Death penalty ang tukmang silot sa mga Ampatuan!

Kudos  ngadto  kang Quezon City Regional Trial Court Judge Jocelyn Solis-Reyes  nga  wa mahadlok  pagkonbikto sa mga  salbahis ug prominente’ng sakop sa pamilyang  Ampatuan nga apil sa plano ug may direktan involvement sa linoog nga pag-masaker sa 58 ka mga personahe didto sa Maguindanao apil na ang 32 ka mga kaubanan namo sa media niadtong Nov. 24, 2009.

Kini maoy huwes nga angay’ng hatagan og promotion ug ibutang sa Supreme Court!

Salamat sab sa mga lawyers sa prosecution team ug sa tanang mga testigo nga nibarug gyud sa kamatuoran nga wa magpadala sa mga hulga nga pangpatyon ug wa patintal sa kuwarta.  

Pero with all due respect, ambot lang pud kaha kung wa pa gibalhin sa Korte Suprema  ang venue ning maong kaso gikan sa Maguindanao paingon sa Quezon City.

Makasustiner ba kaha ang prosecution kung didto sa Mindanao unya gipanghurot  og  patay ang mga testigo o ba kaha nadala sa haylo sa kuwarta sa mga Ampatuan?

Sa tinuud wa gyud ko matagbaw sa sentensiya nga ipahamtang batok nilang Datu Andal Unsay Ampatuan Jr., Zaldy Ampatuan, Anwar Ampatuan  Sr. ug uban pa’ng principal  accused.

Ang angayan niining mga salbahis hutdon pag firing squad unya ipulig lubong didto sa crime scene unya gamitan og backhoe ug pison aron dili kahungaw ang ilang kagaw sa pagka demonyo.

***

Nagka onion-skinned naman ni si Cebu City Vice Mayor Michael Rama kay nahalangan sa akong negatibong komentaryo sa iyang pag-insister nga iyang ipa-observe ang due process ug ipa-confirmatory test sa dili pa taktakon kadtong duha ka mga kawani sa City Hall ubos sa iyang opisina nga nag-positibo sa drug test.

Si Rama nga usa ka abogado nagpadala og suwat sa among manager sa estasyon DYSS Super Radyo GMA sa tuyo nga mangayo siyag kopya ug ipa-preserve ang akong broadcast niadtong Disyembre 13 gikan sa alas 9pm-10pm.  

Well, iya manang katungod ug ako na’ng gi-respeto. Pero kung ang tuyo ni Mr. Rama  nga patak-omon ko butang kini nga mangayo kog despensa kaniya.

Nabag-ohan lang ko sa iyang style rong bag-o. Kung wa motaas iyang edad sa  panerbisyo sa katawhan ning atong harang dakbayan, dili siya mag-iningon niana?

Mao ni ang nakaporke sa ubang politiko nga sawayon lang og gamay isipon na nila ang  media nga kontra na niya.

Wa lang gyud huna-hunaa nga kining akong komentaryo makatabang sa iyang political  career.

***

Dihay usa ka residente sa Mabolo ang nangahas pagtext kanako ug  nagbutyag  nga  dunay  pinili ang mga operatiba sa Cebu City Traffic Office (CCTO) sa  pag-clamp  sa mga sakyanan nga naka illegally parked atol sa ilang operation.

Sumaa sa nag text nga sakyanan sa anak  ni Mayor Edgardo Labella gi-exempted pag-clamp sa taga CCTO kay sumaa pa hadlok sa mayor.

Akong gitawgan si Mayor Labella aron makatubag sa isyu apan pakyas siya sa pagtubag sa iyang  telepono.

Kung tinuud man kini, kinahanglang silotan ang mga traffic personnel kay akong  nahibaw-an nga dili ingon ani si Mayor Labella.

Kinahanglan sab tingali nga mosakripisyo ang pamilya sa Mayor kung tinuud man nga  motuman sa atong mga lagda aron paglikay og  isyu.

In fairness ni Retired Col. Andres Bayarcal, operation chief sa CCTO, iyang giklaro nga  andam nila kining subayon.

Apan sumaa pa niya nga wa siyay nadawat nga impormasyon bahin niining negatibo  nga isyu batok sa Mayor.