Super Hirit
Niining mga balaang mga adlaw sa Semana Santa, nindot gyud nga kita’ng tanan makapangompisal sa mga pari agig pag-angkon sa atong mga sala ug makigsuod kita pagbalik sa Diyos.
Nindot kaayong puy-an ang kinabuhi kung anaa sa atong sentro ang Ginoo kay dali kita’ng makalikay sa mga panulay ug sa ubang matang sa pagpanintal ug mga panglingla sa puwersa sa yawa.
Pasayloa kami, Langitnong Amahan, ug hugasi kami gikan nga naglunang sa pagpakasala. Badbari kami sa tanang kalisdanan ug ipaambit kanamo ang imong gugma ug grasya.
Advance Happy Easter!
* * *
Nakasabot ko sa kawsa sa atong mga taxi operators ug ilang mga drivers nga nagsupak sa kamanduan sa Land Transportation Franchising and Regulatory Board (LTFRB) nga ipermanente na ang flag down rate nga tag 30 pesos ug ang pagbarato sa succeeding distance.
Si Chiguito Obeso, operator sa Spider, Airland ug Scorpion taxi, mipadayag sa among programa’ng “Dialogue On The Air” sa DYSS Super Radyo niadtong Sabado nga malaumon silang tanan sa tibuok Pilipinas nga dili ipadayon sa taga LTFRB kay patay gyud ang ilang negosyo kay wa nay mosukol nga mga drivers pagpamasada.
Sa ilang kuwentada, matibhaan gyud sa 40 porsiento ang mawala nga income sa ilang mga drivers matag adlaw.
Alang gani niya nga wa siya’y supak nga ibalik ang tag 30 pesos nga flag down rate.
Ang iyaha mao nga di gyud makiangayon ang pagpatuman sa LTFRB nga paabton na sa 500 metros una ipatak ang tag P3.50 inay sa naandan nga tag 300 metros lang.
Giubanan si Obeso sa operator sa Marmic Taxi nga si Marites White ug mipadayag sa samang opinion.
Ang mga taxi operator naglaum nga maminaw kanila ang taga LTFRB ug dili sila manduan dayon pagpa-recalibrate sa ilang mga taxi meters samtang dili pa ma-final and executory ang bag-ong lagda.
Mogasto ang mga operator og tag 2 mil pesos pagpa-recalibrate matag taxi meter.
Naglaum usab si Obeso nga mopabor kanila ang Court of Appeals nga makaisyu dayon og temporary restraining order aron pugngan ang LTFRB.
Si Emil Membrillas, tigpamaba sa LTFRB-7, mipasalig usab nga dili nila pugson pagpa-recalibrate kung dili pa final and executory ang bag-ong taripa sa taxi human nakasabot nga ang tanang lakang sa sector sa panaksi mao ang pag-avail sa substantive due process.
Sa maong radio program dunay upat ka mga taxi drivers ang nanunga nga sila si Evergeto Saga sa CTC Taxi; Luis Labandero ug Jeffrey Adolfo pulos kang Obeso ug si Rogie Pelisan sa Juscar Taxi.
Ang maong mga drivers pulos namahayag nga mosamot gyud kalisud ang ilang panginabuhi uban sa ilang pamilya ug mawala na gyud ang ilang pagka-sweet lover.
Sumala sa mga drivers nga sa tibuok semana, tulo ra gyud ka adlaw ang kusog sakay nga mao ang Biyernes, Sabado ug Domingo. Kini ra’ng mga panahona nga makatilaw silag humba.
Sa habig sa mga operators, ilang gikonsiderar nga patyon gyud sila sa gobyerno sa ilang negosyo kay dili na tugtan nga makadagan ang ilang mga karaan nga mga units.
Sumala pa nga lahi na gyud ang mga bag-ong units karon kay mahal na kaayo ang maintenance kay computer na maoy mo-diagnose sa deperensiya.
Ang mga karaan nga mga units puwede ra’ng mantinilan kaniadto og baat-baat sa alambre kung dunay mangaluag. Pero karon wa nay mantinilay. Dagko na kaayo ang maintenance.
Daghan na sab nga mga taxi operators ang nanira na kay dili gyud kaya ug pun-an pa nga dili mangunay pag-monitor sa negosyo.
Sa akong kabahin, kinahanglang kuwentahon gyud pagbalik sa taga LTFRB kung dili ba alkanse ang mga taxi driver ilabina nga akong nasabtan nga mobalik na silag tubil sa gasolina tungod kay matud pa dili mosakar sa mga bag-ong taxi units ang koneksiyon sa LPG (liquefied petroleum gas) nga maoy kasamtangan nilang gitubil.
* * *
Akong i-congratulate akong anak nga si Karen kinsa mi-graduate kagahapon sa elementary sa Lahug Christian School (LCS) ug usa sa mga nakakuha sa taas kaayo nga grading percentage.
Way ginikanan nga dili malipay sa iyang performance sa academics kay miabot sa 93.98 percent ang iyang average. Wa ko kaabot niining gradoha sa akong panahon.
Manghinaot ko nga maka-maintain siya niining maong grado sa mga mosunod nga katuigan sa iyang panlimbasog sama sa iyang maguwang nga si Karl kay ang kaalam sa tawo maoy iyang puhonan sa bisan unsang bugno ug mga panlimbasog sa kinabuhi.
Congratulations, Karen! We’re so proud of you, ’nak.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
