Thoughts on the birthday boy

By: Gerard Pareja November 11,2014 - 09:30 AM

NyorGamay (NG): Nyor, nganong gauna pa man gihapon si Binay sa survey sa mga presidentiables para 2016 bisan pa man kon gibirahan na siyag maayo sa senado?

NyorDaku (ND): Niadtong milabay nga semana nyor misuroy mis dakbayan sa Mandaue diin may nasugatan kaming bata sa may parke nga gayaka tupad sa plangana diin galanguylanguy ang mga gagmay niyang isda nga iyang gipamaligya alang sa mga dunay aquarium o kaha maghimo pag aquarium.

NG: O, unya?

ND: Among gihangyo ang bata nga padakpon og usa sa iyang mga isda para makakuha kamig hulagway niya nga nagkupot og isda. Apan naglisud siya pagdakup sa mga isda. Kon makuptan man gani niya ang usa kanila, mabuhian dayon niya kini nga wala pa mi maka click sa among camera. Wala kami klarong hulagway sa bata nga nagkupot sa isda.

NG: Mao ba Nyor? Pero unsa may labot ning maong bata sa paggukod sa senado ni Binay.

ND: Ang senado sama ra kanamo nga wa makakuhag maayong hulagway sa bata nga nagkupot sa isda. Wa silay documento nga mopakita nga gikuptan karon ni Binay ang iyang kinawat. Wa silay mapakita nga ebidensya nga nangawat si Binay. Daghan ang gatuo nga dakog naigo si Binay sa pagtukod sa Makati City Hall building 2. Daghang gatuo iya kadtong hacienda nga dihay giingong air conditioned piggery pero wa man nila makuha ang prueba. Gilaay na ang mga tao. Gani ang numero uno nga tigpaghut sa senado nga si Miriam Defensor Santiago mihangyo man undangon na ning ilang pagimbistigar ni Binay.

NG: Ang ako usab nga gikatingad-an kon nganong wa gyud mokunhod sa 20 percent ang iyang popularity rating.

ND: Niadtong usang tuig Nyor, dihay dakong sunog sa laing dakbayan. Mihunong ang kayo sa tugkaran sa kapilya diin si Senyor Santo Niño ang Patron.

NG: O unya?

ND: Dili na matandug ang pagtuo sa mga naluwas sa sunog. Walay basketball court sa Mormon, bugas sa Iglesia o pusil sa ISIS nga makapausab sa ilang hugot nga pagtuo sa ilang patron nga alang kanila maoy nagluwas kanila niadtong maong sunog.

NG: Pagkadaghan ba sab nimog pasumbingay Nyor! Unsa man say connection ani ni Binay?

ND: Kaning giingon nimo nga 20 percent nga rating ni Binay nga di na gyud mokunhod mao kini ang mga tao nga nakautang og kabubut-on kaniya. Apil kini sa mga tao nga iyang natabangan sa ilang kalisud. Kusog kaayo ang utang kabubut-on alang sa mga Pilipino. Mao nga bisag unsa pang sayop ang imong ihapak kang Binay dili na matandug kining mga tawhana sa pag suporta kaniya.

NG: Ngano man ni Nyor?

ND: Tungod kini kay wala kitay economic independence. Kanunay kitang gasalig og padrino, godfather, landlord ug uban pang mga big boss. Ang bagang panun sa atong katawhan dili makalihuk kon way panabang. Kon kinsa kadtong motabang kanila maoy ilang sundon. Sa kadugay nas iyang political career giingon nga daghan na siyang nabulsa ug nga daghan na usab kaayo siyang natabangan.

NG: Paita Nyor. Sa ato pa, wa na gyud tay eskapo aning Binay.

ND: Naa pa man Nyor. Ang pinakasayong paagi mao nga si Trillanes, Cayetano, Roxas, Lacson ug Escudero mopaluyo na lang ni Grace Poe. Kay kon tipuntipunon ang ilang mga puntos, malabwan ra man nila si Binay. Kay kon magbinagsa sila labhan ra sila ni Binay. Unya mura ra ba og misaka ang puntos ni Binay gahapon.

NG: Ngano man Nyor?

ND: Birthday man niya.

Your subscription could not be saved. Please try again.
Your subscription has been successful.

Subscribe to our daily newsletter

By providing an email address. I agree to the Terms of Use and acknowledge that I have read the Privacy Policy.

Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: comedy, Jejomar Binay, politics

We use cookies to ensure you get the best experience on our website. By continuing, you are agreeing to our use of cookies. To find out more, please click this link.