Kining pagsulbad sa problema sa traffic susama ra kini sa baha. Dili igsapayan kung “band aid solution” ang nahuna-hunaan nga paagi. Ang importante nga makatabang sa pagsulbad ug dunay alibyo.
Mao nga anaa akong simpatiya ngadto ni Mayor Mike Rama human gibasura sa konseho ang iyang gi-propose nga P70 million budget alang sa dredging ug de-clogging sa mga sapa ug ubang agi-anan sa tubig kay makatabang man gyud kini.
Dili sayon ang pagpatuman ug “long term solution” kay gawas nga langay, nagkuwang kita sa budget ug dunay mga negosyante nga mapagan.
Sayon ra kaayong estoryahon ang pagpalapad sa mga kalsada pero haskang lisuda himoon.
Mao nga kining proposal ni kongresista Raul Del Mar nga nagpalabang ug mga balaudnon nga mag-construct siya dinhi sa dakbayan sa Sugbo ug mga subways ug mga skyways butang kini nga angay’ng suportahan.
Kanus-a man kita mo-adopt ug susamang paagi sa ubang mga lugar? Unya na kung mangababoy kita sa kalsada?
Wa gyud koy supak kung ipadayon sa mga Gullas ang ilang nahuna-hunaan nga mag-construct ug LRT kon Light Railway Transit ilabina kung paabton didto sa amo-a sa Dalaguete kay makasapot ang traffic diha sa Naga, San Fernando ug Carcar ilabina panahon sa kalag-kalag.
* * *
Pagka-iresponsable ug pagka-way ayo ni Bulacao Barangay Captain Raul Cabanero sa dakbayan sa Talisay.
Paka-uwaw lang! Kanus-a man siya mo-resign pagka-presidente sa Association of Barangay Councils (ABC) sa Talisay City?
Ang wa niya pagtabang sa mga ahente sa National Bureau of Investigation (NBI) nga mi-ronda sa mga nalambigit sa drugas sa iyang barangay maoy tubag nganong lisud sumpoon ang drugas sa Talisay ilabina sa iyang nataran.
Nagpasabot ba kini nga may direct participation na ang mga local officials sa illegal drugs operation? Dili kaha protector ang kapitan?
Unsa may action sa mga sakop sa Cebu Provincial Board ug sa taga Department of Interior and Local Government (DILG) batok sa kapitan kinsa inay motabang sa NBI, nag mah-jong man hinuon ang kanahan?
Lisud ning mga opisyales sa gobyerno nga magpa goryo-goryo sa kampanya batok sa illegal nga drugas.
* * *
Wa gyud ko magdahum kang Paul Elmer Clemente nga maoy itudlo ni presidente Noynoy Aquino pagka Deputy Ombudsman for the Visayas.
Mas nagtuo pa ko sa tulo ka mga Sugbo-anon nga mga contenders nga sila si Judge Geraldine Faith Econg, Ombudsman Director Carla Juris Narvios – Tanco ug COA Chief Executive Staff Gilbert Kintanar.
Way salig si Noynoy sa mga Sugbuanon kay kaila ra ang mga complainants ug respondents?
Hinoon mas maayo sab nga estranghero ang atong Deputy Ombudsman aron way rason nga duna siya’y labanan.
Pero ang kuyaw lang kung motan-aw gihapon sa utang kabubut-on sa partidong Liberal Party ang bag-ong Deputy Ombudsman. Dili kaha siya magpakamang sa taga administrasyon?
Misugod na siya kagahapon paglingkod. Atong tan-awn kung dili ba siya ma-impluwensyahan sa mga mosunod nga mga adlaw.
* * *
Daku gyud ang posibilidad nga dunay foul play ang kamatayon ni PO1 Heidi Garcia ug wa kini maghikog kay negatibo sa gun powder residue ang iyang mga kamot basi sa resulta sa paraffin test.
Kung gidul-it ni PO1 Garcia ang armas pagpabuto ngadto sa iyang dughan, imposible kaayo nga mag-negative sa paraffin test.
Dili sa ingon nga namasangil ko ni PO1 Cyrelle Marie Bayate nga maoy namusil kinsa negative sab sa paraffin test apan ang kapolisan well-trained sab unsaon pagpa-negatibo sa paraffin test.
Sa napatay nga policewoman, wa nay oras sa pagpanghinaw.
Ang kabanay sa namatay nga policewoman, mihangyo kaniadto sa mga nag-imbistigar nga apilon sa pagpa-paraffin test ang amahan nga pulis ni PO1 Bayate.
Apan natinga nalang sila ug nasagmuyo kay wa matuman ang ilang hangyo. Ang bana nga pulis ni PO1 Garcia nga si PO1 Roy Garcia nagtinguha nga modangop sa NBI aron magpatabang kay way salig sa dagan sa imbestigasyon.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
