Rosalyn Ibay, 39
“Pero karon bisan single ko, daghan man ko’g mabuhat. Dili man kinahanglan naa kay partner para magmalipayon ka.
Karon nga women’s month, akong masulti, ang pinaka-importante nga naay respeto sa kaugalingon kitang mga kababayen-an,” matud pa niya.
Mao kani ang panglantaw sa usa ka babaye na nagdako sa Davao pero nagapuyo sa Cebu ug 21 na katuig.
Bisan pa tuod kung wala siyay pares sa kinabuhi pero nagamalipayon gihapon siya sa iyang pagpuyo ug ang nakatabang niini ang iyang debosyon sa Divine Mercy ug sa iyang pagkamiyembro sa usa ka relihiyoso na grupo.
Ug usa pod na nakapalig-on sa iyang debosyon kay siya niangkon na namilagrohan sa Divine Mercy.
“Bata pa kaayo ko naa nakoy sakit sa kidney, murag diabetic pud ko ato unya naa nakoy myoma. Nag-hope ko nga maayo. Naayo gyud ko, wa ra koy gi-inom nga tambal. Unya sa akong myoma, gi operahan ko recently,” matud pa niya.
Lipay kaayo ko kay grasya gyud sya nga nahitabo sa akong kinabuhi.
Ug duna pod siya’g tambag sa mga kabatan-onan.
“Tambag nako sa mga batan-on karon di magpalabi og kaon, unya ubanan pud sa pag-ampo kay mo-effect gyud atong mga kinaon pagkabatan-on inig taas sa atong edad.
Tanang butang basta palabihan, di gyud maayo,” matud pa niya.
Bisan pa tinuod na wala pa siyay pares sa kinabuhi apan wala gihapon siya mawad-i og paglaum ug gihatag niya tanan sa kamot sa Ginoo ang tanan.
“Karon naa baya’y time nga ganahan ko magminyo pero tungod sa pag serbisyo sa Ginoo ba, unya daghan pud ko’g gipangayo nga kaayohan sa akong mga gipamati, na-focus gyud ko sa pag-ampo.
Naa gani time nangayo ko pero wa gyud gihatag. Dili to para sa akoa, mao to ni-back out ko sa akong pangayo sa Ginoo. Kabobot-on gyud na sa Ginoo ang kaminyoon. Pangitaan na nya’g pamaagi nga magkatagbo mo,” matud pa niya.
