Angkona ang solicitation, Mayor Mike

By: Lloyd Suarez July 01,2015 - 08:46 AM

Unsa   may   mapaabot  sa publiko sa  i-deliver  karong  adlawa  nga  State  of  the  City  Address (SOCA) ni Cebu City Mayor Michael Rama?

Pila ka   minutos  ang  igahin  ni Mayor Rama  pag-depensa  sa isyu  kabahin sa  pag-solicit  og  mga bottled water ug snacks alang   sa  mga manambong?

Maayo kay  miangkon na ang  iyang  secretary   nga si  Belinda Navasquez   nga  maoy  mipirma sa  solicitation  letter nga may  nakasuwat  nga  “by the authority  of the  city  mayor.”

Mas  maayo  sab  tingali  nga   angkonon   ni Mayor  Rama sa iyang  (SOCA)  nga  siya  maoy   nagmandu   ni  Navasquez  aron  sab  intawon may kompiyansa  pa  niya  ang iyang  mga  department  heads.

Haskang  buanga   kaha ni  Navasquez  nga  magbuot-buot  pag-solicit nga puwede  man siyang  tangtangon  ni Rama.

Unsa  may  kahadlokan ni Rama  pag-angkon  nga justifiable  man  kaha ilabina  nga ang  mo-inom ug  mangaon  mao  man ang  publiko  nga maminaw sa iyang city  address?

Ubos sa  prinsipyo  sa Private-Public Partnership nga na-uso  karon sa gobyerno  mabalaka   pa  ba si  Rama?

Ang   kuyaw  lang  kung  ang  mga   bottled water ug snacks  ipa-convert ngadto sa  cash  unya   ipondo alang  sa  pamulitika  ni Rama  ug sa iyang  mga  kaalyado.

Apil  ba sa  SOCA  sa  mayor  unsaon  pagsulbad  ang  problema sa  baha  dinhi  sa Siudad panahon  sa  kusog nga uwan.

Hisgot  naman  gyud  ta og baha  kinahanglang tutukan  intawon  ni Mayor  Rama  kanang problema  diha  sa kalsada  nga atubangan  sa  Zapatera  Elementary  School kay  kung  magbaha   dili  gyud  dayon  mohubas   nang  lugara.

Molanat pa  ug usa ngadto  sa duha  ka  adlaw kanang dapita una  mohubas nga  makahasol  kaayo  sa  mga motorista,  mga estudyante, mga  ginikanan  ug sa mga  magtutudlo.
Gawas diha  sa  Zapatera  ug  sa  mga lugar  sa  downtown, problema  gihapon ang sa  may   JY Square  Lahug.

Wa  makasulbad ang  bag-o lang nga nahuman nga proyektu sa Department of Public Works and Highways (DPWH-7)   pagpadaku  sa culvert  ni-anang  lugara. Sayang  lang  ang  minilyong salapi sa maong  proyektu nga palpak.

* * *

Niadtong  kasong pagpanulong ni Pearl Ungab asawa ni  Ronda  Vice  Mayor  Jonah John Ungab  ngadto kang  Atty. Jiecel   Tiu sa  Minglanilla   igo ra  siyang  kasohan  sa  korte sa kasong   light threats.

Kini  basi  sa  pinaka-latest  nga  resolution  ni  Talisay  Assistant  City  Prosecutor  Ma.  Alice  Corominas Lim–Ingles  kinsa  maoy  Acting  Provincial  Prosecutor  sa kaso  human  mi-inhibit  si  Provincial  Prosecutor Pepita  Jane  Petralba.

Ang  resolution  ni  piskal  Ingles    nagpasabot   nga  gisalindot  ang  duha ka mga kaso  ni  Atty. Tiu batok  kang Pearl nga mao ang  kasong  qualified  trespass to dwelling ug  kasong  grave threats.

Ambot kung  di ba  motiabaw  si  Atty.Tiu  sa resolution ni  piskal Ingles    kinsa  nireklamo  sa laing  kaso batok kang Pearl   sa Cebu City  Prosecutor’s  Office  bahin  niadtong  pag-baseball bat  sa abogada  human giselosan sa asawa sa bise-mayor.

Ang kasong  light threats wa  na  kinahanglana  nga  morekomendar  og  piyansa alang  kang  Pearl Ungab tungod  sa kagamay  nalang sa  kaso.

Kumusta  naman  tuod  si Vice Mayor Ungab  human sa  eskandalo? Dili ba gyud  apektado  ang  iyang political career?

* * *

Nalipay ko sa gipatuman karon  nga police visibility  sa kapolisan  dinhi  sa dakbayan sa Sugbo kay  makatabang  kaayo  kini sa publiko pagtubag  sa  mga alarma  nga  mahitabo  duol sa  ilang  area.

Apan subo  kaayong  palandungon  kining  ubang  mga   pulis kay   inay  magpakita sa dalan apan  atua  na  pirme magpasinaw  sa lingkuranan sulod  sa  mga establismento unya  guwardiyado   pa.

Akong  nasaksihan  kining  maong eksena  kagahapon diha  sa  may  Colonnade  Oriente Mall sa Colon  diin  akong  naatlan  ang tulo ka  mga  pulis  nga maayo  kaayong pagkahimutang  unya  nanagtabi.

Mas   nindot   tan-awon  ang atong  kapolisan nga  anaa  gyud sa  gawas sa  mga  establismento aron  ipakita  gyud  nga alerto  kanunay.

Kung  anaa  gud sila sa sulod, gawas nga  ma-defeat ang  purpose sa police visibility, madudahan  pa  nga  gigamit  silang  guwardiya sa mga  bay patigayon.

Subscribe to our regional newsletter

By providing an email address. I agree to the Terms of Use and acknowledge that I have read the Privacy Policy.
Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: Angkona ang solicitation, Mayor Mike

Subscribe to our regional newsletter

By providing an email address. I agree to the Terms of Use and
acknowledge that I have read the Privacy Policy.

We use cookies to ensure you get the best experience on our website. By continuing, you are agreeing to our use of cookies. To find out more, please click this link.