Wa pa gyud maka-recover sa iyang pagkaparot ngadtong Cebu City Mayor Michael Rama si kanhi Cebu City mayor ug kanhi kongresista Tomas Osmena.
Nagpakita pa gyud gihapon sa iyang pagkadumtanon human nga nanaway gihapon siya ngadto ni Mike bisag gidayeg siya ug gipasalamatan sa mayor niadtong
Sabado atul sa pag-deliver sa State of the City Address (SOCA).
Nag-usik usik ba gud si Mayor Rama sa panudlanan sa syudad?
Motoo lang ko sa pasangil ni Tomas kung mag-atubang si Rama og mga kaso sa Ombudsman nga gipangwaldas sa mayor ug migamit personal sa kuwarta sa syudad.
Misamot ang kalagot ni Tomas kay wa sila molampos pagkuha ni City Councilor Mary Ann Delos Santos nga kusog kaayo sa Lahug ug sa entire Cebu City north district.
Mas sadya pa tingali unta kung nakisaw-saw si Tomas sa mga intriga tali ni Mike ug ni Catbalogan City Mayor Stephany Uy-Tan.
* * *
Wa gyud ko makasabot nganong kasong multiple murder ang gipasakang kaso batok sa kapitan, sa tag-iya ug sa 17 ka mga tripolante sa MB Kim Nirvana.
Nagpasabot ba kini sa pagka-ignorante sa balaud sa kapolisan ug sa pagka-abusado sa katungdanan?
Wa kaha kini tuyo-a ang pagtaral dayon sa kapitan ug mga kaubanan aron pag-cover-up sa mga inutil nga taga Philippine Coast Guard?
Kinsa may nagtugot nga palargahon ang motor banca taliwa sa bagyo? Di ba ang taga Coast Guard? Kinsa may manubag sa over loading? Di ba ang taga Coast Guard? Pagklaro mo, uy!
O ba kaha kutob ra sa pakonsoylo kining gihimo sa kapolisan aron pabuhi sa dugo sa mga kabanay nga nagbangutan nga kung buot huna-hunaon ilang gipun-an ang kasilag ug kasakit sa mga biktima niining sayop nga asunto.
Ang rason ni Police Chief Superintendent Asher Dolina sa Police Regional Office (PRO-8) kay aron matud pa dili makapiyansa ang kapitan nga si Warren Oliverio ug ang tag-iya nga si Joge Bung Zarco ug ang 17 ka tripolante.
Ang iyang punto mao nga aron dili kuno mabuhi-an. Pastilan kining klase sa utok!
Kung akoy piskal niining kasoha, i-dismiss nako pag-derekta ubos sa rules on inquest proceedings kay way ebedensiya sa kasong murder. Unsaon pagka-murder nga way treachery ug premeditation?
Way abogado ang PRO-8? Way nakatambag sa heneral nga sayop siya?
Kanus-a gud tawon nausab ang atong Revised Penal Code nga kasohan na og murder ang nakadisgrasya og kinabuhi mugna sa kadanghag?
Kining kasoha mahug ra man gihapon sa reckless imprudence resulting in multiple homicide, physical injuries and damage to properties nga bailable gihapon.
Basig nalimot ang atong kapolisan nga katungod sa tanan nga makapiyansa sa kaso.
Pero akong subli-on, ang taga Coast Guard Ormoc maoy angay’ng lutoson ug itaral sa maong disgrasya.
Wa untay mga kinabuhing nakalas kung wa gyud nila palargaha nga nasayod na sila sa PAGASA nga mikusog na ang bagyong “Egay”.
Ang angayan nga himoong sentro sa imbestigasyon, mao kung pila ang SOP nga nadawat sa taga Coast Guard niadtong biyahe’ng sementeryo?
*****
Hangtud sa pagsuwat ning maong lindog, wa pa gyud makit-i ang tulo ka mga Korean divers nga na-missing sukad pa niadtong Domingo sa may Punta Engaño sa dakbayan sa Lapu-lapu.
Ang importante nga dili makabasol sa atong mga local authorities ang kabanay nilang diving instructor Baek Seung Kyoon, ug sa laing mga Korean divers nga sila si Heo Seung Yung ug Kim Eun kay may mga pahimangno nga peligro kaayo ang dagan sa panahon.
Kining ka gahi sa ulo ug paggara-gara sa tawo ug nagtoo nga mga maayong laki na kaayo, moresulta gyud sa disgrasya. Di motagam kung di makatilaw.
Hangtud karon di pa gyud angay’ng kompiyansahan ang dagan sa panahon kay motumaw gihapon ang mga kalit nga pag-unos.
Maglaum ko nga mosakripisyo lang gyud ang atong mga gagmay’ng mananagat paglikay sa disgrasya ilabina nga misulod na sab ang bag-ong bagyo nga si “Falcon”.
Si “Egay” migawas na apan nagbilin ug grabeng kadaot sa kinabuhi sa taga Pilar Camotes.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
