Super Hirit
Mahibaw-an na gyud human sa eleksiyon karong adlawa kung si kinsa sa lima ka mga presidential bet ang hatagan og mandato nato’ng 53.3 milyones ka mga botante.
Sa kinatibuk-an moabot sa 53,363,844 ka mga botante lukop nasud ang mobotar karon sa lain-laing polling precincts.
Bisag nag-una sa mga survey si Davao City Mayor Rodrigo Duterte apan wa pay kasigurohan kining tanan.
Wa gyud kahay tikas ni’ng eleksiyona?
Pero unsa may nahitabo kang kanhi Secretary Mar Roxas niadtong Biyernes sa gabii nga buot nga makig-estorya kang Senadora Grace Poe aron lang di molampos ang Duterte presidency?
Nahadlok gyud si Roxas sa iyang kapildihan ni Mayor Digong? O ba kaha iyang paatrason si Poe aron molig-on ang iyang candidacy?
Kung mo-atras si Poe, unsa may kasigurohan nga ang mga supporters ni Poe motapon kang Roxas?
Si Poe nga na-interview sa among network sa GMA miklaro nga dili siya mo-atras kay dunay survey nga siya maoy nag-una.
Nabalaka si Roxas sa gipasiatab nga mahitabo ang laing diktadorya nga pangagamhanan ubos ni Duterte?
O ba kaha gituyo kadtong maong pakulo ug paukyab ni Roxas aron gyud dauton si Duterte?
Akong tan-aw bisag modaug pa si Duterte apan dili sayon nga i-deklarar ang martial law ubos sa atong lagda. Nasayod nasab si Duterte kung unsa ka gamhanan ang pundok sa katawhan.
Abogado baya si Duterte ug buot gyud niini nga ipatuman gihapon ang rule of law niadtong mga law-abiding citizens.
Ning uwahi ‘ng survey nag-una gihapon si Duterte bisag gi-unsa pagdaot sa mga political advertisements gamit ang mga bata.
Ang gikabalak-an nalang karon sa kampo ni Duterte ug sa ubang kandidato mao nga mabiktima sila sa tikas sa taga administrasyon.
* * *
Sumaa pa sa akong mga tinubdan nga naglumba gyud sa pagpangamang ang mga politiko niadtong miaging simana.
Ang nakasadya sab dunay nagpustahanay dinhi sa dakbayan sa Sugbo sa mamahimong mayor ug ingon man didto sa dakbayan sa Mandaue.
Nagpa-ila lang gyud kung unsa ka sugarol ang mga Sugbuanon.
Ambot kung unsa ka tinuud ning nasagap nako’ng balita didto sa ubang parte sa Mindanao nga ang palit sa mga botante tag tres mil pesos.
Sus, kung mao ni kanus-a pa kaha maundang ang grabeng corruption ug abuso sa Pilipinas?
* * *
Unsay nahitabo nilang Medellin Mayor Ricky Ramirez ug former Capitol chief security officer Loy Anthony Madrigal niadtong Biyernes sa buntag sa usa ka lodging house sa dakbayan sa Bogo?
Kinsa may nanguna pagpanumbag? Sumpay kini sa Roxas-Duterte fight?
Ang duha, daan na’ng nagka-initay ug nagbinaharay dihang si Madrigal na-eskandalo niadtong iyang sekretarya sa Kapitolyo nga nagpa-oraray sa bukton niini samtang didto sa airport. Si Ramirez maoy nag-expose kaniadto.
Kadtong maong isyu maoy napugos sa liderato ni Governor Junjun Davide pagpa-resign kang Madrigal ug sa sekretarya nga daku’ng menyo.
Sumaa pa nga dihang napilde sa sinukmagay si Mayor Ramirez, namusil kini kang Madrigal apan ang na-igo mao ang driver side sa sakyanan.
Hinungdan nga na-wanted karon si Mayor Ramirez sa kapolisan.
Apan ambot kung kinsay tinuud nga biktima kay nakita sa Facebook nga puwerte ma’ng gubaa sa nawong ni Ramirez.
Wa kaha masipyat ang kapolisan pag-pursue kang Ramirez? O ba kaha usa kini sa mga nagmatuod nga biased gyud ang kapolisan ngadto sa taga
Liberal Party diin kaalyado si Madrigal?
Ambot kung unsa sab ka tinuud nga ang babaye nga kuyog ni Ramirez usa ka daku’ng menyo unya ang bana nagpatabang kang Madrigal.
Kung tinuud man kini maoy ginaingon nga bawos-bawos lang ang panahon.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
