa ilang kampo sa opposition nga “Barug Team Rama/PDP Laban nga molansar pagka mayor?
Kinsay running mate ni Vice Mayor Labella?
Sa kampo ni Mayor Osmeña iyang gipili-an kung asa nila ni City Councilors Mary Ann Delos Santos ug Dave Tumulak.
Didto sa dakbayan sa Mandaue nikisaw na sab ang pulitika tali nilang Mayor Luigi Quisumbing ug kongresista Jonas Cortes kinsa matud pa gusto’ng mobalik pagka mayor si Jonas.
Posible nga madayon ang pagkontra sa duha.
Ambot kinsay responsable sa usa ka video nga gipakatap nga klarong pangdaot ni Mayor Quisumbing tungod kay nakig-uban kini sa tulo ka mga babaye nga mga sexy sa usa ka yacht diin usa niini mi-agbay pa sa Mayor.
Maayo sab tingali nga tubagon ni Mayor Luigi kining maong kontrobersiya bisan way labot ang lungsod.
Sa provincial level, medyo alegre sab kung madayon ang bugno nilang Governor Junjun Davide ug kongresista and former governor Gwen Garcia.
Maglaum lang ko nga di intawon mapagan sa ilang pamulitika ang batakang serbisyo ngadto sa katawhan.
* * *
Magpasalamat gyud ko og daku niining mga tawo nga mopasiugda og mga libreng medical missions kay daghan gyud ang nagkinahanglan.
Dunay libreng operasyon sa mga bungi (Operation Smile) dinhi sa dakbayan sa Sugbo diha sa Cebu North General Hospital karong July 6 ug 7 (Biyernes ug Sabado).
Si Monsignor Roberto Boy Alesna, moderator sa Team of Pastors sa Saint Therese Parish Church sa Lahug ug usa sa mga Board of Directors sa Mariquita Salimbangon Yeung (MSY) Charitable Foundation, nagpahibawo nga karong Huwebes July 5 maoy screening sa mga pasyente.
Kadtong mga intresado nga mo-avail sa serbisyo patawgon sa 343-7777 aron magpalista ug magparehistro.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
