Dili na gyud ta mokompiyansa niining dagan sa panahon karon nga nagsige nag uwan-uwan ilabina nga ato na’ng natagamtaman ang mga kusog ug dugay nga mga pag-uwan.
Gawas sa uwan may mga panahon nga may dalang kusog nga hangin (unos).
Niadtong Sabado sa hapon, napuno sa mga kabalaka ug kahadlok ang mga residente sa Lahug ilabina duol sa Lahug Public Market kay dihay ipo-ipo (alimpos) o kusog nga hangin nga nagtuyok.
Mga pasado alas 5:00 sa hapon nahitabo ang alimpos ug segun pas sa mga nakasaksi nga gipangsuyop ang mga basura ug dihay sin sa atop ang gidala pagsuyop nga daw sama sa usa ka papel nga gipilo sa hangin.
Mao nga ning panahuna mangumusta gyud ko sa seryosong lakang sa mga opisyales sa gobyerno batok sa tanang nagpuyo daplin sa kasapaan, lapyahan ug sa mga lugar nga prone kaayo sa landslide.
Niadtong Huwebes sa hapon, nagkita mi ni Mayor Jonas Cortes sa session hall sa Mandaue nga nagtuki sa ilang Comprehensive Land Use Plan diin usa ko sa giimbitar ug ako siyang gipangutana sa estado sa mga nagpuyo sa Mahiga creek sa habig sa Mandaue City.
Mitubag si Mayor Jonas nga puwerte gyu’ng gahi-a sa mga nagpuyo ug dili gyud mamahawa.
Wa man ko mag-ampo nga dunay dakung lunop nga mahitabo sa Mahiga creek apan magbantay-bantay nalang ang mga nagpuyo ug way basolay nga dunay daghang patay nga atong pangita-on unya sa dagat .
Pero again, maglaum ko nga dli inutil paggamit sa ilang police power sila si Cebu City Mayor Michael Rama ug Mandaue City Mayor Cortes pagpapahawa sa mga nagpuyo.
Political will ra gyud ang gikinahanglan!
* * *
Nitiyabaw na sab ang mga motorista ug mga pasahero paingon sa amo sa Casay Dalaguete ug para sa ubang parte sa habagatang Sugbo kay traffic kaayo sa may Minglanilla.
Nadtong Biyernes sa gabii nakadawat ko og daghang reklamo sa text gikan sa mga pasahero kay nangapasmo intawon sila sa biyahe kay dugay silang nakalusot diha sa tugkaran mismo sa Plaza sa Minglanilla.
Mao nga kaming tibuuk pamilya nga manguli sab niadtong gabhiuna aron pagsaulog sa 1st death anniversary sa among pinanggang inahan pagka Sabado, nakadesider nga ari nalang manglarga sa pagka lawom nang kagabhi-on paglikay sa grabeng traffic.
Mga hapit na alas 11:00 sa gabii naabot mi didto sa Minglanilla ug kalooy sa Diyos wa nay traffic.
Apan amo pa’ng naabtan ang hinungdan sa problema sa traffic nga mao ang heavy equipment nga nangguba pa sa aspalto nga medyo nakaguba na sa sobra 100 meters.
Makasapot gyud ang sitwasyon kay lisud agi-an sa mga magsugat nga sakyanan ang portion sa kalsada nga giguba.
Di lang sa Minglanilla, duna say parte sa San Fernando ug Carcar ang gi-ayo ug seguradong makamugnag sapot.
Maglaum ko nga mapangitaan kini og tukmang solusyon sa atong mga kadagkuan sa gobyerno.
* * *
Lig-on na gyud ug dili na kakompiyansahan ang basketball team sa Cebu Daily News (CDN) alang sa Newsmen Basketball Association of Cebu (NBAC).
Kaya na kaayong pildehon ang tanang team sa CDN.
Kagahapon lang atol sa among game one sa best-of- three nga championship series sa Cebu Eastern College, kami sa GMA ug DYSS Super Radyo nagkagidlay pagdaug batok kanila.
Nakadaug man tuod mi apan muna-muna na gyud kay bisag naka-abante na unta mi og double digit nga labaw apan naapsan mi pag 3rd quarter unya hangtud na sa 4th quarter ligas kaayo ang score.
Daku kog pagtoo nga manimawos ang Siloy karong Domingo batok sa among team aron makatabla sila sa series ug aron matuman ang gipangandoy ni Super Ador Mayol nga dunay game three niining NBAC seasons.
Magpasalamat lang sab ko kay bisag puno sa kulba hinam ang mga aksiyon kagahapon apan mipatigbabaw gyud ang tinud-anay nga katuyu-an sa NBAC nga mao ang pag-promote sa camaraderie, sportsmanship and physical fitness namong mga buotan ug ligdong nga mga sakop sa prensa dinhi sa Sugbo.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
