Suporta sa bike lanes

Mas makaayo gyud sa tanang motorista nga dunay i-designate nga “shared priority bike lanes and bike-friendly zones” sa atong mga kalsada.

Kini tungod kay aron mahimong responsable ang tanang magbisekleta ug pang-silotan kadtong mga abusado nga momaniho sa bisikleta.

Sa ordinansahon ni City Councilor Nida Cabrera bahin sa “bike lanes or Tindak Sugbo Lanes Ordinance”, akong nasabtan nga gawas sa pag-promote sa healthy environment, healthy lifestyle ug pagdaginot sa gasolina, naglatid usab kini ug mga dagkung multa gikan P500-P3,000 niadtong mga malapason.

Akong klarohon nga pinasikad niining ordinansahon silotan na kadtong magdala ug bisikleta nga hutdon pag-okopar ang tibuuk kalsada or kadtong mag-ikis-ikis pagpadagan.

Pamultahon na sab kadtong mga bikers/cyclists nga mag-bisikleta nga maka-inom/hubog.
Silotan na sab kadtong mga cyclists/bikers nga magpahambog sa kalsada nga morag “circus” nga mag-exhibition.

Apil nang silotan kadtong mag-bisikleta nga way insaktong brakes, way lights, way reflector ug kadtong dili magsul-ob sa mga safety gear.

Dili na sab mahimo nga mokapyot o mogunit sa laing sakyanan ang mag-bisikleta.

Nalipay ko nga under study pa kining maong ordinansa kay duna lang ko’y idugang ngadto ni konsehal Cabrera nga mas maayong dakpon kadtong mga magbisikleta nga dili motuman sa mga traffic signs.

Kay bisan ang akong mga bisita niadtong Sabado sa programang “Dialogue On The Air” nga sila si Atty. Rafael Yap sa CITOM, Jay Garganera sa Tindak Bisdak, Tindak Sugbo, Cebu Folding Bike Society ug Joel Lee sa Tindak Sugbo and Permaculture Society of the Philippines miangkon gyud

nga duna pay daghang mga abusado nga mag-bisikleta.
Ang uban nga mag-bike mopadagan bisag “stop signal”. Ang uban way respeto sa “No Entry, No-Left Turn, No-Right Turn ug No-U-Turn” signages.

Si Atty. Yap miingon nga dili sila kadakop kay ma-consider nga pedestrian ang mag-bisikleta kay wa may motor ang bike.

Pero akong gipasabot nga tawo man gani nga magpasagad ug labang dakpon man gani subay sa “Jaywalking Ordinance” unsa kaha ang magmaniho’g bisikleta nga magpasagad paglabang nga risgo kaayo.

* * *

Ako’y nausikan kang orthopedic surgeon Cris Cecil Chan Abbu nga gipusil patay sa iyang pasyente nga si Wilfredo Sabonsolin sulod sa iyang clinic sa Sacred Heart Hospital.

Na-anugnan ko sa iyang pagkawala kay akong nahibaw-an nga daghan kaayo siya’g natabangan nga mga pobre’ng pamilya nga iyang na-serbisyohan.

Pagkadaghan pa seguro untang mga kabus ang matabangan ni Dr. Abbu sa iyang pagka-buotan ug pagka-maayong doktor.

Dili nalang ko mobasol sa mga guwardiya nga na-inutil nganong nakasulod ang armas ni Sabonsolin kay way magdahom nga pinusilay ang tuyo sa klinika kun dili mao ang magpa-tambal.

Bisan unsaon, ang tawo nga naghuna-huna sa paghimo’g krimen mangita gyud ug paagi aron molampos.

At least maghatag na gyud kadto ug leksiyon sa tanang profession nga direktang nangalagad sa katawhan nga nagpas-an ug dagkung problema.

* * *

Sibaw na kaayo ang estorya sa amo sa Casay nga ang kanhi Argao Beach Club nga anaa nahimutang sa Sitio Dakung Balas Casay Dalaguete napalit na sa taga Waterfront Hotel.

Wa ko’y oras pagkompirmar sa estorya kay sa tinuod lang anaa ko karon dinhi sa Argao Beach Club naghimo ning maong lindog kay nakigpangaligo intawon ang akong mga igsoon nga sila si Manang Emma ug si Inday Salvacion nga mo-uli na sa Iceland ugma gikan sa paghipos sa among pinanggang inahan.

Nakahigayon kami sa paglibot sa kanhi ilado kaayo nga Argao Beach Club ug nahamdom pa ni Nang Emma ang kanindot niini niadong 1984 kay naka-check-in sila kaniadtu uban sa iyang kapikas nga si anhing Kuya Sigurdur ug sa ilang anak nga si Blingur.

Sa tinuod lang sayang gyud kaayo ang Argao Beach Club sukad kini napasirad-an.

Kung tinuod man nga napalit sa taga Waterfront Hotel gikan sa Philippine Tourism Authority (PTA) hinaut nga wa maapil ang sikbit nga Dalaguete Public Beach nga kawsa namong Dalaguetnon nga magpabilin ang lugar nga among salom-saloman.

Apan di ko makatoo nga napalit sa Waterfront Hotel. Kung nindoton pagbalik tingali ipaagi sa Public-Private-Partnership (PPP).

Ikalipay gyud namong taga- Dalaguete kung ablihan pagbalik ang Argao Beach Club aron buhi na sab ang negosyo sa among lugar ug aron molambo kaming mga Casaynon.