Kumusta naman tawn ang pulis nga napusilan sa iyang tiyan sa drug pusher nga napatay sab atol sa ilang encuentro niadtong Lunes sa hapon sa buy bust operation?
Angayng pasidunggan ug hatagan og promotion si PO3 Joseph Villamor sa Lapu-Lapu City Anti-Illegal Drugs Special Task Group kinsa maoy poseur buyer nga napusilan ug ingon man iyang mga kaubang pulis nga paspas sab kaayong mibaws pag-rakrak sa mga drug pushers nga nangamatay on-the-spot nga sila si Romeo Daleon ug Marlon Ampatuan Yungco.
Basta drugas, risgo na gyud kaayo ang kinabuhi sa mga operatiba kay dili na kakompiyansahan karon ang mga nalambigit sa drugas kay mosukol na gyud.
Gikinahanglan karon sa atong mga awtoridad ang dugang training aron mas mahanas pa gyud sa ilang trabaho.
* * *
Mirisi sa walo ka mga trabahante sa Kapitolyo kun pangtangtangon gyud ni Gov. Hilario “Junjun” Davide III human iyang nasakpan sa akto nga nag-inom atol sa tingtrabaho sa oras sa gobyerno niadtong Biyernes petsa 16.
Sa walo ka personnel sa Kapitolyo nga nag-inom, upat ang outsourced, usa casual nga babaye ug tulo ka regular employee.
Unya niining walo, ang lima maoy nasakpan sa akto ni Gov nga mga kawani sa Cebu Provincial Disaster Risk Reduction and Management Council unya ang tulo pulos mga regular nga kawani sa Integrated Provincial Health Office nga nasakpan sa gwardiya.
Nakatawa ko sa report ni Super Renan Alangilan kay matud pa, ang mga kawani nga nasakpan niadto sa panimay ni Gov pagkasunod adlaw, Sabado, ug nangayo og pasaylo.
Ang governor nga miabi-abi og tinarong sa iyang mga bisita, mikomedya pa kini pinaagi sa pagpa-pili kun unsay gustong imnon nga makahubog.
Miingon kuno si Gov, “Oh! Unsay inyo? San Miguel Light? O Redhorse?” Hehehe.
Kun didto pa ko, moingon ko ni Gov nga kanang bugnaw lang kaayo nga matang sa silot Gov sama sa pag-suspenso og tag-unom ka buwan agig patagam.
Ayaw lang pangtang-tanga, Gov, kay pamilyado ang uban. Ang usa kanila, pwerte diayng pagka-Diyosnon kay mao pay mo-lead sa ilang novena matag Biyernes sa Sto. Niño diha sa ilang opisina. Basig gipun-an niya og debosyon ni “San Miguel.” Hehehehe.
Porbida gyud ning ubang trabahante, dili gyud maglikay. Dili na gyud mo makabasol sa media kay kapila na mi mipagawas og article parte sa hubog-hubog sa mga kawani sa Kapitolyo bisan oras pa nga ting-trabaho apan misukwahi gyud mo!
Paita ning ubang trabahante sa gobyerno, usahay mosukol pa sa amo, unya kun panugoon, dili pa motuman.
Karon nga pang-imbestigahon, pwerteng mga but-ana na unya murag dili makabuak og baso.
Sagad natong mga lalake, moinom man gyud, pero atong ibutang sa insaktong oras.
* * *
Ang labing maayong buhaton ni Talisay City Mayor Johnny Delos Reyes aron matunhay ang Talisay City College (TCC) mao nga unahon niya pagtulon iyang garbo ug kinahanglang i-recall niya ang appointment ni Dr. Paulus Mariae Cañete isip presidente.
Hatagan nila og insaktong higayon si Richel Bacaltos nga makadumala sa TCC ug hangtud nga makatudlo ang Board of Trustees sa kwalipikado nga tawo.
Natay-og ang pagdumala sa TCC kay nagpasulabi ang pamolitika ug dunay mga garbo nga giyatakan.
Hulmigas gani nga puwerteng gamaya sa matang nga mananap, mopaak man gani. Tawo pa kaha kun daug-daugon?
* * *
Haskang dimalasa gyud intawn ni kapitan Oliver Escolar sa barangay San Vicente dakbayan sa Bogo nga naligsan patay samtang nag-ilis og ligid sa na-flat nga sakyanan diha sa Liloan kagahapon sa kadlawn.
Usa ka pick-up nga sakyanan maoy nakapunggit sa kapitan ug sa laing duha nga nangaangol.
Ang hinungdan sa disgasya kay way “early warning device” sila si kapitan samtang nag-ayo.
Bisag kinsa wa gyuy ganahan nga ma-disgrasya. Mao nga magmigkaw gyud ta sa kalsada bisan unsang orasa.
Madisgrasya man gani bisag hayag kaayo ang palibot, samot na kun ngitngit kaayo.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
