Nalutsan si Gov. Junjun sa mga anomaliya?

Dunay dakong katarungan nga ipaubos sa formal investigation si Evelyn Senajon, ang giilisan nga officer-in-charge sa Provincial Social Welfare and Development Officer kon PSWD sa lalawigan sa Sugbo.

Kini human miklaro si Governor Hilario “Junjun” Davide III nga ang hinungdan sa pagrelibo ni Senajon mao ang wa niya pagsunod sa mga lagda pagpalit sa mga sardinas nga mobalor og P5 million ug wala niya iagi sa Bids and Awards Committee (BAC).

Sa laktod nga pagkaistorya , walay respeto si Senajon sa ilang chairman sa BAC nga si manlalaban Orvi Ortega ug sa uban niyang mga kaubanan sa BAC.

Mihukom si Senajon nga iya-iya ra ug nagpa-deliver sa paborito niyang supplier sa mga canned goods bisag wa pay mga papeles ug bisag way pagtugot sa BAC.

Butang kini nga angayng imbestigahon ni Governor Davide ug di angayng palabyon kay posibleng disadvantageous sa gobyerno ang iyang gihimo.

Sama sa akong giingon nga bisag emergency purchase kadto, kay anaa kita ubos sa kalamidad, apan dili lagi mahimo nga atong i-circumvent ang balaud ilabina ang pag-uyon unta sa BAC.

Gisolo ni Senajon ang commission kana kun duna man? Posible ba nga nakigkonsabo ang supplier ngadto ni Senajon aron paglugi sa gobyerno?

May kalambigitan ba sab si Acting Dumanjug Mayor Guntrano Gica kinsa maoy giingon ni Senajon sa akong interview nga maoy mihangyo sa supplier nga maka-deliver kay amigo sa mayor?

Si Senajon mitug-an nga tag P13 ang presyo sa buok sa sardinas nga “King Cup” nga susama ug presyo sa tindahan nga unta binulto man ang kuha sa Kapitolyo. So, kun bulto ang kuha barato unta ang presyo. Di ba?

Pero unsa man sab katinuod nga dunay tag P5? Tag P7 ang buok sa sardinas niadtong higayona?

In fairness ni Senajon, iyang gipasabot nga niadtong higayona atol sa relief operations, mas mahal gyud ang presyo sa mga de lata tungod sa kadaghang nanginahanglan.

Iyang gipasabot atol sa akong interview nga dili tinuod ang mga nanggawas nga istorya nga nikalit siya og kadato. Dili tinuod nga nakapalit siya og balay sa Labangon ug iyang gihimakak nga nakapalit siya ug sakyanan nga BMW.

Gilakbitan niya nga wa na siyay gipaeskuwela unya duha sa iyang mga anak nakatrabaho na. Ang usa tua sa bangko samtang ang usa anaa nagtrabaho sa usa ka car dealer.

Akong sublion nga puwede kaayong makapahigayon ug motu propio investigation si Governor Davide kang Senajon ilabina sa questionable purchase sa mga canned goods human kini nanglaktod sa mga proseso.

Gawas kang Senajon, nakadawat sab ko og text nga nagkanayon nga “Super Lloyd, duna pay usa ka dept head diha sa capitol nga angayan sad imbestigahon kay lima palang ka bulan tulo na sakyanan og bag ong gatukod balay sa talisay kay ang kwarta niya ginapito ginapara ang mga truck sa bas.”

Unya gawas niini, among kauban si Renan Alangilan nakakupot og picture sa duha ka mga lalake nga trabahante sa Kapitolyo nga nagsabong og manok sa atbang sa Capitol bulding ug kilid sa estasyon dyHP.

Pagkadaghang badlongon! Morag giabusohan gyud ang kaayong tawo ni Governor Junjun. Mga butang kini, Gov, nga dili angayng palabyon kay puwerte nimong paningkamot nga matul-id ang pangagamhanan apan daghang mosukwahi.

* * *

Nakakuha ko sa mga additional nga ebidensiya nga gisometer ngadto sa Provincial Prosecutor’s Office sa taga -National Bureau of Investigation in Central Visayas (NBI-7) bahin sa pagbanhig patay nilang manlalaban Noel Archival.

Usa sa mga naduso mao ang joint affidavit nilang agent Edgardo Baldemos ug PO3 Norman Anos sa Provincial Police Office ug ilang giasoy nga niadtong Marso 15 ning tuiga, nakadawat sila og information nga ang gray Mitsubishi Strada nga usa sa mga gisakyan sa mga suspetsado sa pag-ambush gipaayo sa Off-Road Autoshop nga iya ni Manuel Velayo sa Maguikay, Mandaue City ug mao nga ilang giadto ug matud pa susama gyud ang maong sakyanan sa features nga nakuha sa CCTC footage.

Ilang gideklarar sa ilang affidavit nga niadtong Marso 20 alas-4 sa hapon, ilang nakita nga ang maong sakyanan gipagawas ug gimaneho ni PO1 Alex Bacani, ikalimang respondent.

Miingon si PO3 Anos nga nakaila siya kang Bacani kay nadestino siya sa Cebu City Police Office ug duol ra ang ilang opisina sa Highway Patrol Group in Central Visayas (HPG-7).

Gawas niini, ang driver ug mekaniko ni Manuel Velayo nga si Wilfred Libaton mi-execute usab og sworn statement nga nagbutyag ug nagkompimar nga ang maong sakyanan didto sa ilang shop apan wa mahuman sa pagpaayo kay medyo gidali pagkuha ni Bacani.

Nahibawo-an sab ni Libaton gikan sa iyang amo nga si Velayo nga ang sakyanan iya ni Col. Iglesia sa HPG-7 nga gipasibat ni Bacani sa ilang shop.

Ugmang adlawa, ang five-man investigating panel sa Provincial Prosecutor’s Office nga gipangulohan ni piskal Petronio Elesterio magtigom ug magpadayon sa ilang preliminary investigation kay wa sila makadawat og kamandoan sa Department of Justice Manila nga hunongon.

Kun tinuod man ang giingon ni PO3 Anos nga iyang nakit-an si Bacani nga nag-drive pagawas sa gray Mitsubishi Strada sa autoshop ni Velayo niadtong Marso 20, nganong wa man niya babagi ug gipa-impound ang sakyanan?

Hadlok siya ni Bacani kay insakto sab sa karga?