Salawayong pari

Makapatagam, makapahi-ubos ug sagpa kaayo natong mga sakop sa Simbahang Katoliko ang paagi sa pagpangasaba ug pagpakaulaw ni Fr. Romeo Obach ngadto sa 17-anyos nga single mother nga nagpabunyag sa iyang anak niadtong Domingo sa Sacred Heart Chaplaincy diha sa Jagobiao, dakbayan sa Mandaue.

Kun tumong sa pari nga ipasilsil sa alimpatakan ngadto sa menor de edad nga inahan ang insaktong pagtulon-an sa Simbahan, iya untang gi-one-on-one ug iyang gipakompisal sa wa pa ang seremonya sa bunyag.

Sa sitwasyon nga iyang gipakauwawan pag-ayo atubangan sa tibuok pamilya, sa mga sponsors, mga silingan ug mga classmates gamit ang mga bastos nga mga pulong, butang kini nga angayng imbestigahon sa mga kadagkoan sa Simbahan ug angayng hinuktokan ni Padre Obach kun anaa ba sab siya sa insaktong panghuna-huna.

Ingon ani na ka bastos ang atong kaparian?

Wa gyud ko makasabot nganong dunay mga pari nga moinsister sa pagka-arogante ug pagka-suberbiyo nga unta ang Ginoo wa man mag-ingon ani.

Pagkasakit gyud paminawn nga nadunggan sa mga ginikanan sa 17 anyos ug mga bisita ang mga pulong sa pari nga nagkanayon nga “Kamo, kamo, kamo ….mosunod mo aning ____? Pataka lang og bikangkang sa laki. Dili siya normal, abnormal siya, Yabag ni siya.”

Dugang mga quotes: “Mga babaye, ayaw mo pagsunod sa hiwi nga binuhatan sa kalibutan, nga mosugot lang mo nga modug og lalaki nga di pa ninyo bana. Ingon ana ba diay ang atong pagtulon-an sa simbahan? Kaning bata, wala ni sala pero ang mga babaye ug lalaki nga makigdu’g nga wala pay kasal, maoy nagpuyo sa sala.

Mapasa usahay sa bata ang disgrasya. Hinaut pa nga dili kay naghappy-happy ug naglingaw-lingaw mo, kay naay bata. O grasya ni pero nabuhat ni siya sa sala. Wala ni siya buhata sa…

“Naminyo ba ka, Day? Nakasal ka ba? (inahan milingo-lingo) O, tan-awa, angayan ba ni? Maayo ba ni siya nga Kristiyanos? Ipanghambog ba nato ni Day? Nga naa kay anak nya wa kay bana? Kaulaw ani, Day. Motago gani unta ka karon, kay naa kas simbahan kay makaulaw kay nagpabunyag ka nga wa kay bana. Nakigdug ka og laki nga di nimo bana.

“Nakadungog ka nako Day? Di ka mauwaw? Dako kaayo nang uwaw. Nya kamo, mosunod mo? Mobikangkang mo sa laki nga mokuhit ninyo? Mao na nga makauuwaw ni. Ikaw gibunyagan ka pero wala nimo tumana ang imong mga saad sa bunyag. Hinaut kining bata motubo nga motuman sa iyang saad sa bunyag. Ikaw magmatuto ani…bisag hiwi ka, yabag ka, hinaut pa nga naay uban motabang para dili mayabag ning bata sama nimo nga dili mosunod sa pagtulon-an ni Kristo.”

Haskang uwawa gyud nga kasinatian sa batan-ong inahan nga wa pa makasabot sa direksiyon sa iyang kinabuhi nga usa pa ka estudyante sa kolehiyo unya biniyaan sa uyab unya gidabodabohan pagkasaba sa pari atubangan sa tanan.

Unsang klaseha sa pagkapari si Fr. Obach? Pari pa ni siya? Pakauwaw ra man tawn ni siya oy sa pari sa Redemptorist.

Kining batasana way kalainan niadtong mga pari nga dili momisa sa mga namatay nga naghikog ug niadtong mga pari nga dili mosabot sa tagtungod sa minatay nga ma-late og abot sa Simbahan.

Wa sab siyay kalainan sa mga pari nga dili mopakalawat niadtong mga magbabalaod nga niuyon sa Reproductive Health bill.

Ang papel sa mga alagad sa Simbahan mao ang pagtabang sa mga tawo nga nagsalimoang aron mahilangit, dili kay samutan ang pagkagumon sa sala.

* * *

Daghang nalingaw ug daghang nasuko kang Cebu City Mayor Michael Rama sa iyang gipahigayong “Fun Walk Through” kagahapon sa kadlawn uban sa iyang mga opisyales sa City Hall gikan sa dalan Gorordo hangtud na sa Salinas Drive, Lahug.

Ang mga nalingaw mao kadtong nangreklamo sa kahuot sa dalan ug agianan sa tawo kay dunay mga vendors nga namaligya sa daplin o ba kaha gihimong extension ang sidewalk sa mga panimay daplin sa kalsada.

Pero daghan ang nagbagulbol ug gani dunay mga nihingan og dili maayo ngadto kang Mayor Rama dihang gipaguba gyud ang mga nakaali sa dalan ug gipangangklahan ug gipang-tow ang mga sakyanan nga gapasagad ug parking.

Lakip sa gipangbira mao kadtong mga ATM o Automatic Tubig Machines nga delikado sa panglawas sa katawhan.

Alang nako, ang gihimo sa mayor usa ka maayong lakang aron hapsay ang atong kadalanan ug agi-anan.

Apan dili sab maayo nga talikdan niya ang problema sa mga vendors nga nanginabuhi intawn nga way puwesto. Busa hatagi intawn Mayor Mike, kay panginabuhi baya kini nga tinarong!