Kasohan na karon ang mga mi-ambush nila ni Noel Archival?

Bisan unsaon, dili na gyud matuis ang findings sa National Bureau of Investigation in Central Visayas (NBI-7) ug sa Task Force Archival nga ang upat ka mga opisyales sa Highway Patrol Group in Central Visayas (HPG-7) nga sila si Supt. Romualdo Iglesia, Senior Insp. Eduardo Mara, Senior Insp. Joselito Lerion ug SPO4 Edwin Galan dunay kalambigitan sa pag-ambush patay nilang manlalaban Noel Archival ug mga kauban didto sa Coro, Dalaguete niadtong Feb. 18.

Gani paningkamotan karong adlawa sa taga-NBI nga ma-file na ang kasong murder batok sa upat ka mga opisyales sa HPG-7 ug laing duha ka mga kauban.

Wala pa itug-an sa mga NBI Senior Agents nila ni manlalaban Ermie Monsanto ug Renan Oliva ang dugang duha ka mga kauban nga apil sa kaso.

Ang motibo sa pagpatay mao ang kalagot sa taga HPG-7 ngadto sa abogado tungod sa mga pasangil og mga kiha sa abogado ug mga kliyente niini bahin sa mga tinonto sa taga-HPG-7 pag-impound sa mga sakyanan aron lang pangwartahan ang mga tag-iya.

Misamot kalig-on ang teyoriya sa NBI tungod kay dunay logbook ug mga testigo nga nagtumbok nga ang duha ka mga sakyanan nga impounded, gipagawas ug gisakyan sa mga opisyales sa HPG pagka petsa 17 ug nabalik sa impounding area upat ka oras human sa pagpatay sa abogado ug mga kauban.

Gawas niini nagpositibo sa mga pulbora ang nasakmit nga Toyota Corolla Vios ug dunay empty shell sa bala sa M-16 rifle nga nakuha sa maong sakyanan ug matud pa mitakdo kini sa laing upat ka mga empty shell nga nahipos didto sa crime scene.

Pero in fairness nilang Supt. Iglesia manghimakak gyud sa ilang kalambigitan sa kaso pinaagi sa ilang abogado nga si Inocencio Dela Cerna.

General denial ug alibi ang depensa sa legal counsel kay matud pa anaa ra gyud dinhi sa dakbayan sa Sugbo ang upat ka opisyal sa oras sa pag-ambush nilang Archival didto sa Dalaguete.

Wa pa gani ma-file mikuwestiyon na si Dela Cerna sa empty shell nga nakaplagan sa awto nga pula, nga alang kaniya misteryo kaayo ang pagkakita kay wa kini maapil sa listahan sa seized items sa unang pagsiksik sa awto sa didto pa sa impounding area sa HPG-7.

Apan ang taga-NBI mipasabot nga ang kabhang sa bala maayong pagkatago sa ilawom sa lingkuranan. Kun wa nila ukba ang seat cover, dili nila makit-an.

Nagduda usab si Dela Cerna sa sakyanan nga nagpositibo sa mga pulbora ngan nga ang NBI dunay firing range ug alang kaniya wala matarong pagka-secure ang sakyanan sulod sa compound sa NBI nga puwedeng ma-bungle sa mga molukat og clearance.

Pero unsa katinuod nga gisakyan ug gipagawas mismo sa impounding area ni Supt. Iglesia ang laing impounded vehicle nga gisakyan sab sa pag-ambush nga mao ang Mitsubishi Estrada color gray dihang nakatimaho nga rondahon sila sa NBI?

Akong sublion nga kun tinuod man nga inosente sila si Supt. Iglesia ug mga kauban sa HPG-7, kinahanglang atubangon nila kining maong kaso ug dili na mogamit og mga dilatory tactics aron kasugdan ang bista ning maong kaso sa husgado ug masubay kun sila ba gyud.

Gawas sa murder, kasohan ba sab sa taga-NBI ang maong mga opisyales sa HPG-7 og kasong anti-graft ug kasong violation sa Code of Conduct and Ethical standards tungod kay ang mga impounded vehicles gamitong service sa mga kanahan?

* * *

With all due respect ngadto kang Cebu Gov. Hilario Davide III, pamolitika ra gyud kining tanan sa ilang pagsuspenso kang Dumanjug Mayor Nelson Garcia.

Weather-weather lang gyud ang panahon nga medyo naalkanse karon sa kapit ang mga Garcia sa nasudnong pangagamhanan didto sa Malacañang.

Hinuon, niadtong sila pa say hawod, pwerte sang haria nila. Ingon ani gyud ning politika.

Kun kauban pa lang sa partido ni Governor Junjun si Mayor Nelson, makaako kaha sila pagsuspenso?

Bintaha na lang unta kun ang Ombudsman maoy mipasuspenso ni Garcia nga usa ka independent body ug medyo layo-layo gamay nga magawngan sa kagaw sa politika.

Way kalainan kini sa suspension ni kanhi governor Gwendolyn Garcia nga si Presidente Benigno Aquino III sa Liberal Party ang mipasuspenso nga nabahiran sa pamolitika.

Nabalaka lang ko nga maabusuhan kining disciplinary power sa mga chief executives ngadto sa mga politiko nga ubos sa ilang jurisdiction tungod sa pamolitika.

* * *

Nakadayeg kaayo ko sa atong Santo Papa nga si Pope Francis nga maoy nangunay sa pagpangayo og pasaylo sa mga binuhatan sa atong kaparian nga mihimo og sexual abuse sa mga bata.

Kini maoy timailhan nga makamaong magpaubos ang Simbahan kinsa giisip nga sumbanan sa pagtulon-an ug pagtuo.

Mas labaw na untang dalaygon kun ang mismong mga pari nga miabuso ug mihimog eskandalo maoy mangunay sa pagpangayo og pasaylo atubangan sa iyang mga parokyano ug mosaad nga di na magpakasayop pag-usab.

Nagpasalig ang Santo Papa nga iyang protektahan ang katungod sa mga bata ug silotan kadtong mga pari nga responsable sa pagpangabuso.

* * *

Doble akong kalipay kagahapon human midaug ming taga GMA/dySS Super Radyo batok sa TV-5 sa game one sa Best-of-Three Championship Series sa Newsmen Basketball Association of Cebu (NBAC) sa wa pa milampos pagbawi sa kadaugan si Pambansang Kamao Manny Pacquiao batok kang Timothy Bradley sa ilang rematch.

Way duwa ang NBAC karong Easter Sunday, April 20 ug unya na kami mo-resume sa game two karong April 27 diin unang magtigi ang para 3rd sa alas-9 sa buntag mao ang Sun.star/Brigada News/Bombo Radyo versus CCTN-47 diha gihapon sa Cebu Eastern College kon CEC gym.
Again, daghan gyud kaayong salamat sa management sa CEC ug sa Cokaliong Shipping Lines sa way putol nga suporta sa NBAC.