Maayong sampolan kining mga iresponsableng netizen!

Kinahanglang  leksiyonon kining mga nagpasagad og post sa ilang social media account sa mga fake news ug ubang matang sa paukyab nga naka-panic sa publiko kay gisakyan pag-ayo karon ang mga peke nga kidnapping sa mga bata aron kuno pangkuhaan sa mga internal organs.

Di lang kutob sa kiha ang himoon sa kapolisan. Kinahanglang pangkonbiktohon sa husgado ubos sa atong mga balaud sama sa alarm and scandal, violation sa cyber crime law, anti-photo and video voyeurism and possible anti-wire tapping law.

Karong bag-o duha na ka mga publication sa FB dinhi sa Sugbo ang nag-viral nga di puwede’ng palabyon sa atong kapolisan. Usa gikan sa dakbayan sa Danao samtang ang ikaduha diha sa Talisay.

Gani gawas niini, napasahan sab ko sa akong messenger og usa ka picture nga dunay usa ka babaye nga naked nga daw sama’g baboy nga giluba aron kuhaan gihapon og internal organ.

Tungod kay akong tan-aw usa ka peke ug edited ang photo wa gyud nako i share sa akong FB account. Ug bisan pa tingali tinuud ang nahitabo di gyud puwede’ng i-share kay usa ka pornographic material ang hulagway.

***

Di ko kabasot niining mga tag-iyag sakyanan nga namasangil sa mga personnel sa Cebu CityTraffic Office (CCTO) nga igo ra’ng nang warta niining nagkaduol nga Pasko pagpatuman sa clamping ordinance kay dili consistent sa pag-implementar.

Matud pa sa ubang tag-iya nga nag-apas sa quota ang atong mga traffic enforcers kay nagpapel kang Mayor Edgardo Labella kay ting bonus na.

In fairness hinoon nilang Retired Col. Andres Bayarcal sa CCTO mapugos sila’g operate batok sa mga nag illegally parked vehicles kay tawgan sila sa mga reklamante.

Niadtong Miyerkules sa kadlawon, usa sa mga lugar nga girumbo sa taga CCTO mao diha sa may La Guerta Lahug ug puwerte’ng daghanang sakyanan ang na-clamp.

Way gisantos bisan kadtong mga sakyanan nga daplin na kaayo gi-parking.

Sa tinuud lang, kung consistent pa unta ang pagpatuman, madesiplina kadtong pasagad og parking sa ilang mga sakyanan.

Hisgot naman ko og parking space, problema kaayo sa ubang mga residente dinhi sa dakbayan sa Sugbo.

Mao bitaw nga akong gisugyot sa atong mga kadagkuan sa gobyerno nga gawas magtugod og parking building ang matag Barangay ilabina dinhi sa urban area, tugotan sab unta nga maka-overnight parking diha sa mga lagpad nga kalsada unya pabayran gikan alas 12:00 hangtud sa alas 5:00 sa buntag.

Ang tugyanan sa pagkolekta sa parking fee mao ang mga nahingtungdang Barangay.

Parehas diha sa mga kalsada sa downtown area nga nagbutang kita og parking pay zone sa adlawan.

Wa ko kasabot nganong dili puwede nga unta wa may naggamit kaayo sa kalsada sa tungang gabii hangtod sa sayong buntag.

***

Dili sa ingon nga misupak ko niining bag-ong balaud nga Republic Act 11229 or the Child Safety in Motor Vehicles Act nga nag-require sa mga tag-iyag pribadong sakyanan nga mag install sa gitawag og CRS or child restraint system or safety car seats alang sa mga nag-edad og 12 anyo paubos.

Daghan lang kog pangutana niining balauda.

Una, gikinahanglan pa ba kini sa mga responsableng ginikanan nga maglikay pirmeg disgrasya samtang mag biyahe pinaagi sa pagpatuman og speed limit?

Ikaduha, sa traffic situation karon dinhi sa dakbayan, necessary pa ba kini?

Ikatulo, dili kaha maparehas kining balaura sa ubang mga balaud nga wa mapatuman?

Ika-upat, nganong mahilig man gyud ning atong mga magbabalaud paghimog tagi-tagi nga balaud? Nganong sa privat car ra man kini ipatuman? Way mga bata pasakyon sa mga pampublikong sakyanan?

Ikalima, asa man atong taga Land Transportation Office (LTO) ug CCTO ug ubang tigpatuman sa mga traffic laws matag buntag nga dunay daghang mga bata pasakyon sa mga motor hatod sa mga eskuwelahan nga risgo kaayo?

Ika-unom, way taga gobyerno nga nag negosyo niining mga safety car seats?

Dili kaha himoong gatasan kining balaura sa mga kurakot nga tigpatuman?

TAGS: CDN Digital opinion, Cebu columnists