Patuga si piskal nga di man diay kaya sa budget!

Sa  mga  karaang bugoy, makaingon  gyud nga pagkanindot  ug pagkamabulokon  sa  kinabuhi  ni  Cebu Assistant  Provincial Prosecutor Dionilo Mantos  nga  nakauyab og batan-on ug  iya  pa’ng  gipaangkan makaduha.

Matud pa lagi  sa  uban,  duna nay   ikapanghambog si  Piskal Mantos sa iyang  kaagi ngadto sa  iyang  mga apo.

Daghan  sa akong  mga amigo  nga  gusto’ng  mokiskis sa kuko  ni Piskal  Mantos kinsa  usa  ka daku’ng minyo nga nakarelasyon kang  Jocelyn Sala.

Si  Ms. Sala  misugilon na  dinhi sa  Cebu Daily News  nga  nagkaila sila ni Attorney/Prosecutor Mantos  niadtong nag-edad  pa siya’g 17 anyos ug  karon anaa  na siya sa  edad nga 28.

Singko (5) anyos ang ilang  kamaguwangan nga  anak samtang walo (8) pa  ka buwan ang  manghod  nga babaye sab. Sa maong  gidugayon,  tam-is gyud  kaayo  ang ilang  romansa.

Apan  naunsa  naman kini karon, piskal? Inay  ampingan, imo namang  gipasakitan  ug gipapriso?

Segun pa’s akong  amigo  nga wa  matarong  pagkadala  ni  Piskal Mantos. Sa laktod nga  pagka-estorya,  “patuga-tuga!”

Kinsa  gud  tawong bayhana  nga  gipaangkan  og  kaduha  nga maka-sustiner   pagbuhi sa duha  ka  mga bata  nga  nagsalig  lang  sa P8 mil  pesos kada buwan nga  sustento gikan  sa  piskal?

Mosamot  na gyud  pagpanglarot  ang  buhok  ni Piskal Mantos sa  panahon nga  mang-eskuwela  ang mga  bata.

Kuwang intawon kaayo ang P8 mil ilabina  kung  mang-eskuwela  na ang  mga  bata.

Ang  dakung sayop  ni  Piskal Mantos,   iya  pa  gyu’ng  gipun-an niadtong  Biyernes  pinaagi  sa pagpapriso kang Jocelyn  nga  igo ra’ng  nangayo  og  kuwarta aron   pagpaospital  sa  ilang  ikaduhang anak.

Sa hitabo, daghang pundok  ang  interesado nga motabang  ni Jocelyn.

Delikado  baya si  Piskal Mantos  nga  maigo  sa  kasong immorality,  domestic violence, disbarment  proceedings  ug uban  pang mga  kaso.

Tiaw  ra  pud,  uy,   kaniadtu nga bag-o  pa  ko  sa  media  profession, ang isyu nga  gikalambigtan sa mga  piskal  kabahin sa  graft  and corruption.

Pero karon, igat-igat  na ug   padaghanay  sa uyab!

Unsa  ka  tinuod  nga dunay  ubang  mga  litigante ang mireklamo sa performance  ni  Piskal Mantos?

Wa ni siya  duphi  sa taga  Department  of Justice?

* * *

Kinsa  man gyud  ang  nagpaluyo sa  pagparelibo kang Acting  Cebu City Police  Director Marciano Batiancela, Jr?

Dili  kaha  kini binuhatan sa taga  Bando Osmeña-Pundok Kauswagan (BO-PK)  nga gipangulohan   ni  kanhi  city mayor Tomas Osmeña?

Mao  kini  ang  nakapaet   sa atong kapolisan  kay  magustohan  na gani sa  incumbent elected officials,   segurado  gyud na  nga  ipabalhin sa  kontra partido.

Nakabantay  na gyud  tingali  ang taga BO-PK  nga si  Batiancela  sayon  ra’ng  madektahan  sa gusto  sa taga  Team  Rama nga     ila  kang suspended Mayor  Michael Rama.

In fairness  ni  Batiancela,  maayo  gyud  siya’g  performance kay  makamao sa trabaho.

Ang ako  lang,  kinahanglan  gyud nga  maka-maintain og neutrality  ang atong  kapolisan kay  hugaw kaayo’g utok ang atong  mga politiko ug anaa kining batasan  sa  pagkaigihan.

* * *

Kumusta  naman  ang kampanya  nilang  Joel  Maloloy-on,  chief sa  operations sa Land  Transportation Office (LTO-7)  niining  mga  motorsiklo nga  saba  kaayo  ang   tambutso nga gitawag  og  bora-bora?

Akong  naobserbahan  nga  mi-undang  ang  taga LTO pagpanakop sa  mga nagbora-bora  nga  motor.

Gisuspenso  sa taga LTO  ang  ilang  operation  kay  daghan sa atong  mga  pulis  nga bora-bora og  tambutso?

Sa tinuod  lang,  karong  bag-ohay  nakakita  gyud  ko  og  mga  pulis nga  nikabayo sa  ilang  motor  nga saba  kaayo’g  tambutso. Wa gyu’y  kaikog.

Ang  ubang motorista  natakdan  sab  kay bisag  anaa  duol sa misa sa  simbahan  paandaron  ilang bora-bora.

Niadtong Lunes  sa  udto,  nakasunod  sab ko’g  pulis nga nagdala’g  M-16 armalite rifle    nga  bora-bora  ang  tambutso   samtang  pasaka  sa Nivel Hills, Lahug.

Dili  na  gyud  makaya sa taga LTO  ang  pagkaastig  sa  ubang  mga  motorista?

O  gi-undang  nila   ang  operation kay  dunay  daghang  taga LTO nga  utro  sa’ng  masupakon sa balaod?