Practically dili gyud supak ang atong mga local players sa transport sector sa umaabot nga operation sa 77 ka mga dagkong buses nga joint venture sa SM Prime Holdings ug Jam Transit.
Si Julito Flores, presidente sa kooperatiba sa mga bus operators dinhi sa Sugbo ug presidente sa mga mini bus operators, miklaro nga way problema kanila kung ang operation sa mga buses anha ra magtuyok-tuyok sa South Road Properties (SRP) gikan sa dakbayan sa Talisay hangtod na sa Malacañang sa Sugbo.
Si Flores, atol sa among programa’ng “Dialogue On The Air” sa DYSS Super Radyo niadtong Sabado, mipadayag nga ila gyu’ng babagan kutob sa ilang mahimo kung mogawas na sa SRP ang mga buses kay seguradong yabo gyud ang bugasan sa mga operators ug mga drivers sa PUJ ug taxi.
Nabalaka sab si Flores nga moabot ang punto nga silang mga bus operators maoy maapektahan kay posibleng mokamang kini paingon sa south ug sa norte.
Namasangil si Flores nga “lutong macaw” o moryo-moryo na kining ipatawag nga public hearing sa taga LTFRB-7 karong Biyernes bahin sa maong operation sa mga buses.
Apan si Atty. Evelyn Carmelita Misal, hearing officer sa LTFRB-7 nga mitunga sab, miprangka ni Flores nga dili gyud intawon tinuod nga “approved in principle” na ang application sa operation niining maong mga buses.
Gipasabot sa abogada nga na-misquote siya sa usa ka forum kay ang iyang giingon nga na “approved in principle” na mao ang RMC kun “Route Measured Capacity” human nasubay nilang taga LTFRB nga gikinahanglan gyud nga dunay mo-operate nga mga buses gikan sa Talisay paingon sa Mactan Cebu International Airport.
Gipasabot sa abogada nga kung dunay mga players nga intresado nga mo-compete sa 77 ka mga buses, andam nilang hatagan og pagtagad.
Pero alang ni Flores, nakatimaho na sila nga paborito gyud sa LTFRB ang application sa joint venture sa SM ug Jam Transit kay ang taga Jam Transit maoy nag-rekomendar ug nag-submit ngadto sa DOTC sa mga standards nga sakyanan nga maka-operate nga “high quality” nga pabor niining higanteng kompaniya.
Buot ipasabot nga way tsansa silang mga gagmay’ng investors. Nahibaw-an nga tag P8 million ang matag unit niining 77 ka mga buses ikomparar sa atong mga nasakyan na nga mga buses nga tag dul-an P3 million lang.
Ambot lang kung dili ba gyud biased ang taga LTFRB nga miingon na nga barato ra ang plite niining maong mga buses kay sumaa pa tag P75 lang ang plite gikan sa Talisay paingon sa MCIAA ikomparar sa taxi nga moabot og gikan P200-P300.
Ako nagtuo nga gituyo kini nga maka-operate sa labing dali nga panahon aron madayon na gyud ang pag-implimentar sa Bus Rapid Transit (BRT).
* * *
In fairness ni Assistant Cebu City Prosecutor Mary Ann Castro, mitubag siya sa isyu bahin sa migawas nga estorya nga makigbuwag na kaniya si Greco Sanchez taliwa nga bag-o pa silang gikasal sa usa ka Muslim wedding.
Si Castro mi-angkon nga natural ug normal gyud sa magtiayon nga dunay mga misunderstandings.
Matod sa piskal nga mahilot ra kining tanan ug paningkamotan niya nga ma-preserbar ang ilang kaminyoon.
Gi-angkon niya nga milayas si Greco makaduha na ka higayon sa iyang panimay.
Gihimakak niya nga iyang gihimo’ng “boy” si Greco kay matud pa sa panahon nga manghugas sa ilang gikan-an uban sa iyang anak, si Greco maoy mobolontaryo sa pagpanghugas.
Kung tinuod man kining gisulti ni Castro nga gamay ra kaayo ang hinungdan sa ilang away, wa kaha mobalik si Greco sa bisyo nga maoy basihanan nga ibalik siya sa rehabilitation?
O ba kaha nakasabot na si Greco nga way bisa ang ilang kasal human gipasabot sa mga legal implications?
* * *
Unsa ka tinuod kining akong nadawat nga mga impormasyon nga si kanhi governor Gwendolyn Garcia maoy standard-bearer sa One Cebu political party pagka-gobernador sa sunod tuig nga eleksiyon?
Kini human mihuyang sa survey si former GSIS president Atty. Winston Garcia unya misaka pag-ayo ang approval rating ni Gwen human daghang wa maka-uyon sa liderato ni Governor Junjun Davide III.
Matud pa ang iparang ni Provincial Board member Grecilda “Gigi” Sanchez sa 3rd district mao si Atty. Winston samtang si former congressman Pablo John Garcia adto makigharong kang Provincial Board Member Peter John Calderon sa bag-ong 7th congressional district.
Posible nga kini maoy mahitabo sa dagan sa pamulitika sa mga Garcia ngan nga mga mat-an ug tang-an sab.
Ang wa pagtunga sa taga One Cebu sa launching niadtong Biyernes sa United Nationalist Alliance (UNA-Visayas) maoy timailhan nga silyado na ang ilang pakig-alyansa sa kampo ni Senador Grace Poe kinsa maoy nag-una sa survey sa mga mokandidato pagka-presidente.
* * *
Sa akong analysis, nagamit ug nagpagamit gyud alang sa political interest sa administrasyong Aquino sa Liberal Party si Ombudsman Conchita Carpio Morales.
With all due respect sa tibuok opisina sa Ombudsman, naklaro na gyud karon kung unsa na ka guba niining maong institution kay way kaangayan pagpahamtang og susamang silot ngadto sa taga administrasyon.
Ang ilang gigukod mao ra gyud ang taga opposition sama kang Makati Mayor Junjun Binay.
Unsa may gihimo sa taga Ombudsman batok sa taga administrasyon sa grabeng corruption ug ang pagtago sa mga foreign aid nga mga pagka-on ug mga medisina nga na-expired na lang nga alang unta sa mga biktima niadtong bagyong “Yolanda”?
Way ek ang Ombudsman kay klaro kaayong manubag ug mabitay ang taga administrasyon?
Kinsa may isunod ni Mayor Binay? Dili kaha si Cebu City Mayor Michael Rama nga ipa-suspenso sab sa taga DILG samtang magsugod na karong adlawa ang filing sa certificate of candidacy?
Ingon ani na gyud ka hugaw ang politika?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
