Sa ako lang basa aning mga Republican sa America, murag mahiligon kaayo ni silag gubat.
Ang nakaparat lang kay ang tinubdan unya ani ilang bag-ong pakig gubat –showbiz.
Gipasanginlan karon sa US ang North Korea nga maoy gapasiugda niadtong pag-hack o pagpangutingkay sa computer sa Sony.
Ang ilang gipasangil nga hinungdan kon nganong gihimo kini sa North Korea mao ang usa ka pelikulang comedy nga hinimo sa Sony.
“The Interview” ang title ning maong sipat nga pelikula nga kabahin sa duha ka interviewers ni Kim Jung-un nga duna diay plano nga mopatay kaniya.
Napuno sa bugalbugal kang Kim Jung-un ang maong pelikula mao nga nasuko ang North Korea niani. Nagkanayon ang tigpamaba ning maong nasud nga ang gobyerno sa US miapil og paluyo ning maong salida.
Wala hinuon moangkon ang North Korea nga sila maoy ni hack sa files sa Sony bisan pa man og nasuko sila sa maong pelikula. Hinuon ni-warning sila sa America nga kon magpunay kinig pasangil nga sila maoy nang hack sa Sony ilang gubton ang White House, Pentagon ug ang tibuok America.
Kon tinuod mga may kalabutan ang America kabahin ning maong sine ug tinuod nga gi hack sa North Korea ang Sony ug nga mao kini hinungdan kon nganong dili na mopasalida ang mga sinehan niani, daw susama ang America sa usa ka bata nga gidukol human kini mang labtik sa dunggan. Way sukod sa baws.
Gibasul ni Obama ang Sony kun nganong nag tinalawan kini ug wa na kini mopasalida sa maong pelikula. Apan mitubag ang Sony nga dili sila maoy tag-iya sa sinehan ug igo lang silang mohimo og salida. Kon mahadluk mopasalida ang mga sinehan niani wa silay mahimo.
Gitawag ni Obama ang maong pagpangbulabog sa mga cyber files sa Sony og usa ka cyber vandalism o pagpangdaut o pagpangguba sa usa ka kompaniya ug dili kini usa ka lakang sa gyera.
Ug dinhi mitubag ang mga kontra ni Obama sa Republican party, sama kang Senador McCain, nga kon unsa man ganing matabang nga mang guba ka og ekonomiya ug mubabag ba hinuon sa mga pasundayag sa usa ka nasud usa kini ka pagpanghasi nga way kalainan sa pagpakig gubat.
Tingali maka-ingon ka nga wa tay labut niani. Apan hinumdumi nga ang China nga nagsige nag panakmit og mga isla, ka alyado baya sa North Korea. Unya gihinganlan na ni P-Noy og Hitler ang ilang gobyerno. Kon mag binombahay na ang North Korea ug ang America basig kitay himo-ong practice target sa China.
Ang naka-hanggaw lang kon ang sunod nga dakong gubat tungod lang sa pelikulang pakatawa. Showbiz ray hinungdan.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
