Pulis na sad ang suspect?

Laing labad sa ulo sa kapolisan kadtong pag-ambush sa negosyante nga si Jonathan Emmanuel Go uban sa iyang anak niadtong Lunes sa buntag diha sa may Happy Valley.

Ambot lang kung kaya ba nilang sulbaron nga lisod kaayong ilhon ang duha ka mga responsable kay dili maklaro ang kuha sa CCTV camera.

Negosyo ug personal grudge ang gisubay nga motibo. Apan ang asawa nga si Hazel namahayag nga way kontra iyang bana.

Hinuon posibleng way nahibaw-an ang asawa pero ang mas labing nasayod mao ang biktima.
Ngan nga gipusil duna gyud siya’y kontra.

Dunay mga nanggawas nga istorya nga hired killer ang mipusil ni Go apan lisud pa kaayong tugkaron.
Migawas sab ang mga pagduda nga pulis ang usa sa mga assailants.

* * *

Mihimo ug katin-awan kagahapon si Cebu City Prosecutor Nicolas Sellon nga seryoso na gyud siya’ng mobiya ug mo-retiro sa iyang katungdanan sunod semana.

Gani matud niya iya nang giduso ang iyang application for retirement niadtong miaging buwan.
Wa siya’y i-designate kung kinsay himoong officer-in-charge kay depende na sa mga kadagku-an sa Department of Justice.

Usa sa mga lig-ong katarungan ni Sellon nganong mo-optional retirement siya tungod kay aron iyang kahatagan ug higayon ang iyang kaugalingon nga maka-relax sa dili pa mag-private practice.

Akong nahibaw-an nga parehas ra sab ang retirement benefits nga iyang dawaton bisag mo-avail siya sa mandatory age retirement nga 65.

Ang nindot nga rason ni Sellon nganong mo-retire siya tungod kay aron kahatagan ug higayon ang iyang mga sakop nga kuwalipikado nga makahupot sa iyang biyaan nga katungdanan.

Maglaum ko nga way mahitabong binunlotay sa buhok sa mga lady prosecutors nga interesado sa pwesto.

* * *

Dunay usa ka opisyal sa dakbayan sa Sugbo ang mipadayag kanako nga dili gyud siya makatoo nga mo-abot ug 30 million pesos ang pag-construct sa bag-ong building sa Cebu City Civil Registrar’s Office nga anaa sa luyong bahin sa Cebu City Health sa Barangay Carreta ning dakbayan.

Iyang gipadayag nga gamay ra ang maong building unya dili pa gyud kaayo pulido ang pagkahimo.

Akong naadto ning maong building apan in fairness lisud paghimo ug estimate ngan nga dili ko expert ug dili ko civil engineer.

Pero nasayod ko nga pwerte na gyu’ng mahala karon sa mga construction materials.

Apan alang nako mas maayong subayon kini sa mga eksperto aron dunay katagbawan ug matubag ang mga pagtahap.

* * *

Unsa kining away tali sa mga kapitan sa Barangay Calamba ug Barangay Labangon bahin sa palpak nga garbage collection sa ilang mga utlanan?

Si Labangon Barangay Captain Victor Buendia wa na maka-antos ug nagpakitabang na sa Cebu City Hall nga maka-intervene sa iyang reklamo kang Calamba Barangay Captain Maria Yvonne Feliciano human nga wa gyud manumbaling sa problema.

Alang nako, dili naman siguro angay’ng lalisan kay pwede man sila mag-Bayanihan kay silingan ra.
Kung commercial establishments pa siguro ang gitukod sa mga lugar nga anaa sa mga utlanan, mag-ilog pa ning mga kanahan! Basura man unya baho pa mao nga magtulod-tulod.

Ang nakanindot, gi-angkon ni kapitan Feliciano nga dili gyud sila maka-pick-up sa mga basura kay dunay mga higayon nga guba ang ilang garbage truck.

Ang panguta nganong magsige man ug kaguba? Kinsa may nakaguba?

Kumusta naman kadtong ilang lady councilor nga nag-negosyo ug buy and sell sa mga scrap metal ug ubang mga recyclable materials nga maabot pa sa amo sa GMA-7 complex nga migamit sa garbage truck sa Barangay Calamba pag-karga sa iyang mga pinalit?

Na-imbistigahan ba kadto sa Cebu City Council kinsa dunay disciplinary power sa mga mapahimuslanon nga mga opisyal sa Barangay? O gipasagdan nalang kay sakop sa Team Rama?

Nagsige pa ba gihapon pagpahimolos sa truck sa Barangay si konsehala?