Brace yourself for storm Binay. Motambong kuno si Binay ning katapusang SONA ni P-Noy.
Ug kon gani motunga siya, matawag nato si Binay nga the elephant in the room. Kay ang pinakakusog sa mga kandidato nga mopuli kang P-Noy giakusaran man og panguykoy sa mga proyekto.
Usa kini ka pamikat sa gikampanya sa presidente nga “tuwid na daan.” Sa ato pa wa diay motuhop sa katawhan ang anti-corruption drive ni P-Noy kay popular man ang usa ka kandidato nga corruption ang issue.
Hinuon dili man ang popularidad ni Binay mao ang sukdanan sa pagpadagan sa gobyerno ni P-Noy.
Ania ang mga keywords nga mo-define sa lima ka tuig ni P-Noy:
Freedom of Information bill. Mao unta kini ang usa sa pinakalig-ong hinagiban pagbatok sa corruption ug daghan ang nagdamgo nga mahimo kining balaud sa administrasyon ni Aquino.
Napakyas ang presidente pag duot niini sa kongreso.
Bangsamoro Basic Law (BBL). Giingon nga mao kini makahatag og kalinaw sa Mindanao apan basin maligsan niani ang katungod sa mga namuyo sa maong lugar nga dili Islam ang tinuohan.
Ug gawas pa, giingong supak sa Philippine Constitution nga dunay laing gamay nga gobyerno nga maghimo sag ilang mga balaud.
Mamasapano. Ang maduguong hitabo mibisto sa way maayong coordination sa mga sanga sa military.
Ang nakaparat pa gyud kay nagpadagan sa operasyon usa ka opisyal nga suspendido. Diha pay tabitabi nga ang mga Kano maoy gaduso sa maong lihuk.
Katutubo. Unsay mahitabo sa atong mga indigenous people kon madayon ang BBL? Automatic ba silang pasundon sa mga balaud nga dapig sa Islam ang padagan?
The Ampatuans. Nahipos tuod ang bangis nga pamilya sa Maguindanao nga maoy giingong nagpaluyo sa pagpatay sa kapin sa 30 ka journalists nga mi-cover sa filing of candidacy sa ilang kontra partido.
Namatay na lang ang pangulo ning maong pamilya apan walay na- kombikto. Lima na ka tuig ang milabay sukad sa maduguong hitabo.
Yolanda. Hangtud karon init gihapon ang lalis kon may kakuwang ba ang pangandam sa gobyerno sa pag-abot ning mangtas nga bagyo nga mikuha sa linibo ka kinabuhi.
K to 12. Daghan ang nalipay nga duna na gyuy lakang nga gihimo ang kagamhanan sa pag-improve sa atong educational system. Apan daghan sang niagulo tungod kay mo- dugang kini sa bayranan sa mga ginikanan.
RH Bill. Usa ka balaud nga kontrobersyal tungod kay mohatag kinig access sa contraceptive para sa mga kababayen-an ug nga wa mauyon ang Simbahang Katoliko niani.
Anti Dynasty Bill. Dunay Binay hapit sa tanang lugar sa gobyerno. May managsuong Cayetano sa Senado. Kon di kini mapasar may purohan nga ma-senador si Kris Aquino.
“Tuwid na Daan.” Natanggong si Enrile, Jingoy og Revilla basi sa akusasyon nga nangikiw sila apan ang mga tawo ni P-Noy nga gidudahan usab wala maimbistigahi.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
