Dili sa ingon nga midapig ko ni Cebu Assistant City Prosecutor Mary Ann Castro, apan nganong wa man dayon mo-insister niadtong Lunes ang kampo nilang Board Member Gigi Sanchez ug iyang manghod nga si Greco nga tan-awon ang video footages sa Kapitolyo kung kinsa ang mikuha sa Ford Ranger nga sakyanan ni Greco nga giparking sa legislative building?
Ang video footage sa CCTV camera maoy makatubag sa pagduda ni Greco nga si Castro, nga iyang gipakaslan sa Muslim wedding ceremony, maoy nagkuha sa mahalon nga sakyanan.
Pero wa kaha ni mahulog sa estorya nga “carnap me”? Unya kining tanan trabaho nilang Greco ug Bokal Sanchez aron paglubog sa gipasakang kasong carnapping ni Castro sa usa sa mga babaye ni Greco?
Si piskal Castro mihulga gyud nga iyang iapil sa kasong carnapping si PB member Sanchez kinsa iyang giakusahan nga nag-apil-apil sa ilang kaminyoon.
Pero alang sab kanako, kung nagtamod si Castro sa insaktong pamatasan, ngan nga maguwang si Gigi ni Greco nga iyang honey dear, maningkamot siya nga makumbinse kini nga alang sila sa usag-usa ug seryoso ang iyang gugma sa tawo nga nagumon sa illegal nga drugas kaniadto.
Kumusta man tuod ang ilang relasyon karon ni Greco gikan niadtong ilang misunderstanding? Naningkamot ba si Castro sama sa typical nga mga asawa nga magka-uli gyod bisan ang kalibotan magdumili?
*****
Akoy naluoy sa usa ka mag-uuma nga taga bukid sa Cantipla ning dakbayan kay nailad intawon kagahapon sa iyang customer nga mipalusot og peke nga P500 ngadto kaniya.
Gipalitan siya og balig P300 nga nagkadaiyang utanon unya iyang gisuklian og P200.
Tungod lagi intawon kay taga bukid, gisayon-sayon lang sa hinampak nga mangingilad.
Puwerte’ng luoya gyud sa biktima nga si Alex Gaviola kinsa midangop kanako kagahapon ug nagpakitabang. Sa sinugdanan, wa pa gyud siya motuo kanako nga peke ang P500.
Mao nga aron motuo siya, akong gipaeksamen ang papel sa usa ka establismento sa Lahug nga may money detector ug didto nasubay nga peke gyud.
Akong gitambagan ang pobre nga dili gyud gamiton ang peke nga kuwarta sa pagpalit kay tingalig siya maoy mapriso ug kasohan sa korte.
Paeta gyud sa iyang kahimtang kay bug-at pa kaayo ang bakat nga iyang gipas-an nga puno sa mga utanon unya biktima pa sa mapahimuslanon.
Hinuon ang gaba dili susama sa mga sili ni Alex nga mohalang dayon. Ginoo nalay mag-igo sa namintaha.
Niining nagkaduol nga eleksiyon, dili kaha mogara ang palusot sa mga fake nga kuwarta?
Kaniadto diha ra ba’y manggama og fake money nga namasangil nga gikomisyon siya sa kapolisan ug mga politiko.
*****
Haskang grabeha na gyud sa kainit sa panahon kagahapon ug sa mga nangaging mga adlaw.
Mora’g mamahit ang adlaw sa atong panit ug delikado kaayo sa heatstroke nga maoy maka-trigger sa heart attack.
Mao nga kung mahimo, likayan gyud nato ang pagbuwad sa adlaw kay mao na kini ang epekto sa strong El Niño basi sa forecast nilang Director Oscar Tabada sa Philippine Atmospheric, Geophysical and Astronomical Services Administration o Pagasa.
*****
On leave ko karong adlawa kay buot nakong hatagan og dako’ng gibug-aton ang akong ika 15th year nga wedding anniversary karong adlawa uban sa tawo nga maoy gihatag sa Ginoo kanako ug maoy natingban sa akong pagbati nga labing guwapa, buotan, epektibo sa decision making ug way makatupong sa pagkakugihan nga mao si Mommy Myrna.
Magpalahi ko karong tuiga sa among selebrasyon nga likayan gyud ang inom ug di gyud magpatintal bisan usa ka tinulo sa beer, hard liquor ug ang pagkaon sa grabeng parat, tam-is ug tambok kay gusto ko’ng magpabiling himsog ang among relasyon sa kaminyuon.
Bastante na kaayo alang kanako ang simple’ng selebrasyon pinaagi sa pagtambong sa usa ka Thanksgiving Mass uban sa among mga anak nga silang Karl Anthony ug Karen.
Happy Anniversary, Mommy dear!
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
