Mga pagpanaw (alang kang Orly ug uban pa)

Usa ka semana sa mga pagpanaw ang semana nga nilabay.

Kada adlaw may mabalitaan kita nga mga natumba ning gapadayong kampanya batok sa ginadiling drugas. Hinuon mas daghan man tingali ang mi surrender kay sa mga napatay.

Apan dili lang sa sinukliay og bala mawad-ag kinabuhi ang usa ka binuhat. Usahay igo lang mondang pagpitik ang gikapuy nga kasingkasing. Mao kini ang nahitabo sa among siaw nga higala nga si Orly Cajegas.

Usa ka medical course ang undergrad ni Orly apan mas na in-love man siya sa pagsuwat ug ingon man sa pagmugna og mga events. Abtik kaayo kinig pangisip ug dili kini mahutdan ug mga siaw nga linya. Lisud magpa magul-anon atubangan kaniya kay duna gayud siyay mga pamaagi nga makapaguwa sa imong pahiyum.

Usa siya sa mga matawag tang local social media personality sa Cebu. Layu og abot ang charm ni La O. Dili usa ka text message ang nagpahibawo kanako sa iyang pagpanaw kon dili usa ka “tag” sa FB gikan sa among higala nga si Cathy nga nanimuyo sa Las Vegas. Pwerti nakong igkinga pagbasa ko sa maong post. Dayon may message akong nadawat sa usa ka documentary filmmaker nga tua ma based sa California nga si Janice Villarosa. Gibasa ko ang tanang post nga may kalabutan ni Mama Orls apan puros lang pagpadayag sa mga kasakit ang nabasa ko ug wala akoy nakit-ang post kon unsa gyuy nahitabo. Mao nga ni post ko og pangutana. Ug ang mitubag kanako mao ang among higala nga tua sa Vietnam nga si Padre John Biton. Ang dili matag-ang cardiac arrest maoy mikuha ni Orly.

Duha ka punto ang namatgunan ko ning maong FB exchanges. Una nga napagamay sa Facebook ang kalibutan ug ikaduha nga “international” ang reach ni La O.

Atoa gilubong ang iyang lawas sa minteryo sa Sibonga. Apan alang kanamong mga nasuod kaniya magpabiling buhi si Orlando Carousel sa among hunahuna ug kasingkasing.

Samtang nag tan-aw ko sa Internet sa mga gipanulat sa mga hiagala namong La O mibutho kining taho kabahin sa madugong hitabo sa Nice, France diin gidaro sa usa ka truck ang mga nag party sa Bastille Day ngadto sa ilang kamatayon. Usa ka bag-o lang na radicalized nga delivery driver ang miligis patay sa 84 ka nag celebrate sa maong okasyon sa mga kadalanan daplis baybayon. Dunay mga 25 ka laing mga tao nga kang kansang mga kinabuhi 50-50 pa.

Kon wa ako masayup ikatulo kining panghasi sa mga tao nga wa mauyon sa malipayong kagawasan sa uban. Una dihay gipang rakrakan sa usa ka gay bar sa Orlando, Florida. Dayon dihay gipang hostage patay sa usa ka café sa Bangladesh.

Makaingon ta nga si Kamatayon usa ka manakupay kanatong mga kalag nga nia namakasyon sa kalibutan.