Chapo n Nognog

Tungod kay usa man siya sa mga dili taas nga Mexicano gitawag si Joaquin Guzman og El Chapo o “shorty.” Basig mas tag-as tingali ang ubang drug lords kon itandi kaniya maong gitagaan siya sa maong angga.

Naghunhuna ko kon unsay etymology sa Nognog. Nakahibaw ta nga may kalabutan kini sa itom nga pamanit ni Jejomar Binay.

Sa ako lang pangagpas naggikan kini sa -sunog (kon sa atoa pa -paig). Maurag sunog-sunognog-Nognog maoy metamorphosis ning maong angga. Maurag ang vice-president mismo maoy gaangga sa iyang kaugalingon og Nognog para ingnon nga tinamay siya og nga angay siyang kaluy-an ug dapigan.

Ang dakong balita ni Chapo mao ang iyang pagikyas gikan sa usa ka high-security prison sa Mexico nga nakapakagut sa mga ngipon sa mga Americano hinungdan nga giboyboy nila ang ilang silingang nasud nga maayog ila pang gidunol si Chapo sa US kay sila na lang untay mopriso niani ug wa pa unta kini makaiskapo. Gitawag si Chapo nga Bin Ladin of Mexico tungod sa mga pagpamatay ug pagpanghasi sa iyang drug cartel sa maong lugar. Ug giingon nga iyang mga kasway dugay na nga nakasulod sa Estados Unidos o US.

Kon maru si Chapo kay maayo mo eskapo tingali mas maru si Nognog kay lisud man kini prisuhon. Gani bisan pa man sa nagkalata nga mga akusasyon kabahin iyang pagpangilkil og binilyong kwarta gikan sa mga proyikto sa gubyerno ngapabilin nga taas ang iyang rating sa survey sa mga presidentiables. Ang pinakabag-ong taho kabahin ni Nognog mao ang iyang gipangyawit sa usa ka panagtapok nga kon siya kuno ang mahimong sunod nga presidente tangtangon niya ang limitasyon sa pagdagan sa usa ka politiko.

Dili lang diay buot molingkud si Nognog gusto diay siyang moyaka sa poder. Ang mga kasway ni Nognog giingong nakasulod na kaban sa mga Boy Scouts.

Hari sa Makati si Nognog ug daw ginuo si Chapo sa Sinaloa. Nahimong hawud ang duha sa ilang lugar ug pinangga sa mga mamumuyo didto tungod sa ilang pagkamangihatagon. Puros maayo sa mga kabus ug sa Simbahan.

Silang duha puros produkto sa katilingban nga nalata na sa corruption.

Maglisud silag pagbitik ni Nognog kay daghan kaayo siyang mga koniksyon nga andam motabang paglimpyo sa iyang mga giagian. Ang mga kabus sa ilaha nga puros nakautang kaniyag kabubut-on andam nga modupa kang Nognog ug sa iyang banay.

Matud pa sa usa ka documentary filmmaker sa Mexico nga kon buot ang Mexico mosulbad sa ilang problema sa mga cartel dili paigo nga ang mga ulohan niani sama kang Chapo mao ray ilang sikupon. Kinahanglang nga apilon nila pag gukod ang mga bangko, politiko ug sakop sa ilang kagamhanan nga nag paluyo sa mga cartel leaders sama ni Chapo.

Ulo ra kuno si Chapo ug dili kini makalihuk kon wala kini suporta sa dako lawas nga mao ang iyang mga backer.

Kon dunay drug pusher nga anha magbasi duol sa inyuha batunan mo gayud ang dakong kakulba. Sama ra ka kulba kon kampanyahan kas imong mga paryente ug higala pag suportar ni Nognog.

Ila kang hunghungan nga ayaw lag panumbalinga ang issue sa corruption kay total corrupt man silang tanan ug nga bisan si P-Noy di man kagukod sa iyang mga sakop nga duna say issue niani.

Kon patung-an ka sa drug pusher ug Nognog campaigner maka Ininglis kag -The Horror has finally hit home.