Kargador gipusil patay sulod sa usa ka resort sa Marigondon

DAKBAYAN SA LAPU-LAPU — Usa ka kargador og mga gamit ug tig tabang sa mga turista na moabot sa usa ka resort sa siyudad sa Lapu-Lapu ang gipusil patay atubangan sa mga turista ganihang hapon (Pebrero 24) sud sa maong resort sa Barangay Marigondon sa maong siyudad.

Si Marcial Aton, ng anaa sa hingkud ang panuigon, patay nang miabot sa balay tambalanan human kini gidali pagdala didto, matod pa ni SPO3 Joramie Espinosa sa Presinto 4 sa dakbayan sa Lapu-Lapu.

Matud sa pasiunang pakisusi sa mga kapolisan sa nahitabo, si Aton naghawid sa pumpboat samtang nanganaug ang mga turista nga gikan nagsuroy suroy sa mga isla duol sa lugar.

Samtang naghawid siya sa pumpboat,usa ka  lalaki nga nagsul-ob og ball cap (kalo) ang miduol ni Aton ug kalit nga mipusil sa lawas niini sa makadaghan na higayon.

Ang mga turista ug mga nangaligo sa maong resort adtong higayonan nakaguliyang tungod sa nahitabo nga pagpamusil.

Si Espinosa midugang nga samtang nagkaguliyang ang mga tawo sa pagtago og pagpanagan palayo sa nahitaboan, gigamit kini sa mamumuno sa pag-ikyas sa lugar.

Wala pay matumbok nga motibo ang kapolisan kung unsa ang rason sa pagpamusil ngadto sa biktima, samtang nagpabiling nangita og paagi ang kapolisan na mailhan ang mamumuno o ang nagpusil ni Aton./dbs