SUAREZ
Wa magtira pasagad ang atong kapolisan sa Regional Special Operations Group (RSOG) pagsulbad sa pag-ambush-patay kang Ermita Barangay Captain Felicisimo Imok Rupinta?
Pagka-paspas ba nilang nakasulbad kung tinuudman. Unsa may gidali-an? Naglumba sa P300,000.00 nga cash reward?
Ambot lang kung di ba inosente kadtong nadakpan nga gipresentar sa media niadtong Sabado nga si Jimmy Largo.
Si Largo giingong miangkon sa krimen atubangan sa kapolisan apan nanghimakak dihang na-interview sa mga tigbalita.
Klaroha intawon ninyo kini aron dili mabulilyaso ang pagkab-ot og hustisya sa pamilya ni Imok.
Abir kinsa man gyud kadtong kanhi politiko ubos sa BO-PK diha sa Ermita nga giingong misugo kang Largo nga ipa-patay si Rupinta?
* * *
Puwerte’ng looya sa gatusan ka mga taxi driver ni Chiquito “Keto” Obeso, operator sa Spider, Airland ug Scorpion Taxi kay di ka drive ug seguradong yabo ang ilang bugasan ning panahuna.
Pasmo ilang mga pamilya ning nagkaduol na nga Pasko kay natanggong ug nangababoy ang ilang 112 ka mga taxi units/awto ug walo ka mga KMK buses tungod kay gipakoral ni Daniel Go ang ilang agi-anan diha sa Sitio Oregano, Barangay Lawaan II, dakbayan sa Talisay.
Ingon ani na ka gamhanan si Mr. Go kinsa maoy tag-iya sa Qimonda I.T. Center kay anaa diha nag-abang ang Korte Suprema nga kasamtangang gipahimutang ang Cebu City Palace of Justice.
Sa akong interview niadtong Biyernes sa gabii ni Mr. Obeso, miingon nga gawas sa unang mga kiha daghan pa’ng kaso ilang ipasaka sa korte batok kang Go.
Kung mao ning kalakiha unsa may garantiya nga dili ma-impluwensiyahan ang mga huwes ni Mr. Go?
Makakab-ot pa kaha og kaangayan si Mr. Obeso sa mga huwes?
* * *
Ang pag-angkon sa sayop ug pagpangayo’g pasaylo ni teacher Cynthia Kiamco ngadto sa publiko/nitizens ug sa nurse nga iyang gi-harass sa Balamban Provincial Hospital maoy labing maayo nga lakang nga iyang himoon kaysa mag-abot pa sila sa korte ug sa bisan asa nga forum.
Kapasaylo man gani ang Ginoo, tawo pa? Pasko na baya.
Si Atty. Orville Dela Cerna sa legal division sa Cebu Province DepEd nga mitambong sa among programa’ng “Dialogue On The Air” sa dySS Super Radyo mihangop sa akong sugyot nga mangunay gyud ang maestra sa pagpangayo’g pasaylo.
Dili sa ingon nga nag-una-una ko sa makab-ot nga resulta sa imbistigasyon sa Department of Education (DepEd-7)apan mabasa na daan nga sad-an gyud ang magtutudlo.
Gani si Atty. Dela Cerna nangayo intawon og despensa sa nahitabo.
Si Dr. Rene Catan, hepe sa Integrated Provincial Health Office (IPHO-Capitol), miingon nga wa silay supak nga magka-settle apan iyang gipasalig nga tabangan nila ang biktima nga nagtinguha nga ipadayon gyud ang asunto.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
