Super Hirit
Grabeha gyud sa pagka-konsintidor ni former Talisay City Mayor Socrates Fernandez ngadto sa iyang adopted son nga si Joavan.
One in a million gyud siya nga pagka step father nga pwerte’ng nakadupa ug naka-depensa sa pagka badlungon ni Joavan.
Bisag nakonbikto na gud ug gihukmang ipa-priso sud sa 36 ka tuig si Joavan sa ligdong nga huwes niadtong pagtanggong ug pagkulata sa mag-agaw’ng Winston ug Osbert Abellana sa tuig 2008, nabutaan gihapon si Bro. Soc ug naka-ako pa sa pag-apelar sa publiko nga dili hukman ang iyang anak ug misaway pas desisyon nga sobra ra sab.
Porbida gyud sa klaseng pagka-amahan!
Dili sa ingon nga akong gikondenar si Joavan pero maayong sutaon ni Bro. Soc si Joavan kung wa ba kini malambigit sa illegal drug operation sulod sa Cebu Provincial Detention and Rehabilitation Center (CPDRC) kay dihay mga nanggawas nga estorya kaniadto.
Kung nalipay ang mga biktima ug kapolisan sa pagkakonbikto ni Joavan kay dili na makagawas, labaw nako aron dili na magpas-an sa iyang dakung krus si Bro. Soc kinsa akong giisip nga amigo.
* * *
Dunay pipila sa mga piskal ang mikuwestiyon karon sa appointment nila ni Cebu City Prosecutor Liceria Lofranco Rabillas ug Lapu-Lapu City Prosecutor Ruso Zaragoza kay matud pa na-abtan sila sa election ban niadtong January 10.
Basi sa records ang duha natudlo niadtong January 22, 2016. Ang election period nagsugod niadtong January 10 ug matapos kini karong June 9, 2016.
Gani akong nahibaw-an nga dunay mass action ang mga piskal kabahin niini ug duna nay piskal nga mi-leave og 6 ka buwan pagpakita sa iyang protesta sa appointment sa duha.
Sumaa pa sa akong mga tinubdan nga parehas kini kaniadto sa panahon ni kanhi presidente Gloria Macapagal Arroyo nga dihay gipang-recall nga mga appointments sa Department of Justice kay naka-violate sa election ban.
Pero si Cebu Provincial Election Supervisor Atty. Lionel Marco Castillano mipasabot nga legal ang appointment nila ni piskal Rabillas ug piskal Zaragoza.
Iyang giklaro sa text nga : “Only transfer ang need ug exemption starting Jan. 9. Appointment prohibition starts only in the campaign period”.
Buot ipasabot nga way trampas ang pagkatudlo nila ni Rabillas ug Zaragoza kay nagsugod ang campaign period sa national position niadtong Feb. 9 samtang karong March 25 ang sa local candidates unya gi-appoint sila ni presidente Aquino sa wa pa ang campaign period sa national level.
Kung di pa konbinsido ang mga argabiyado nga mga piskal sa esplikasyon ni Atty. Castillano mas maayo tingali nga mogawas sila ug ipadayag ang ilang protesta kay sa mogamit sa mga sakup sa media alang sa ilang personal nga interest.
* * *
Grabe na gyud ang linungkabay karon diha sa karaang building sa Cebu City Palace of Justice nga duna pay mga nahibiling mga makawat ilabina ang mga ebidensiya sa mga kaso.
Tungod niini, usa sa mga huwes nagtinguha karon nga ipadayon ang pag-imbestigar sa usa ka process server sa Cebu City Prosecutor’s Office nga si Carlo Algarme nga perme’ng makit-an nga magsaka kanaug sa building.
Gitinguha karon sa huwes nga makuhaan og finger print si Carlo sa atong kapolisan.
Pero alang ni Carlo kinsa mibarug nga inosente gyud siya ang mipadayag nga andam siyang mo-atubang sa bisan unsang imbestigasyon.
Si City Prosecutor Rabillas mi-ingon nga hatagan niyag higayon si Carlo nga maka-depensa ug naa ra sa iyang trabahante nga magpakuhag finger print.
Misalig sab si Rabillas sa iyang process server nga usa kini ka tarong.
Mas maayo nga dili talikdan ang imbestigasyon aron klaro gyud.
Pero way plano ang mga huwes nga ipa-apil ang mga gwardiya sa pag-imbistigar?
* * *
Akong gilauman nga mo-uyon ang tanang mga graduating students sa College of Law dinhi sa Sugbo nga anhi sa Siudad ang venue sa bar examinations karong Nobyembre alang sa regionalization.
Kini aron mahimo na’ng precedent sa taga Korte Suprema nga ang Sugbo usa sa mga venue matag tuig sa bar examinations aron sayon nalang sa mga kabus nga tinun-an nga di na madak-an sa gasto didto sa Manila.
Karong Huwebes ang deadline sa survey. Maglaum ko nga kadtong mga anak og tubig-tubigan mouyon gyud niini kay pabor na kaayo natong mga Sugbuanon.
Kung mahinayon na kini andam sab ko’ng mo-sakripisyo pag-eskuwela sa abogasiya kay basig maka-tsamba diay puhon . Hehehe.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
