Ipangkiha na lang gyud ang mga bakakon

Wa nay kawatan nga moangkon.” Mao kini ang insaktong linya pag-alkontra sa pamakak sa mga nurses nga sila si Arianne Mae Pacula ug Kamille Isabela Neri sa Cebu Puericulture Center and Maternity House nga mi-plaster sa baba sa bata nga lima pa ka adlaw nga gianak.

Wa gyud ko magtuo nga kini maoy depensa sa taga-ospital ngadto sa inter-agency task force niadtong Biyernes kay ang una nilang tubag sa isyu mao nga ang pag-plaster gituyo gyud aron dili mahug ang tsupon nga gipasupsop sa bata aron dili na magsigeg saba ug hilak sa nursery room.
Naunsa na man sila? Nausab na ang depensa kay maayo na kaayong pagka-briefing sa ilang abogado ug sa mga kadagkoan sa ospital?

Sa sinugdanan niining maong kontrobersiya, wa baya dayon ko mokagat sa pasangil sa inahan ug sa amahan sa bata nga sila si Jasmine Badocdoc ug Ryan Noval kay kun palawoman nato og huna-huna, makiangayon lang sab siguro ang pag-plaster aron isuporta sa tsupon aron dili moluom ang bata ug aron pagwagtang sa alingogngog sa hilak sa anghel nga wala sa kiliran sa inahan 24/7.

Pero niining ilang pagpamakak, wa na ko motuo nila. Kinsa man diay ang nag-plaster sa baba sa bata?

Sa kaestrikto diha sa Maternity, nasudlan og laing tawo nga maoy nag-plaster aron mabutang sila sa kontrobersiya?

Alang nako, mas maayong mokiha na lang gyud ang mga ginikanan sa taga-ospital ug sa mga nurses kay bisag unsaon pagbali-bali, mamakak ra gyud gihapon ning mga kanahan.

* * *

Haskang paeta sa sitwasyon niadtong miaging semana sa mga huwes ug mga kawani sa korte diha sa Qimonda IT Center kay gawas nga pwerteng tulo-tulo sa singot gumikan sa kainit, naputlan pa gyud sa supply sa tubig.

Tungod sa kabaho ug kahugaw sa mga conmfort rooms sa Qimonda, sagad kanila adto intawon motuman sa sugo sa lawas sa SM City. Matud nila nga sakripisyo gyud kaayo unya gasto pa sa plite sa taxi.

Ang uban misakrpisyo gyud pagpauli sa ilang balay.

Unsaon na lang kun mag-pirmi kini. Doktor maoy makasapi!

Si Henry Espinoza, assistant building administrator, mipasabot nga may deperensiya gyud ang tangke sa tubig sa Qimonda ug ingon man ang tig-supply sa tubig nga mao ang Pilipinas Water.

Alang lagi nako, mobalik pa lang unta ang mga huwes ug mga court personnel sa ilang building sa Palace of Justice diha sa Capitol premises, wa gyud silay problema sa supply sa tubig kay kusog kaayo.

Ang gi-advance sa Supreme Court pag-abang nga mikantidad og P35 million gigasto pa lang sa pag-retrofit sa Palace of Justice, sulbad na unta ni rong mga panahuna.

Unsaon man nga mahilig man pag-usik-usik sa kuwarta sa gobyerno sila si Chief Justice Lourdes Maria Sereno. Wa kahay nakakomisyon sa mahal nga abang sa Qimonda?

Naunsa man ning taga-Qimonda? Patuga-tuga sa pagpaabang unya dili makahatag og insaktong serbisyo.

Naa pay ilang negosyo sa Xerox, dili gani maka-isyu og official receipt.
Natan-aw ni sa taga-Bureau of Internal Revenue kon BIR?

* * *

Nanghulga karon si Julito Flores, ang spokesperson sa ilang federation sa pundok nga mga bus operators sa Sugbo nga mopetisyon sila sa Land Transportation Franchising and Regulatory

Board sa Manila nga ibalik na kadtong mahal nga pletehan sa ilang mga buses.

Ang panghulga ni Flores bunga sa giingong dili makiangayon nga ipatuman sa gobyerno nga dili na tugtan nga makadagan ang mga units nila nga nag-edad na og 15 ka tuig pataas.

Miingon si Flores atol sa among programang “Dialogue on the Air” sa dySS Super Radyo niadtong Sabado nga ilang idayon ang ilang petisyon nga dili na moagi og public hearing sa panahon nga ibasura ang ilang hangyo nga hatagan sila og tulo ka tuig nga lugway.

Naglaum si Flores nga suportahan sila sa publiko pinaagi sa signature campaign ug ilang gipanghinaut nga ang mga lain-laing local government units mopasar og resolosyon nga suportahan ang ilang gipangayo nga 3 years extension.

Si Ryan Yu sa Cebu Integrated Transport Cooperative kon Citrasco mipasabot nga ang ilang pagpangayo og usbaw sa pletehan sa jeepneys ngadto na sa tag P10 gikan sa tag P7.50 dili magpadato kanila.

Ang iyang rason mobalik ra gihapon sa mga sumasakay pinaagi sa ilang unit nga sakyan nga roadworthy kanunay.

Hinuon, ipaagi man kining tanan sa public hearing ug maglaum ko nga magkasabot ang tanang sektor nga way madehado kay nimahal na ang tubig, kuryente, pagkaon ug matrikula unya ang suweldo permanenteng bitay.

Dili pa ni igong katarungan nga duna nay “supervening conditions” aron maka-isyu og wage order ang Regional Tripartite Wages and Productivity Board?