Pagka dimalas ni Noel Archival

Na-shock gyud ko sa kalit kaayong balita kagahapon pasado alas-2 nga gi-ambush-patay si manlalaban Noel Archival ug iyang mga kuyog didto sa Coro, Dalaguete.

Si Gwen Del Rosa, executive secretary sa abogado miila sa laing mga biktima nga sila si Candido “Edu” Miñoza, Paulo Cortes ug Alejandro Jaime nga maoy driver.

Sila si Archival ug Minoza maoy dead-on-the-spot sulod sa ilang black sports utility vehicle samtang kritikal ang laing duha.

Gikan sa bista sa dakbayan sa Dumaguete si Archival kagahapon sa buntag unya samtang pauli na unta dinhi sa dakbayan sa Sugbo gipangbanhigan sila sa mga nagsakay sa Hilux Toyota.

Ambot unsay mensahe niini nga kanang lugara, diha nakit-an ang patayng lawas ni Alona Bacolod Ecleo samtang si Archival maoy abogado karong bag-o ni Philippine Benevolent Missionaries Association supreme master Ruben Ecleo Jr.

Daghang high-profile cases ang gipang-handle ni Archival nga angayng tutokan sa kapolisan.

* * *

Natingala gyud ko niadtong Lunes sa buntag diha sa Land Transportation Office kon LTO samtang nag-renew ko sa akong lisensiya kay gikuhaan gihapon ko og “urine sample” nga giundang na man diay unta ang drug test isip pre-requisite sa renewal sa driver’s license.

Ambot kun personnel ba gyud to sa LTO o ba kaha fixer sa LTO ang mipasulod kanako sa CR ug mitunol nako og container alang sa akong sample.

Siyempre, aron way langay hatag sab ko sa akong “urine sample” ug mipirma sab ko sa tape nga gipatapot sa taklob. In fairness hinuon, wa ko pangayoi og bayad alang sa drug test. Ang akong nabayran mao ra ang medical ugeye examinations nga P100.

Dihang didto na ko sa cashier ug nagpaabot sa akong turno mi-text ko ni LTO Central Visayas Director Arnel Tancinco ug nangutana kun requirement pa ba gihapon ang drug test kay alanganin sab ko sa akong impormasyon ug way bisan usa nga mitingog didto sa area sa medical examinations dihang nangutana ko bahin sa drug test.

Apan matud ni Director Tancinco nga dili na kay dunay memorandum ang ilang Assistant Secretary nga wa nay drug test.

Pero asa man to ang akong “urine sample”? Wa gani ko mahibawo kun positive ko o negative ko sa drug test?

Kun mao ning kalakiha, duna gihapoy lipat-lipat diha sa LTO sa pipila ka mga badlungon.

Nganong wa man mabadlong sa atong mga kadagkoan ang ubang kabuang diha sa LTO?

* * *

Nabutang na sa peligro karon ang atong mga huwes ug mga court personnel nga nagtolda-tolda sa Cebu City Palace of Justice kay gi-pull out na ang mga police nga gi-detail ug atoa na sa Quimonda building.

Unom na lang ka mga guwardiya sa Eagle Matrix ang nagpabilin karon diha sa korte kay ang unom atoa na sab gipa-duty sa Quimonda.

Sugod niadtong Lunes, wa nay mga pulis nga gipang-detail ug kun dunay assassin nga interesado sa kinabuhi sa mga huwes sayon ra kaayong makuot.

In fairness ni Executive Judge Soliver Peras, dili niya makaya kun siya ray pasagdan.

Dili sab mahimo nga di niya pahibaw-on iyang mga kaubanan pag-pull out sa mga pulis aron unta makapangandam.

Akong naobserahan nga daghan ang nagpanglingo-lingo sa kalit-kalit nga lakang ni Judge Peras.

Unsa katinuod nga ang mga personnel sa Regional Trial Court c11 nga atoa na nagbista sa Quimonda nagsigeg taptap sa ilong ug baba kay abog ug dunay baho sa tawo?

* * *

Kining terminong pamukong maoy ngan niadtong pasahero nga dili moplite nga magpabaga bitaw sa nawong.

Ang ubang taga-probensiya nga mamukong modiskarte nga magpatugtog gyud ug bisan unsaon og pukaw di gyud momata.

Pero ang uban nga mamukong modiskarte sab og tabang-tabang pagdiskarga sa mga butang sa pasahero inig dayong naog.

Pero ang pulis nga mamukong nga nakasibilyan mosekreto pagpakita sa tsapa ngadto sa konduktor.

Karong bag-o dunay bag-ong programa ang Cebu Provincial Police Office nga gitawag ug “Cops on Board” nga ang buot ipasabot dunay mga pulis nga idestino aron pasakyon sa mga buses.

Ang tuyo pagmintinar sa kahapsay ug kalinaw ug maseguro ang kaluwasan sa mga pasahero kay mabadlong dayon ang mga abusadong driver.

In fairness maayo man ang tumong kay makatabang gyud dayon kay gi-maximize ang police visibility.

Pero ang pangutana, makaya ba sa atong kapolisan sa ilang puwersa? Dili kaha mosamot ka ngil-ad tan-awon kun dunay off-duty police nga masuki na nga mamumukong na lang?
Asa may maayo kun mo-conduct gyud ocheck-point ang mga police unya mangutana sa pashero kun wa bay problema ug reklamo?

* * *

Midangop intawon kanamo ang kabanay niadtong habal-habal driver nga taga-Argao nga napusilan sa mga pulis sa Regional Public Safety Batallion (RPSB) didto sa bukid sa Caliongan, Dalaguete atol sa fiesta sa Poblacion, Dalaguete.

Ang biktima nga si Jeffrery Canada nagpabilin karong nalandig sa Vicente Sotto Memorial Medical Center sa gihimong abuso sa taga-RPSB nga wa gani mo-coordinate sa Dalaguete Police Station sa ilang gihimong checkpoint habig sa bukid.

Ang nakaporke, matud pa sa mga ig-agaw ni Jeffrey nga sila si Jimmy Daragosa ug Bobit Daragosa nga gibutang-butangan pa og ebidensiya sa mga pulis ang biktima aron i-justify ang pagpanglupig.

Shabu ug armas maoy gi-planted sa mga pulis.

Ako silang gitambagan nga mokiha gyud sa Ombudsman o ba kaha sa Commission on Human Rights batok sa mga abusadong pulis.

Ang sala sa habal-habal driver nga wa dayon makahunong kay anaa siyay duha ka mga pasahero samtang nagtungas didtong dapita.

Dihang gipugos pagpahunong sa mga pulis nangatumba silang tanang sakay sa motor ug didto gipusil ang habal-habal.

Haskang paita kun tinuod ning pasangil sa pamilya sa biktima sa gihimong pagpangabuso sa kapolisan.

Sama sa akong giingon nga nakaako man gani sa pagpangabuso si PO3 Brent Fulmaran sud sa among complex sa GMA-7 ngadto sa taxi driver nga si Ariel Birao unsa na kaha ang mga sakop sa RPSB nga kontrolado nila ang lugar tungod sa ilang gidaghanon.

* * *

Karong Domingo, Pebrero 23 gikatakdang buksan na sab ang laing torneyo sa duwang basketball alang namongmga frontliners sa News and Public Affairs sa print and broadcast media.
Anha himoon ang opening sa Cebu City Sports Club sa Ayala.

Human sa formal opening dunay exhibition game tali sa “All Star” sa Newsmen Basketball Association of Cebu kon (NBAC) versus selection sa CECEBA nga ila ni Sir Chester Cokaliong.