outbrain

Corruption sa LTO-7 nagpadayon

By: Llyod Suarez - CDN Digital | January 12,2020 - 07:06 AM

 

Kinahanglang imbestigahon ug i- lifestyle check sa Ombudsman Visayas si Land Transportation Office in Central Visayas (LTO-7) Director Emmanuel Victor Caindec aron masubay kung commensurate ba ang iyang income sa pagpanag-iya og mga sakyanan sama sa mga SUV ug sa pasangil nga galanti ang iyang kinabuhi.

Pero ang pangutana mo-imbestigar ba si Deputy Ombudsman for the Visayas Paul Elmer Clemente kung way complainant ug dili ipa-agi og verified complaint?

Wa na sa vocabulary ron sa Ombudsman Visayas ang pag-conduct og fact finding investigation batok sa mga kuwestiyonableng opisyales sa gobyerno.

Dili ni parehas niadtong panahon nilang Mayor Edgardo Labella nga nahimong Director diha ug ni Ma’am Virginia Palanca Santiago.

Puslan man nga iyang gi-angkon nga dili siya pobre ug duna siya’y daghang mga sakyanan basi sa akong interview kaniya niadtong Lunes sa gabii sa DYSS, kinahanglang ipamatuod niya nga dili pinaspasan ang tanan nga maoy pagtoo sa iyang amahan nga si Mr. Sonny Caindec.

Wa siya motug-an kung pila ka sakyanan niya ug pila iyang kuwarta sa bangko nga gideklarar sa iyang Statement of Assets, Liabilities and Networth (SALN).

Butang kini nga angayng lili-on sa Ombudsman.

Wa gyu’y laing mabasol ning tanan nga natribukar ang isyu batok kaniya. Iyaha ra gyu’ng amahan.

Ang nakadaot lang ni Director Caindec kay inay iyang i-confront ang isyu nga gibutyag ni columnist Bobby Nalzaro mihimo na hinoon kini og character assassination namong mga sakop sa media.

Nasuko siya dihang akong gipangutanakung katoho-an ba ang iyang mga counter allegations batok ni Super Bobby.

Atol sa interview wa ko mo debate kaniya aron makapadayag bisag sakit sa dunggan paminawon nga midamay namo tanan sa media sama sa iyang paggamit og mga pulong nga “kamo sa media may lang mo mamantay sa LTO pero sa ubang ahensiya nga dunay anomalosong proyekto wa mo mosubay.”

Sa kinatibuk-an sa akong interview ni Caindec si Super Bob maoy sentro sa iyang panaway kay maoy nag-expose sa isyu batok kaniya nga naka-angkon siya  og lima ngadto sa unom ka mga luhong sakyanan nga SUV subay usab sa pangangkon sa amahan nga si Sonny Caindec nga mi-personal pag-adto sa among sibyaanan ug nakig estorya ni Super Aljin Abaquita.

Si Sir Bob maoy tuyo ni Mr. Sonny niadtong higayuna apan na busy kay duna silay department heads meeting.

Admittedly na shock ko sa pasangil ni Director Caindec ngadtong Sir Bob kay miingon siya nga kurakot kini kay dunay bag-ong BMW nga sakyanan unya matud pa midawat sa iyang gitunol nga envelop nga may sulod dakung kantidad. Posible kuno nga hubog na niadtong higayuna si Super Bob.

Ngan nga di katoho-an ang pasangil ni Caindec, akong gi-insister nga wa ko kakita anang BMW ug ako siyang gi-cross examine parte sa envelop apan di siya kahatag sa kompletong detalye ug kung kanus-a niya gitunol ug igo ra siyang mihatag og mga initial sa pangan sa mga tawo nga naka-witness kuno nga sila si “RM ug MR.”

In fairness ni Sir Bob sukad pa mi sa 1993 nag-uban sa broadcast media apan nagtinarong man intawon mi ning among profession.

Kung nangurakot man tingali mi, dugay na unta ming gipangtangtang sa Radyo GMA nga grabe ka estrikto kung maghisgot tag media ethics.

Gilabhan sab ni Director Caindec ang iyang amahan atol sa interview ug iyang gipasabot nga nasuko iyang amahan dihang wa siya mosanong sa mga hangyo niini nga makig alyado sa mga fixer aron makakuwarta sa LTO.

Giangkon ni Director Caindec nga dili pa gyud zero corruption ang LTO-7 apan naninguha siya nga dunay kausaban sama sa pagpa-entrap sa mga kawani sa LTO.

Ang ako lang ngadtong Directror Caindec nga di siya mag onion-skinned. Kung dunay mga isyu sa iyang pagkatawo ug pagka opisyal sa LTO kinahanglang i-focus iyang tubag sa isyu ug dili magpataka sa pagpang-akusar.

Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

We use cookies to ensure you get the best experience on our website. By continuing, you are agreeing to our use of cookies. To find out more, please click this link.