Lost Horizon rekindled

Dunay na crash nga eruplano. Didto kini mahagasa sa Himalayas. Ang mga survivor gidala sa mga budhist nga monghe ngadto sa ilang monasterio. Tago ang maong monasterio, gipalibutan og mga bukid mao nga lugos kini makita. Ug tungod sa nahimutangan niani, layo kini sa pollution ug dautang mga elemento mao nga dili lang tag-as ang kinabuhi sa mga namuyo niani dili pa gayud matiguwang ang ilang panagway.

Apan kon mobiya ka sa maong lugar madali kang matiguwang og mamatay. Ang maong moansterio gitawag og Shangrila.

Mao kini ang padagan sa novel nga gisuwat ni Jim Hilton, nga usa ka British writer, niadtong 1933. Paborito kini nga libro sa tag-iya sa Marriott Hotel nga giingong binlan niyag kopya ning maong libro ang mga lawak sa iyang mga hotel. Tungod tingali sa kasikat ning maong sugilanon dunay mga hotel ug resort nga gihinganlan og Shangrila.

Gihimuan kinig pelikula pagka 1937. Unya gi-remake ang maong pelikula isip usa ka musical pagka 1973.
Paborito sa akong amigo nga si Bingoy ang 1973 version nga gibidahan og all star cast sama kanila ni Peter Finch, Liv Ullmann, Sally Killerman, Michael York, John Gielgud, Olivia Hussy, George Kennedy ug uban pa.

Ang gahimo sa music mao ang inila kaayo nga si Burt Bacharach ug ang iyang lyricist nga si Hal David.
Apan bisan pa man niani, palpak ang maong pelikula sa box office. Maong gihinganlan kini og “The Lost Investment”. Gi-birahan usab kinig aayo sa mga critics. Gianggaan kinig “Lost Her Reason” ni Bette Midler.

Pwerting panaway ni Bacharach sa production niani nga gi ban siya studio. Ug tungod nianing project nag buwag sila ni Hal David isip creative duo.

* * *
Dihang gilamon sa limbo ang Flight 370 sa Malaysia Airlines mga duha na ka semana karon dunay pipila ka mga imaginative minds nga misugyot kon wa ba kaha sila molanding sa usa ka katingalahang luna sama sa Shangrila.

Kon masayran, mga usa ka oras sa paglupad ning maong abyun gikan sa Kuala Lumpur, Malaysia paingon sa Beijing, China, kalit nga nawa ang communication niani sa ground. Napik-up na lang sa ubang radar nga miliko kini ug mipadayon paglupad sulod sa 7 ka oras.

Ang katapusang na pick-up nga signal niani nasulod sa arko sa radar moabot sa mga bukid sa Kazakhstan sa norte ug sa Indian Ocean duol sa Australia, sa sur.

Duna nay mga taho nga may nakuha nga hulagway sa mga debri ang mga radar sa Australia nga mlagmit gika sa missing nga eruplano. Apan di pa matino sa maong nasud kon parte ba gyud sa eruplano ang mga na register sa ilang radar.

Sa pagkakaron wala pa nakit-i sa mga eruplano ug barko ang mga puthaw nga na detect sa radar. Ug hangtud nga makit-an ang salin sa eruplano nagpadayon ang damgo sa usa ka Shangrila alang sa mga tagbanay sa mga pasahero ug crew sa Flight 370.