Nindot gyud ang Parliamentary – Federal

SUAREZ

Kung gusto gyud tag total overhaul sa atong pang-gobyerno mas nindot gyud kung Parliamentary-Federal System.

Sa maong paagi mapugos kitang tanan nga ma-politically matured.

Ako kining gi-insister kay aron kitang tanan manginlabot gyud sa kausaban pinaagi sa pagtamod nga bililhon ug sagrado atong pagbotar sa atong padag-on nga district representative kinsa mahimong sakop sa parliament ug posible maoy ma-presidente sa nasud.

Mas makadaginot sab kita nga ang presidente gikan lang sa mga members sa parliament atol sa ilang eleksiyon kay sa mag-presidential election kita nga mogasto ang gobyerno og dakung kantidad.

Ang igasto nga binilyon sa eleksiyon mas maayong ihapak sa mga dagkung proyekto nga atong gikinahanglan.

Gawas pa kung ipabilin kining paagi nga kitang tanan mobotar gihapon sa presidente ug bise presidente, magpabilin atong batasan nga magpabayad kita sa panahon sa eleksiyon.

Unya mosambalik ra gihapon kanato kay ang modaug nga kandidato mangurakot aron makabayad sa dagkung utang panahon sa eleksiyon. Mao nga pabilin kitang way asenso.

Nikagat naman unta ang mga prime movers sa Parliamentary – Federal apan ambot nganong naka-focus nalang sila sa Federalism.

* * *

Dismayado ang pamilya’ng Lozano dihang akong naatlan ang ilang ka busy sulod sa emergency room sa Chong Hua Hospital niadtong Huwebes sa hapon pagluwas sa kinabuhi ni kanhi police officer Armando “Ahmed” Lozano gikan nga napusilan sa Bliss Labangon Elementary School.

Si Anna, asawa ni Ahmed kinsa kanhi konsehal sa Barangay Calamba miklaro nga wa gyud intawon malambigit sa illegal drugs ang iyang bana sukad pa kaniadto.

Matud sa hamiling kapikas, nga kadtong naapil sa kaso si Ahmed pagpatay kang Calamba Anti-Drug Crusader Alden Abi-abi pulos ra gyud kadto tumo-tumo.

Matud niya nga ang ebedensiya niining tanan mao ang ilang kalisod karon ilabina nga bag-o pa’ng gi-operahan sa kasing-kasing si Ahmed diin naputos sila sa mga utang karon.

Ang mga igsoon mipadayag sab nga ang isyu kabahin sa pagkahimo’ng body guard niini ngadtong Peter Lim dili unta hatagan og malisya kay ang mga opisyal sa PNP maoy mihatag og direktiba kang Ahmed nga mahimong body guard ni Lim.

Ang asawa mihangyo sa kapolisan nga mas maayong tutukan ang anggulo sa iyang pagka opisyal sa Barangay kaniadto.

Nagtoo siya nga gi-target gyud si Ahmed aron mahuyang iyang kawsa sa Barangay.

Nagtoo ang pamilya nga dili gyud professional ang mibira ni Ahmed kay wa makapatay taliwa sa daghang mga buto sa armas nga matud pa mi-abot og 42.

Apan suwerte pa gyud si Ahmed kay nagamit iyang training. Nanagana ang gunman dihang nagpaka-aron ingnong armado siya pinaagi sa pag-aksiyon og bunot dayon dagan sa usa ka lawak.

Kumusta man intawon sila si City Councilors Jun Gabuya, Joy Young ug mga nakasaksi? Nakalingkawas na sa trauma? Dili gyud lalim.

* * *

Makatawa lang ko namong mga sakop sa media nga mo-cover sa mga crime stories ilabina kung ang biktima naa gidala sa mga private hospitals pagkuhag detalye.

Tungod kay ban gyud ang media, lumba’g diskarte aron makasulod sa tambalanan.

Ang uban magpa pulis-pulis aron lang kasulod kuyog sa taga Homicide Section.

Kaniadto nga magbitbit mig handheld radio o ba kaha camera paingon sa main entrance dali kaayong mababagan sa mga guwardiya.

Sa kaso ni kanhi police officer Ahmed Lozano, nakalusot gyud intawon ko dihang nagpaka-aron ingnong magpa-check-up.

Si Ahmed daan na nakong nagpa-ila kaniadto pa sa panahon sa Abi-Abi case, nga taga Dalaguete iyang kagikan kay iyang lola kaliwat sa mga Sambrano ug Zamora unya motawag siya nako og “gaw.”

Mao nga dihang migawas siya gikan nga gi- CT scan mikomedya kanako nga “Gaw, ayaw ko tiwasi.”

Kaniadto pa gyud ni si Ahmed motimbaya kanako bisan niadtong piniriso pa siya sa karaang Cebu City Jail diha sa I.T. Park.

Mi-escort siya nako sulod sa jail kaniadto aron dili ko mahilabtan sa iyang mga kaubang piniriso dihang nag-conduct ko kaniadto og investigative reports sa special treatment sa taga BJMP kang anhing Joel “Tongol” Nodalo nga nagpasulod og bilyaran, karaoke ug video karera sulod sa prisohan.