Alang nako dili na angay’ng sawayon ug kondenahon pa si Cebu Archbishop Emeritus Ricardo Cardinal Vidal sa iyang sayop nga nangunay pagbasa sa joint statement sa National Transformation Council (NTC) nga nanawagan kang Presidente Noynoy Aquino pagpa-resign sa puwesto.
Si Cardinal Vidal 84 anyos na intawn unya masakiton pa gyud. Dako kaayo ko’g respeto sa mga edaran na kay motuo gyud ko nga makagaba na ni sila.
Ang wa na pagtubag ni Cardinal Vidal sa isyu ug ang pagpangayo ug pasaylo sa Cebu Archdiocese ngadto sa mga tawo nga wa maka-uyon sa joint statement sa NTC, insakto na kaayo nga gipakita sa Simbahan ang pagkamapahiubsanon.
Nasayod ko nga nasayop si Cardinal Vidal nga maoy mibasa sa joint statement sa NTC kay klaro kaayo siyang nagpagamit sa mga politiko apan mo-respeto lang sab ko sa iyang pagpagamit ug sentimento ilabina nga demokrasya ning atong nasud.
Gawas pa, nagtuo gyud tingali si Cardinal Vidal nga dili na masabit ang Simbahan sa iyang pagkuyog sa NTC ilabina nga retirado na siya.
Pero kung atong palawuman kining kawsa sa NTC uban nilang Cardinal Vidal pagpa-resign sa presidente, makaturok baya’g hubag-hubag ni P-Noy kinsa daghan na kaayo’g bulilyaso pagdumala sa nasud.
* * *
Dili sa ingon nga mibalimbing nako ni presidente Noynoy Aquino kinsa napalpak sa “Oplan Exodus” didto sa Mamasapano Maguindanao nga napatyan ug 44 ka mga sakop sa PNP Special Action Force.
Apan kinsa man gud ni sila si former national security adviser sa Arroyo government nga si Norberto Gonzales ug former senator Francisco Kitt Tatad?
Mga tarong ba gud ning mga tawhana sa ilang panahon?
Si Gonzales wa ni malambigit ug mga anomaliya sa Arroyo administration?
Si Tatad wa ni magkinuwanggol kinsa apil sa 11 ka mga senador kaniadto nga mibabag pag-abli sa 2nd envelop nga dunay mga ebidensiya batok kang kanhi president Estrada sa impeachment trial?
Si Gonzales gi-akusahan karon ni senador Antonio Trillanes IV nga maoy mipaluyo sa ilusad nga kudeta batok sa Aquino administration. Apan in fairness niya, iya kining gihimakak kay matud pa wa kini masubay sa iyang prinsipyo.
Pero suportado niya ang laing tinguha nga laing EDSA Revolution pagpalagpot sa presidente.
Mangambot lang ko kung suportahan ba sa katawhan ang laing People Power ilabina nga usa nalang ka tuig si P-Noy sa Malacañang.
Dili pa uwahi kining pamuno-an ni P-Noy pagbawi sa kapalpakan pinaagi sa pagpadayon sa “Oplan Exodus” aron makuha gyud si Usman ang kaubang terorista ni Marwan, patay o buhi!
Labaw sa tanan, mao gyud ang pakig-giyera sa mga traydor sa Mindanao.
* * *
Maibog nalang ko nga magtan-aw karon sa Qimonda IT Center kay nalig-on na pagbalik ug hapsay na’ng tan-awn ang ilang building human gi-abangan sa Korte Suprema ang 3rd ug 4th floor alang sa mga branches sa Cebu City Regional Trial Courts (RTC’s) ug sa Municipal Trial Courts In Cities (MTCC’s).
Sama lagi sa akong giingon kaniadto pa, nga kung ang gigamit nga kwarta pag-abang sa Qimonda IT Center gideretso pa lang unta pagpa-ayo sa atong Cebu City Palace of Justice mas lig-on pa unta kay sa Qimonda.
Sayang gyud kaayo ug nag-usik-usik lang sa gasto ang taga Korte Suprema pinangulohan nilang Chief Justice Ma. Lourdes Sereno ug Court Administrator Midas Marquez.
Karon nga nakapahimutang na ang atong mga huwes ug mga court personnel sa de-aircon nga mga courtrooms unsa may konkretong plano nila ni Sereno ug Marquez sa karaang building sa korte nga anaa sa Capitol compound?
Maglaum ko nga tutukan nilang Chief Justice Sereno, Department of Justice Secretary Leila De Lima ug ni Gov. Junjun Davide pagpa-retrofit sa building aron makadaginot ang gobyerno sa abangan sa Qimonda.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
