Ebidensya gigamit para sa pamilya

Pagka wa gyu’y ayo sa tulo ka mga police officers nga nahimong mga kanhi hepe sa Theft and Robbery Section (TRS) sa Cebu City Police Office nga migamit sa awto nga impounded vehicle.

Bisag moingon pa sila nga igo ra nilang gigamit sa ilang mga police operations ang awto nga Mitsubishi apan dili gyud gihapon justifiable kay klaro kining kasupakan sa Code of Conduct and Ethical Standards gawas nga naka-violate sila sa police regulations.

Pero ang grabe ka bagag nawong nilang tulo kay si Chief Inspector Noli Cernio kay bisag wa na siya sa TRS, iyang gidala ang awto sa Punta Princessa Police Station diin siya maoy hepe.

Unsa ka tinuud nga gipa-service ni Cernio ang maong sakyanan sa iyang pamilya? Unsa ka tinuud nga iyang gi-aplayan ug rehistro sa LTO aron ma-iya na? Dili ni kawat kang Cernio?

Naa pay hinanggaw nga argumento ni Cernio nga kuno ang sakyanan wa niya gamita ug didto ra sa shop. Haskang buanga no nga bisag dili siya maoy tag-iya iyang gigastohan ug gipa-shop.

Sila ra kaha si Cernio ug ang taga HPG ang mihimo niini?

Kinahanglang manubag sab sila si Inspector William Alicaba ug Senior Inspector Elizandro Quijano mga kanhi hepe sa TRS kay nakapahimolos sab.

Nagpaila lang gyud kung unsa ka garapal ning mga pulisa.

Naka-ako gani paggamit sa sakyanan nga makit-an ug mailhan sa tag-iya, unsa kaha sa ubang mga ebedensiya nga gagmay ug sayon rang mataguan nga ubos sa ilang custody sama sa kuwarta, alahas, shabu, armas ug uban pa?

Kinahanglang mohimo ug inbentaryo sa mga ebedensiya si Cebu City Police Director Noli Romana ug ang tanang dagkung opisyal sa PNP.

* * *

Maayo nalang gani kay aduna pa gyuy mga tarong nga pulis, sama niadtong namatay ug naangol intawn samtang sa usa ka anti-drug operation sa Poblacion, Tagbilaran City, Bohol.

Puwerteng paita gyud sa kamatayon ni PO1 Michael June Ejoc ug ang pagka-angol nila ni PO1 Reynan Tagotongan, PO1 Carlito Gamalo ug PO2 Judito Jasmin niadtong Huwebes sa buntag.

Akong na-picture out ang scenario nga morag manok nga gipang-ihaw ang atong mga pulis sa drug personality nga bag-ong nakagawas sa New Billibid Prison nga si Bejun Tari.

Haskang paita gyud kay wa gani makatuyo ang mga pulis kang Tari ug nakasibat pa dayon ang kanahan gamit ang motorsiklo.

Sa pagsuwat niining maong lindog pabiling critical ang tulo ka mga pulis.

Lisud kaayong tuho-an ang version nga biktima lang sa “set-up” ang mga pulis nga gipa-responde batok sa mga nag-pot session sulod sa usa ka bay.

Ang klarong estorya niini mao nga resulta gyud kadto sa tira pasagad sa atong kapolisan ug gi-underestimate lang si Tari.

Pero bisan pa man nga na-ingon ato ang ilang kahimtang, magpasalamat gihapon ta kanila kay usa kadto ka timaihan nga wa mahalin silang upat sukwahi sa ubang lugar nga mangyugpos nalang ang atong kapolisan batok sa mga drug personalities.

Maglaum ko nga di intawon pasagdan ang mga biktimang pulis sa ilang mga kadagkoan.

Manghinaut ko nga makabawos ra ang atong kapolisan nga mga tarong sa labing dali nga panahon.

* * *

Natinga gyud ko nganong misamot kadaghan, daw samag uhong nga miturok ang mga balay luyo sa among complex sa GMA-7 nga unta gidid-an man sa mga guwardiya ug mga opisyales sa Kapitolyo ang pagpasulod sa mga housing materials.

Unsa man, nahalin na ang mga guwardiya nga gipabantay? Kumusta naman si Loy Madrigal kinsa gireklamo kaniadtu tungod sa ka strikto?

Ang mga nakapuyo na diha sa Groto sulod sa VISCOM View Park, nangreklamo man gani ni Madrigal kaniadto kay bisag usa lang ka pligo nga plywood ilang bitbiton nga ipuli sa nadunot nga gitabil-tabil, babagan man gani.

Ug dihay mga insidente nga gipaguba ni Madrigal ang pipila ka mga illegal structures. Naunsa naman ni karon nga nabugnaw man si Madrigal?

* * *

Mangambot lang ko kung wa ba pasudla sa laang si Cebu City Mayor Michael Rama nila ni kanhi city mayor ug former Cebu City south district representative Tomas Osmeña ug mga kaalyado sa BOPK sa pag-uyon na sa pagbaligya sa 45 ektarya nga lote sa South Road Properties (SRP).

Malipay ko kung seryoso ang kampo ni Osmeña nga mo-consider sa duha ka mga nindot nga options ni Mayor Rama nga mao ang pagbaligya na ug todo sa SRP ug ang pag-avail ug loan sa Land Bank of the Philippines aron pag-reconstruct sa atong nahibiling utang sa Japan International Cooperation Agency (JICA) pagtukod sa SRP kaniadto.

Kung nagtan-aw ang taga BOPK sa kaayohan sa dakbayan, dili sila masigeg babag sa maayong katuyuan ni Mayor Rama.

In fairness hinoon ni kanhi Mayor Osmeña nindot man sab ang iyang proposal nga ipa-agi ug kada tuig ang pagbaligya ug tag 5 hectares kay paspas man sab ang pagmahal sa market value ilabina nga anaa karon diha ang SM ug Filinvest.

Pero magbantay si Mayor Rama niining mga proposal kay basig pasakay lang aron himoon siyang inutil sa kaulahian.