HPG-7 namaligya sa mga impounded vehicles?”

Haskang  grabeha  gyud  ka  mangtas sa pangwarta sa  taga Highway Patrol Group (HPG-7)  kaniadtu kung tinuud  man ang  mga alegasyon  sa  mga  nikiha  nga  ang mga impounded vehicles nga kinarnap ibaligya  sa  mga  kanahan unya sila ra sab  ang  manakop.

Si  NBI-7 Director  Max Salvador mitug-an  sa  ako-a  nga duna  pay laing kihante   ang  magpatabang  sa  ilang  opisina  kay  biktima sab sa mga kabuang sa  taga  HPG-7  niadtong  panahon  ni Supt. Romualdo Iglesia ug mga kaubanan  nga maoy  gipangkasohan  sa pag-ambush  patay nilang Atty.  Noel  Archival.

Way  kalainan  sa  sirkumstansiya sa  kasong  carnapping batok nilang HPG-7 officer SPO4 Edwin Galan ug HPG-7  confidential  agent Mario Saycon  diin  ang kihante  kanhi  project   engineer  sa Petronas  Energy  Philippines Inc.  nga  si  Reynaldo  Tan kinsa   nakapalit ug  Toyota Revo  gikan sa  iyang gipangkiha.

HPG gyud! Hesus –  Puwera – Gaba kung tinuud  man!

* * *

Magpasalamat  ko nga mipagawas   ug kamanduan  si DENR Secretary Ramon Paje nga nag-revoke sa mga na-isyu nga permit sa  pagpamutol sa mga century- old acacia trees  gikan  sa dakbayan  sa Naga paingon sa Carcar City.

Nagpasabot kini nga wa nay  mahitabong pinutlanay hangtud dunay third opinion sa tinuud  nga  kondisyon sa  mga  dagkung kahoy.

Akong  subli-on  nga  dili ko supak  nga  pangputlon  ang  mga puno-an sa mga  acacia  nga  dunot ug  katumbahon  na gyud  nga maghatag  ug risgo  sa kinabuhi natong  mga  motorista ug  mga  pasahero.

Ang ako  lang gyud nga  maklaro ug  ma-establish sa  mga  eksperto  kung unsang  mga puno-an nga angay’ng  tag-on.

Ang  nakapa-usab sa  akong baruganan sa  maong  isyu  nga angay’ng  hunongon una ang pagpamutol,  dihang  miingon sa  akong interview si  Eddie Llamedo tigpamaba sa DENR-7 nga  lima (5)  ra ug dili pito (7)  ka  puno-an  ang  tag-on  diha sa may Naga nga  habig  nga  naka-schedule niadtong  August 5 kay ang duha (2) ka punoan puwede pa’ng ma-rescue. Nagpasabot  nga  wa gyud diay maklaro  sa  taga  DENR kung  unsay  mga  tago  ug dunot  nga  mga puno-an.

Akong   subli-on  ang akong baruganan  ning  maong isyu nga  dili  urgent ang  pagpamutol  sa  mga   kahoy taliwa   niadtong dunay  mga nangatumba.

Usik  gyud  kaayo  nga magpasagad  kita  sa pagpamutol sa  mga  kahoy nga  daku  kaayog  ikatabang sa  atong  eco system.

Kung   magsige    nalang kita  ug  pamutol  sa gatusan ka  mga puno-an kada adlaw  taas  sab kaayo  ang sakripisyo  sa mga pasahero unya  dili gyud  sulbad sa problema sa  traffic.

Akong  subli-on nga   ang  labing  maayo nga  makasulbad  sa  hingpit  paglikay nga  maputol  ang  mga acacia   ug  mapalapad  ang  kalsada mao  nga mangita  ang gobyerno  ug  laing  mga yuta nga adto ipaliko  ang national road.

Kay  sa  tinuud   lang  maglisud  na gyud  ang  gobyerno  pagpalapad  sa existing road  gikan saTinaan  Naga,  San Fernando to Carcar tungod sa mga acacia  trees, unya dunay  mga  panimay ug mga commercial establishments.

Kung  seryoso  ang taga Department  of Public Works and  Highways (DPWH)  pagtutok  sa  problema  sa  kagamay sa  mga  kalsada   kinahanglang  bukas ilang mga huna-huna  pagpangita  ug  mga  luna  nga  ablihan  ug  lapad  nga  kalsada.

Maglaum  sab ko   nga  kasaligan   gyud  si Dr. De Guzman sa  UP  Los  Baños kinsa maoy tree pathologist  nga  maoy mosubli  pag- eksamen  sa  mga  puno-an.

Magpasalamat sab ko  nila ni Dondon  Dimas  sa  Inter  Mountaineering  Society ug  sa  Inoburan resident  nga si Lito  Labore nga nangatkat sa puno-an agig protesta sa pinutlanay nga maoy  hinungdan  nga  wa matiwas ang  pagpamutol sa  mga  kahoy nga binuhatan sa  taga DPWH-7, DENR-7 ug mga local officials.

* * *

Subo  gyud kaayong  palandungon  ang gibutyag ni  Atty. Hemeno Palamine Regional Director  sa Bureau of  Internal  Revenue  nga  dunay  iyang  mga kompanyero ug  kompanyera nga mas  gagmay  pag binayran sa  buhis  ikomparar  sa  mga  yanong  trabahante.

Ang  nakaporke  pa  gyud  kay  matud  pa,  mga  beteranong  abogado     pa gyud nga  wa  niya  panghinganli.

Ang  akong  ponto ba nganong  naabot  man niining  panahuna ang paugat sa mga  veterans lawyers? Nahadlok  ang  taga  BIR pagkiha  ug tax evasion  kay  mga  abogado  ilang  kontra?

Nagpasabot  kini  nga  ang ilang  masayon-sayon  paggukod mao ang mga less privileged nga  hut-ong  sa katilingban?

In fairness  sa  atong  mga  amigong  abogado,  mga  doctor,  mga enhenyero ug  ubang  mga  professionals nga nag-practice sa  ilang  profession basig  way  taga  BIR   nga  nagsige paningil sa  buhis  ug  way  nakatudlo  sa  mga paagi  nga dili  kaayo  hasolan sa ilang  mga patakaran.

Sa  tinuud lang, sa  sestema  karon sa  BIR,  kita  pay  mobayad unya  kita pay  mahasol.

Hinaut makapangita  sila ug  paagi nga  mahamugaway  ang  tanang  mobayad  sa  obligasyon sa gobyerno.

* * *

Mahibaw-an  karong adlawa  kung  “sufficient in form and  substance”    ang   impeachment  complaint batok  kang  presidente  Noynoy Aquino atul  sa  hearing  sa  House  Committee On  Justice.

Pero  mangambot  lang  ko  kung  mo-prosper  ba gyud  ang pagpalagpot sa  presidente  kay   gani  dunay   tinguha  karon ang iyang mga  kaalyado  nga palugwayan   ang  termino  sa  presidente pinaagi  sa   pag-amendar sa  1987  Philippine Constitution.

Dili  imposible  kining tinguha  ni Caloocan Representative Edgar Erice  nga  wagtangon  na ang  term  limit  sa  presidente nga  nagpasabot  nga pinaagi  sa pag-usab  sa  batakang balaud  puwede  nang  makalansar  pagbalik  si Pnoy.

Pero  nasayod kita nga dili sayon ang  pag-usab  sa konstitusyon. Busa  dili  angayang  maalarma  ang  ubang  supak  sa panawagan sa  social  media  nga “One  More Term For Pnoy”.

TAGS: