Dili sa ingon nga milaban ko sa taga Criminal Investigation and Detection Group (CIDG) Region 8 sa nahitabong pagpusil-patay kang Albuera, Leyte Mayor Rolando Espinosa Sr. niadtong Sabado sa kadlawon sulod mismo sa iyang selda.
Sayon kaayo ang pag speculate nga biktima sa extrajudicial killing si Mayor Espinosa. Practically wa ta didto makasaksi.
Unsa kaha kung tinuud ang version sa kapolisan nga misukol ang mayor dihang gi-serve ang search warrant? Magpatara ug magpa-pusil nalang ang atong mga otoridad?
Dunay mga pagkuwestiyon nganong kadlawon man gyud ang pag-serve sa search warrant. Kay ngano man diay dunay pili-on nga oras ang pag-serve nga importante man ang element of surprise?
Lisud pa gyud kaayong toho-an nga gisugo ang taga CIDG-8 sa ilang mga dagkung opisyal sa PNP nga ipa-ihaw si Mayor Espinosa human sila gilambigit sa illegal drugs operation kay ako nagtoo nga gilimpiyohan na ni General Ronald Dela Rosa ang tibuuk PNP Region 8 sa mga police scalawags.
Kung gipapatay ang mayor sa mga dagkung opisyal sa PNP, uwahi na sab kaayo kini kay naka-tribukar na si Espinosa sa listahan sa iyang mga protector nga anaa sa gobyerno.
Gawas pa sab niini, posible man gani nga ang gihatag nga kasayuran sa mayor palig-onon pa inig abot sa anak nga si Kerwin Espinosa.
Ang buot nakong ipasabot nga dili pa intawon kalingkawas ang mga PNP officials ug mga politiko nga giduhig sa napatay nga mayor kay dakung buhi pa si Kerwin.
Sa nahitabo sa mayor, mas palabihon nako nga mopatigbabaw ang prinsipyo sa “regularity in the performance of duty” kay nagkalawom ang kampanya sa gobyerno batok sa illegal drugs ug naglatay sa lanot ang kinabuhi sa atong kapolisan nga nagtinarong.
* * *
Niadtong Sabado atul sa among programa’ng Dialogue On The Air sa DYSS Super Radyo among gituki ang kabahin sa lain-laing mga petisyon sa mga labor organizations pagpa-usbaw sa suhulan nga naka-pending karon sa Regional Tripartite Wages and Productivity Board (RTWPB-7).
Sa among diskusyon, supak gyud ang habig sa management niining mga dagkung usbaw sama nilang Philip Tan sa Mandaue Chamber of Commerce and Industry kinsa naglingkod sab isip miembro sa RTWP-7 ug si Teodoro Locson Jr. Vice-President External Affairs sa Cebu Chamber.
Sa miaging tuig, gipatuman sa wage board ang 13 pesos nga increase sa minimum wage apan ang subo nga palandungon dunay mga kompaniya nga wa makatuman niini.
Si BAYAN Central Visayas chairman Jaime Paglinawan kinsa maoy nagdala sa tingog sa Kilusang Mayo Uno (KMU) mipasabot nga sa bag-ong survey sa income sa mga negosyante nagpakita nga puwerte’ng daku-a sa ginansiya ug way katarungan nga dili kahatag sa gipangayo nga usbaw.
Giduso sa KMU ang 750 pesos nga increase sa suweldo matag adlaw nationwide.
Apan gipasabot nila ni Tan ug Locson nga dili gyud kini kaya. Kung kini maoy matuman daghang negosyo ang mabangkaruta.
Ang nakanindot sa among diskusyon mao nga napunta gyud hinoon ang pagbasol ngadto sa taga Department of Agriculture kay napakyas paglusad og mga proyetku sa agrikultura nga maseguro unta ang ka abunda sa atong pag-kaon.
Sumaa pa nga kung nasuportahan pa sa gobyerno ang mga mag-uuma dili na unta kita mangangkat og mahal nga mga pagkaon gikan sa ubang mga nasud.
Sama sa ubang mga nasud nga bisan barato ang suweldo apan desente ang kinabuhi sa ilang katawhan tungod kay barato ang pagkaon.
Ambot kung unsa sab ka tinuud nga kining pag-import og bugas ug ubang agricultural products laing source of corruption sa taga gobyerno.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
