outbrain

‘Pastilan ning pulis, initan pa gyud ang inom ug sugal sa mga minatay’

By: Lloyd Suarez - Columnist/CDN Digital | February 29,2020 - 11:37 AM

Nasobrahan sa hambug si Police Colonel Engelbert Soriano, acting Cebu City Police director, nga ibawal gyud niya ang sugal ug inom niadtong magbilar og minatay.

Hinoon kining pulis may hambug man gyud. Pero kining iya talagsaon.

Wa lang gyud huna-hunaa ba nga kining sugal nga ginagmay ug inom atol sa mga lamay sa patay maoy makapa-ingganyo intawon sa mga silingan, kabanay o kadugo nga mo-unong og binuntagay.

Naka appreciate ko sa ilang effort karon sa pagpanakop sa tanang matang sa illegal gambling pero bilar sa minatay ila pa gyu’ng daginoton? Pag sure mo oi!

Kining ilang dakop adto pa nila i- focus sa illegal drugs mas malipay pa ko kay sa sugal nga nakapa-edukar sa kadaghanang kabus nga mga estudyante.

Tipik kini sa Oplan Pakilala ni Soriano?

* * *

Nagpakaulaw lang sa pamilya ug sa entire PNP organization si Police Corporal Marlito Portugueza nga sakop sa Waterfront Police Station sa Cebu City Police Office human nangawat sa mga pusil nga gipang-surrender sa ilang station.

Dili gyud angay’ng pasanayon ning klaseng pulis nga kiriwan og kamot nga mibaligya sa 12 ka armas nga sinurender.

Kinahanglang taktakon ni oy aron dili tawon maduhig ang mga tarong sa Philippine National Police.

Mao ni ang iyang nakuha sa training sa PNP nga mangawat?

Duna gyu’y mga yabag ug mga badlungon nga sakop sa PNP sama sa kadtong mga pulis na nasakpan na nangilkil ug nangwarta sa mga kadete o aplikante sa pagka-pulis.

Unya kung makasulod na sila sa PNP organization, duna say uban na nasakpan na nakadawat og mga padangog o protection money gikan sa illegal. Siguro nakat-on ni sila ug nakasunod sa mga badlungon na senior nila na pulis.

Sayop ang gisudlan nga profession ni Corporal Portugueza. Angay niya adto sa pundok sa mga sindikato.

* * *

Haskang inutila gyud ning paagi sa mga Local Government Units (LGU) sama sa dakbayan sa Sugbo nga kanunay’ng maulahi pagpalapad sa agi-anan ug mga kalsada sa mga densely populated area.

Kung di masunog sama diha sa Barangay Suba di kapatuman og reblocking.

Dili puwede magtukod og usa ka taskforce si Mayor Edgardo Labella ug ubang mga local chief executives aron maoy motutok ning maong problema?

Automatic nga ang local chief executive sa maong locality maoy chairman unya iyang mga sakop ang taga Bureau of Fire Protection (BFP), Presidente sa Homeowners Association aron seryoson na intawon kini pagsulbad.

Paeta gyud kay nagbalik-balik kining problema nga di dayon maka-penetrate ang mga bombero sa fire scene tungod kay gagmay ang kalsada.

Lisuda bitaw sa ubang mga lugar sudlan. Ultimo pagpagawas og masakiton o ba kaha minatay maglisod sa paggawas tungod sa kagagmay sa agianan.

Asa man ang police power sa gobyerno nga atong nakat-onan

Maglisod pag-reblock sa mga nagpuyo kay hadlok nga di na mobutar?

Daghan pa kaayong mga lugar dinhi sa dakbayan sa Sugbo ang namiligro sa sunog nga dili dayon masudlan og mga bombero tungod sa kahagip-ot sa mga kalsada sama sa Kamputhaw, Lahug, Barrio Luz, Apas, Guadalupe ug uban pa.

* * *

Wa ko kasabot nganong hangtod karon wa pa gyud gi-demolis sa taga Office of the Building Official (OBO) ang gikoral nga mga sin diha sa sidewalk sa dalan Colon nga nakahasol pag-ayo sa mga pedestrian ug mga motorista.

Ang mga tawo nga mag-atang og sakyanan atua na sa kalsada kay wa namay sidewalk.

Ako na ning gipagawas dinhi niadtong pagsugod sa ciudad sa ilang clearing operations sa mga sidewalk sa downtown area.

Kining maong sidewalk nga gipasirad-an ug gikoral natung-an kini sa usa ka inila na fastfood ug inila na tindahan sa mga sinina ug uban pang gamit sa Colon.

Akong gibalikan ang maong dapit unya duna nay pahibawo nga may temporary permit sila gikan sa City Hall.

Ambot kung unsa ka tinuud nga nakakuha silag permit nga magamit ang sidewalk kay mismo si Mayor Edgardo Labella nga akong gipahibawo natingala sa maong permit ug misaad nga iya kining ipasubay.

Akong nahibaw-an nga kanang dapita pabarugan og four storey commercial building sa usa ka family-owned real estate company ug usa ka foundation. Duna na silay building permit nga gi-isyu niadtong January 14.

Ang akong ponto ba mao nga maayo lang ang gobyerno mogukod sa mga kabus nga mga vendors pero dili katay-og sa mga adunahan.

Kung mao ning kalakiha way pulos ang kamanduan ni Presidente Duterte nga palimpiyohan sa tanang obstruction ang mga kalsada ug mga sidewalks./dbs

Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

We use cookies to ensure you get the best experience on our website. By continuing, you are agreeing to our use of cookies. To find out more, please click this link.