Bag-o pa mi diri gi-transfer pero dugay nami naninda didto sa may Jakosalem.
Dugay nani nako nga negosyo, gikan pa sa akong mama, ako ang nisunod. Katabang nako akong mga pag-umangkon og paninda diri.
Mao mani among namat-an. Pagkatawo namo, mao nani gibuhi sa among mga ginikanan. Ang akong mama permiro naninda og kandila unya dayon nagkadugay, naninda na og mga religious items.
Kun dili pyesta diri, ginagmay ra gyud intawn among mahalin ana. Ang amo ra gyung kalipay kanang moabot na ang pyesta ni Señor Santo Niño kana kay makabawi-bawi mi sa among mga utang. Kun laing adlaw, dili.
Kung mingaw kaayo, utong lang gyud. Padayon lang gihapon. Dili man ta pasagdan sa Señor, motabang man gihapon na sya nimo. Bisan karon di man mi kasiguro kun daghan ba og halin kay layo man gud mi sa simbahan.
Atong unang tuig, didto mi sa Jakosalem Street gibutang. Mas makahalin mi didto. Naka bayad-bayad gud mi ato sa among mga utang unya naa’y sobra gamay. Orderon mani among mga baligya unya di man ka kakuha og supply kun dili ka mobayad daan.
Ang uban di mohatag og pareha ani akong hinatagan kay diha ra man kuno sila makabawi pero mao ra man gihapon sa akong paminaw kay tagaan man gihapon ka’g grasya. Bahalag gamay imong ginansya basta naa lang. Di kay magpalabi ka sa imong ginansya, abi kay imo lang sang pahimoslan noh. Iya-iya man gud.
Kun unsay ihatag sa Señor, mao rana akong dawaton. Akong pangayoon maayo lang og lawas.
