Anti-corruption maoy unahon ni Gov!

Karong alas-2 sa hapon, i-deliver ni Cebu Gov. Hilario Davide III ang una niyang State of the Province Address kon Sopa nga iyang gipausab ang pangan niini ngadto na sa “Report to the People” sa session hall sa Legislative Building sa Capitol compound.

Si Ethel Natera, tigpamaba sa Kapitolyo, mitug-an nga ang speech ni Governor Davide maglangkob unya sa six-star development agenda nga mao ang: health, education, youth, gender, tourism, ug social protection.

Kining maong mga agenda maoy tuyokan-tuyokan sa mga politiko bisan sa panahon sa pangampanya.

Wa ko moingon nga undangon ang pagtuki ning maong mga isyu apan, ang tam-is nakong madunggan sa atong gobernador mao ang pagtangtang ug pag-imbestigar sa iyang mga tinudlo nga miabuso sa mga transaksiyon sa Kapitolyo nga nagdag dangan sa iyang administrasyon.

* * *

Congratulations sa atong kapolisan sa Naga City Police Station ug sa Special Weapons and Tactics nga wa magpasagad sa ilang trabaho kay nasulbad gyud nila ang hostage crisis niadtong Biyernes nga way namatay taliwa sa 12 ka oras nga negosasyon sa amahan nga addict nga nang-hostage sa iyang asawa ug mga anak.

Wa gyuy kumo sa taas nga pasensiya ug maximum tolerance sa mga awtoridad ngadto sa hostage taker nga si Beroni Bacon, kawani sa local water system ug taga-Tinaan, Naga City.

Paita gyud sa sugilanon kay ang motibo sa banang addict ngadto sa iyang asawa nga si Lindella kinsa trabahante sab sa accounting office sa dakbayan sa Naga.

Kanus-a man tinud-on sa atong mga awtoridad ang mga drug pushers nga grabe na kaayog kadaut sa mga pamilya?

* * *

Magpasalamat ko kung wa nay mga pagbabag ug pagsupak sa mga supetsado niining preliminary investigation sa kasong pag-ambush ug pagpatay nilang manlalaban Noel Archival ubos sa pagdumala ni Lapu-Lapu Asst City Prosecutor Jesus Rodrigo Tagaan.

Nanawag kanako si manlalaban Inocencio Dela Cerna, legal counsel nilang Chief Supt. Romualdo Iglesia ug sa mga kaubang suspetsado nga mga opisyales sa Highway Patrol Group in Central Visayas ug siya miingon nga dako silag pagsalig kang piskal Tagaan.

Apan iyang mga kliyente, mas mopili gyud nga adto sa Department of Justice (DOJ) Manila himoon ang preliminary investigation.

Midepensa usab si Dela Cerna nga dili sila maoy naglangay-langay ug iyang gipasanginlan ang mga kadagkoan sa DOJ kay dugay kaayong nakaresolbar sa ilang hangyo nga adto ibalhin sa Manila ug gibasol usab niya ang taga-NBI kay gitagi-tagi ang pagduso sa mga ebedensiya ug affidavit sa prosecutor’s office.

Sama sa akong giingon, bisag unsay makab-ot nga resolusyon sa kaso, dili pa final ang resolusyon sa fiscal level ug puwede pa nilang i-elevate sa Regional State Prosecutor’s Office ug didto sa Department of Justice Manila, kana kun sila diskontento sa findings.

Mao nga kung moinsister gyud gihapon ang mga kliyente ni manlalaban Insiong ug mapakyas siya sa pagpasabot sa maong legal process, way pulos iyang pagpanglaban kay abuso na kaayo kining dako.

Kun inosente gyud sila, nganong dili man mo-submit sa full blown trial?

* * *

Mangayo ko og dispensa sa akong mga suking tigpaminaw sa dySS Super Radyo kay medyo taas-taas pa gyud ang panahon nga di ko ikauban ninyo sa akong matag gabii nga “Lloyd Suarez on Board, Saksi” sa 9 p.m. to 11 p.m. ug ingon man sa akong matag Sabado nga programang “Dialogue on the Air” sa 2:30 p.m. to 4:30 p.m. tungod sa among padayong pagbangutan karon sa tibuok pamilya sa pagtaliwan ni Mama Ernesta.

Medyo dugay gyud ang haya tungod kay among gi-agad ang among duha ka mga igsoon nga gikan pa sa nasud sa Iceland nga sila si Manang Emma ug Inday Salvacion, kinamagulangan ug kinamanghuran sa 13 namong managsoon.

Alang namong mga nahibilin dinhi sa Pilipinas, medyo taas gyud kaayo ang 15 diyas nga lamay, apan alang sa among mga igsoon nga gikan pa sa gawas, mubo ra gyud kaayo kay talagsa-on ra silang maka-uli dinhi nga makahangop sa among inahan gumikan sa kalayo ug dunay tagsa-tagsa ka pamilya ug mi-abot sila dinhi sa ato niadto pang July 2 unya si Mama namatay niadtong June 27.

Kami na lang nga anaa dinhi ang mi-adjust sa sitwasyon, aron makauban sab nila si Mama sa taas-taas nga higayon.

Alang sa akong mga ig-agaw, kaparyentihan ug mga suod nga higala, ang final schedule sa iyang lubong karong Sabado, July 12, 2014 alas-10 sa buntag didto sa sementeryo sa Santa Monica Parish Church nga anaa nahimutang sa barangay Cawayan, Dalaguete.

Tungod kay ang Requiem Mass himoon sa alas-10 sa buntag sa Sta. Monica Parish, mobiya iyang patayng lawas sa among panimay sa Casay, Dalaguete mga alas-8:30 sa buntag kay ontop alas-10:00 mag-Misa dayon sa dili pa ang lubong.

Insakto gyud diay ang panultihon nga sakit gyud kun biyaan na ka sa imong pinanggang inahan ilabina nga handumon ang tanang mga pagpangga ug sakripisyo alang sa pamilya.

Sa makausa pa, daghan kaayong salamat sa tanan nga miduyog sa among pagbangutan.