Kudos ngadto sa kapolisan sa Bohol nga mihimo dayon og follow-up operations sa pag-ambush patay sa hepe sa lungsod sa Ubay nga si Chief Insp. George Caña nga miresulta sa pakigpinusilay ug miresulta sa kamatayon sa no. 1 drug pusher nga si kanhi PO1 Owen Rosales ug sa iyang lima ka kauban.
Kun inosente man si kanhi PO1 Rosales ug iyang mga kauban pag-ambush ni Chief Inspector Caña, duna gihapon silay tulubagon kay nganong wa gyud mo-surrender unya nakuhaan pa og mga high-powered fire arms ug shabu.
Alangan magpa alkanse ang atong kapolisan sa binakbakay ilabina nga napungot na sila nga napatay ilang opisyal tungod sa kampanya pakiggubat sa illegal drugs.
Maglaum ko nga di pasagdan sa gobyerno ang pamilya ni Caña aron dili maluya ang kapolisan pagpakigbatok sa mga druglord.
* * *
Kanyahay ra diay nga ma inutil ang panerbisyo sa mga barangay officials ilabina ang paghipos sa mga basura kay ang garbage truck nga iya sa gobyerno gamiton personal alang sa ilang negosyo.
Sama sa usa ka konsehal sa barangay Calamba ning dakbayan sa Sugbo nga si konsehal Corazon Lim kinsa nag-sideline og buy and sell sa mga scrap metal, mga biya nga karton, mga plastic ug uban pa kay mipahimulos paggamit sa ilang truck sa barangay pagkuha sa mga butang nga ma-recycle sa among complex sa GMA-7 niadtong Lunes sa hapon.
Ang garbage truck nga may red plate number SJM 938 napuno gyud sa mga nakompra ni konsehal Lim.
Midepensa si konsehal Lim nga may pagtugot sa ilang kapitan ang paggamit sa garbage truck.
Unya matud niya nga sa panahon nga mogamit siya sa truck sa barangay mo-abang siya og P500 sa sakyanan, laing P300 nga ihatag sa driver ug motubil siya og P250 ngadto sa P350.
Giklaro sa konsehal nga dunay ordinansa ang ilang Barangay nga pwedeng pa-abangan ang ilang mga sakyanan ngadto ni bisan kinsa. Mibana-bana si konsehal Lim nga moabot na og mga lima ka higayon nga siya nakagamit sa garbage truck sa iyang negosyo kay naguba ang iyang sakyanan.
Apan dihang akong gipangayo-an og resibo sa iyang pagbayad sa garbage truck, wa siyay gipakitang resibo ug iyang gipasabot nga mihangyo siya sa kapitan nga unya na ang bayad human ihatod ang mga karga.
Pastilan baya niining kalakiha. Butang kini nga angayng estriktohon sa mga barangay ug sa Cebu City Hall kay inig ka guba sa sakyanan ug inig ka hubas sa krudo, paralisado ang serbisyo sa publiko.
Dili ni pahimulos ug abuso sa gahom?
* * *
Ambot lang kun unsa katinuod nga dunay sex video si Justice Secretary Leila De Lima.
Makatawa na lang ko niining mga kalamboan karon. Di kaha pangdaot lang kang De Lima kinsa vocal kaayo nga miimbestigar sa pork barrel fund scam nga miresulta sa pagtaral nila ni Senators Juan Ponce Enrile, Jose “Jinggoy” Estrada ug Ramon “Bong” Revilla Jr?
Sa tinuod lang, dunay iyang mga sakop nga motuo sa eskandalo nga naglambigit sa iyang driver ug security escort ilabina nga naglagot kaniya kay wa makadawat sa insaktong bonus.
Apan ang uban, dili makatuo nga makahimo si De Lima tungod sa pwesto nga iyang gihuptan.
Nganong karon pa kini nanggawas nga gituki sa Commission on Appointments (CA) ang confirmation sa appointment ni De Lima.
Sigurado kaha si Sandra Cam, presidente sa Whistleblowers Association of the Philippines nga makahatag sa video ngadto sa CA?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
